پشتی گۆتارا سەرۆکێ مەھەپێ دەولەت باخچەلی یا کو رۆژەڤا ترکیێ و باکورێ کوردستانێ ب تەمامی گوھەرتی، شرۆڤە بەردەوامن. باخچەلی بانگی ئۆجالان کربوو و گۆتبوو: “بلا دەرکەڤە و دیار بکە کو تەرۆر قەدیایە و پەکەکە ھاتیە ھلوەشاندن” پارلەمەنتەرێ بەرێ یێ ھەدەپێ ئالتان تان ژی مەدیاسکۆپێ دە بەشداری بەرنامەیا گۆکسەل گۆکسو بوو.
ل سەر پرسا “گەلۆ ب بانگا ئۆجالان دێ چەک بێن دانان؟” تان بەرسڤا خوە دە دبێژە: “ژ سەدی 100 نە موومکنە کو خوەدی ل بانگا ئۆجالان دەرکەڤە. بلا ئەم بنێرن کەسێن کو 40 سالن پۆستەرێن ئۆجالان ھلدگرن وێ گوھ بدن گۆتنێن وی یان نا.”
گەلۆ پەکەکە دێ چەکێن خوە دەینە؟
ئالتان تان، بال کشاند کو پرسگرێک نە ھەرێمییە و دەستنیشان کر کو پرسگرێک نە تەنێ پرسگرێکا ترکیەیێ یە و گۆت: “ئامەریکا، رووسیا، ئیران، ئەلمانیا و ئیسرایل ژی د ناڤا ڤێ دە نە. یێن کو ب دانینا چەکان تێر دبن ھەنە، یێن کو تێر نابن ژی ھەنە. ئەوێن تێر نەبن، ژ بۆ کو چەکان نەدن دەست، ب قەندیل، پەکەکێ و پێکھاتەیا وێ یا ل ئەورۆپایێ و سازیێن وێ یێن حقووقی یێن ل ترکیەیێ دێ بکەڤن ناڤا سەختەکاریێن گران. ژ بەر ڤێ یەکێ ئەو دێ ببێژن بلا چەک نەیێن دانین. ب گۆتنەک کورت تر، پەکەکە نکارە ل سەر بانگا ئۆجالان چەکان دەینە.”
تان د بەردەوامیا نرخاندنا خوە دە گۆت: “ھندەک ئالیێن دن ژی ھەنە، لێ بلا ئەو بانگ بکە. و بلا ئەو نەخشەیا رێ ئەشکەرە بکە. کا ئەم بنێرن کی ئالیگرێ بێدەنگ کرنا چەکانە و کی ئالیگرێ دۆماندنا ڤێ رەوشێیە؟ ئەز ژ بۆ ئەنقەرەیا کوور، ژ بۆ پەکەکێ و ژ بۆ ھێزێن ل پشت پەکەکێ دبێژم. “وەرن ئەم ب ڤەکری ل پرسێ بنێرن بلا راستی دەرکەڤە ھۆلێ، ئەم دێ ھنگێ ببینن کا کی چ دکە..”
