دەمیرتاش: ب لهەڤکرنا په‌كه‌كه و دەولەتێ پرسگرێک چارەسەر نابە
هەڤسەرۆکێ بەرێ یێ هه‌ده‌پێ و سیاسەتمەدارێ کورد سه‌لاحه‌ددین دەمیرتاش دەربارێ پێڤاژۆیەکە نوو یا چارەسەریێ گۆت: «ب لهەڤکرنا دەولەتێ و په‌كه‌كێ پرسگرێک چارەسەر نابە، دڤێ گەل ژی د ناڤ پێڤاژۆیێ دە جهـ بگرە».
پارێزەر و سیاسەتمەدارێ کورد سدقی زیلان رۆژا یەکشەمێ ل گرتیگەها ئەدرنەیێ ب سه‌لاحه‌ددین دەمیرتاش رە هەڤدیتن کر.
سدقی زیلان دەربارێ سەردانا خوە ژ رووداوێ رە ئاخڤی و گۆت:
«هەڤدیتنا مە و سه‌لاحه‌ددین دەمیرتاش نێزیکی 2 دەمژمێران بەردەوام کر. ئەم ل سەر رۆژەڤا سیاسەتێ و پێڤاژۆیا چارەسەریێ ئاخڤین».
زیلان دا زانین کو دەمیرتاش ژێ رە گۆتیە، «ژ بۆ پێڤاژۆیا چارەسەریێ چ هەڤدیتنا راستەراست ژ ئالیێ دەولەتێ و ئاک پارتیێ ڤە ب وی رە نەهاتیە کرن».
«ئەز کەسەکی گرتی مە و ل سەر پرسا کورد گۆتووبێژێ ناکم»
ب گۆتنا زیلان، هەڤسەرۆکێ بەرێ یێ هه‌ده‌پێ گۆتیە: «ئەز ئامادە مە پشتگریا پێڤاژۆیێ بکم، هنەک پارێزەر هاتن سەردانا من لێ من ژ وان رە گۆت، ئەز د گرتیگەهێ دە ب وە رە ل سەر پرسا کورد نائاخڤم. ئەز کەسەکی گرتی مە. ئەگەر هوون دخوازن ئەم ل سەر چارەسەریێ گۆتووبێژێ بکن، دەستپێکێ من بەردن، ئەم ل بەر دەری باخڤن».
«ژ بۆ چارەسەریێ دڤێ کورد ببن هەڤبەشێ دەولەتێ»
دەمرتاش هەر وها گۆتیە: «ب لهەڤکرنا دەولەتێ و په‌كه‌كێ پرسگرێک چارەسەر نابە، دڤێ گەل ژی د ناڤ پێڤاژۆیێ دە جهـ بگرە. ئەگەر وها نەبە ئاشتیا جڤاکی پێک نایێ. ژ بۆ چارەسەریێ دڤێ کورد ببن هەڤبەشێ دەولەتێ».
