فەرماندارێ ھێزا پاراستنا ئێزیدخانێ ژ رووداوێ رە گۆت، “مەترسی ھەیە کو ھندەک کۆمێن چەکدار چیایێ شنگالێ ژ بۆ ئێرشکرنا سەر ئیسرایلێ ب کار بینن.”
فەرماندارێ ھێزا پاراستنا ئێزیدخانێ حەیدەر شەشۆ ئیرۆ ل سەر پێشھاتێن داوی یێن جیھان و کوردستانێ ژ رووداوێ رە ئاخڤی.
فەرماندارێ ھێزا پاراستنا ئێزیدخانێ حەیدەر شەشۆ راگھاند:
“گەلەکی گرینگە کو ئیراق نەبە بەشەک ژ ئالۆزیێن ل ھەرێمێ.”
حەیدەر شەشۆ دیار کر کو حکوومەتا ئیراقێ ل ھەمبەری دەستدرێژیێن کو ل سەر شنگالێ تێن کرن بێدەنگە.
شەشۆ ل سەر رێگریا کۆمێن چەکدار کو ژ شنگالێ ئێرشی ئیسرایلێ نەکن ژی گۆت:
“دەستھلاتا ئارتێشا ئیراقێ ل سەر وان کۆمێن چەکدار نینە کو رێگریا وان بکە.”
حەیدەر شەشۆ ئانی زمان:
“پشتی کو شەر دەست پێ کر ئانھا مەترسی ل سەر چیایێ شنگالێ ھەیە. د دەما سەدام دە چیایێ شنگالێ ھات بکارانین و ژ ور مووشەک بەر ب ئیسرایلێ ڤە ھاتن ئاڤێتن.
نھا دیسا مەترسی ھەیە کو ھندەک ئالی شنگالێ ژ بۆ ئێرشێ ب کار بینن.
ئەم دترسن ئەرد و خەلکێ شنگالێ دیسا ببە قوربانیێن پلانەکێ.
ھەتا نھا زێدەتری ژ سەدی 50 شنگالیان، ب تایبەتی ئێزدی دەربدەرن. ئەم ھێڤی دکن کو ئیراق دەرفەتێ نەدە.”
شەشۆ دەستنیشان کر کو ئیسرایلێ گۆتیە مافێ وان ھەیە کو ل دژی ئێرشان پاراستنا خوە بکن و گۆت:
“ئەم ھێڤی دکن حکوومەتا ئیراقێ ئاخا خوە بپارێزە. دڤێت ئیراق رێ نەدە کو ئاخا وێ ژ بۆ ئێرشا ئیسرایلێ و وەلاتێن جیران وەرە بکارانین.
د ناڤا مەھەکێ دە 2 جاران ئێرشی شنگالێ ھات کرن و حکوومەتا ئیراقێ د ڤێ مژارێ دە گەلەکی بێدەنگ بوو.”
“ل دەردۆرا شنگالێ دگەرن”
حەیدەر شەشۆ دیار کر نە دوورە ئیسرایل ژی وەکی ترکیەیێ ئێرشی ئیراقێ بکە.
شەشۆ ھەر وھا دەستنیشان کر، گەلەک کۆم و کۆمک ھەنە کو ل شنگالێ ئالۆزیان دەردخن.
حەیدەر شەشۆ دا زانین کو ھندەک کۆمان خوەستیە چەکان ببن سەر چیایێ شنگالێ لێ رێگری ھاتیە کرن.
“ھندەک ژ ڤان کۆمێن چەکدار ئەڤ چەند رۆژن ل دەردۆرا شنگالێ دگەرن و ھەول ددن ھەرن سەر چیایێ شنگالێ کو بەرێ ژ بۆ ئێرشکرنا ئیسرایلێ دھات بکارانین، جارەکە دن ب کار بینن.
ئەم نکارن ب تەمامی پشتراست بکن کو ئیسرایل ئێرشی شنگالێ دکە لێ مەترسی ھەیە.
ژ بەر کو ھەفتەیا بۆری دو ئێرشێن درۆنان ل سەر شنگالێ ھاتنە کرن و حکوومەتا ئیراقێ ت بەرتەک نیشان نەدانە.”
حەیدەر شەشۆ بانگی خەلکێ شنگالێ ژی کر و ئانی زمان:
“پێویستە گەلێ شنگالێ رێ نەدە ت کەس ئاخا شنگالێ ژ بۆ ئێرشکرنا سەر وەلاتەکی ب کار بینە یان ژی ژ بۆ بەرژەوەندیێن خوە و یێن پشتەڤانیا وان دکن.”
کۆما ب ناڤێ بەرخوەدانا ئیسلامی یا ئیراقێ کو نێزیکی ئیرانێ ب بەردەوامی ب درۆن و مووشەکان ئێرشی ئیسرایلێ دکە.
ئیسرایلێ ھشیاری دا کو ل دژی ئێرشان مافێ وان ھەیە ئێرش بکە.
