سەرۆکێ حكوومه‌تا هەرێما کوردستانێ د رۆژا دویێ و داویێ یا کۆربەندا مێپسێ دە ل باژارێ دهۆکێ، د کۆنفەرانسەکە رۆژنامەڤانی دە گۆت، «مە هەردەم بزاڤ ژ بۆ وێ یەکێ کریە کو هەرێما کوردستانێ فاکتەرا سەقامگریێ بە». ئەو گۆتنا سەرۆکوەزیر مەسروور بارزانی د دەمەکێ دە هات کو نها ئیراق رووبروویی گەفێن شەرەکی دەڤەرێ دبە.
سەرۆکێ حكوومه‌تا هەرێما کوردستانێ مەسروور بارزانی ئیرۆ (شەمی، 23.11.2024)، د رۆژا دویێ و داویێ یا کۆربەندا مێپسێ دە کو ل دهۆکێ ب رێ ڤە چوو، د کۆنفەرانسەکە رۆژنامەڤانی دە گۆت، «کۆربەند زێدەتر ژ بۆ لهەڤگوهەرتنا دیتن و نەرینانە. خەلکێ شارەزا چ ئاکادەمی بن، چ سیاسی، چ ژی سەرکردەیێن ئابۆری، دگەهن هەڤ و دیتن و نەرینێن خوە ل هەڤ دگوهەرن. ئەو دیتن و نەرین دگەهن بەر دەستێن بریاردێرێن دەستهلاتداریێ. ئەم هێڤیدارن دیتن و نەرینێن نوو بێن ئامادەکرن، ژ بۆ کو هەمی ئالی ژ شەر و لێکدانان دوور بکەڤن و زێدەتر ل سەر ئاشتی و پێکڤەژیانێ بفکرن».
سەرۆکوەزیر مەسروور بارزانی گۆت، «مە هەردەم بزاڤ ژ بۆ وێ یەکێ کریە کو هەرێما کوردستانێ فاکتەرا سەقامگریێ بە. ب بەرپرسێن حكوومه‌تا فەدەرالی رە ژی، مە ب رێزدار سوودانی رە بەخسا وێ یەکێ کریە کو پێدڤییە ئیراق ژ هەمی وان ئارێشە و ئالۆزیێن دەڤەرێ بێ دوورخستن و بەرژەوەندیێن بلندێن خەلکێ ئیراقێ و خاسما ژ بۆ مە، بەرژەوەندیێن بلندێن خەلکێ کوردستانێ، ل بەر چاڤان بێن وەرگرتن، ئەم تێکەلی شەر و تێکدانەکێ نەبن کو زرار ژ بۆ خەلکێ مە تێ دە بە. هندی ژ مە بێ، ئەم خوە ژ وی شەری دوور دکن».
سەرۆکوەزیرێ هەرێما کوردستانێ تەکەز ژی کر، «ئەم ناخوازن ببن پارەک ژ وی شەری. ئەو شەر د بەرژەوەندیا ئیراقێ دە نینە. هەروەسا ئەم وەسا دفکرن کو ئەو شەر چەند ژ ئیراقێ دوور بکەڤە، د بەرژەوەندیا خەلکێ ئیراقێ دەیە».
