ل ھەمبەری ئالۆزی، تەڤلھەڤی و ئەگەرێن شەر، داخواز و بانگێن ئاشتیێ دەردکەڤن پێش. د فۆرما مەپس 24 دە وەک گۆتارا دەستپێکێ سەرۆک بارزانی گۆت، سەدسالان سیاسەتا تونەکرنا کوردان ئەنجام نەگرتیە، لێ کورد ژی ب شەر ب تەمامی نەگھشتنە ئارمانجێن خوە. ژ بەر ڤێ پێویستی ب ئاشتی ھەیە. ل ئالیێ دن ئاکادەمسیەن و سیاسەتمەدار ئوفوک ئوراس پشتی ھەڤدیتنا ل گەل دەولەت باخچەلی راگھاند، ژ بۆ پرۆسەیێ ئامادەکاریێن جدی ھەنە و ئەو چاڤەرێ دکە گاڤێن گرینگ بێن ئاڤێتن. لێ جیگرێ سەرۆکێ فراکسیۆنا ئاک پارتیێ دبێژە د رۆژەڤا وان دە لێبۆرینا گشتی و بۆ زمانێ داییکێ گوھەرتنا دەستوورێ نینە.
دەستپێکرنا پرۆسەیەکە نوو بۆ پرسا کورد ل باکورێ کوردستان و ترکیێ، د کۆربەندا ئاشتی و ئەولەھی یا رۆژھلاتا ناڤین مەپس دە مژارەکە گرنگ بوو. سەرۆک بارزانی د گۆتارا خوە دە بەحسا گرینگیا ئاشتیێ ل ناڤچە و کوردستانێ کر و گۆت، رەوشا ھەر پارچەیەکە کوردستانێ جودایە، ژ بەر ڤێ نێزیکاتی ژی جودا دبە، لێ نابە تەرۆر وەک رێیەکە چارەسەری بۆ پرسا کورد وەرە بکارئانین.
پرۆسەیا نوو یەکێ جۆتمەھێ ل پارلامەنتۆیا ترکیێ ب سەرۆکێ گشتی یێ مەھەپێ دەولەت باخچەلی ھاتبوو رۆژەڤێ. ئاکادەمیسیەن و پارلامەنتەرێ بەرێ یێ بەدەپێ ئوفوک ئوراس سەردانا سەرۆکێ مەھەپێ کر و گۆت، د پرۆسەیێ دە ساربوونەک ھەیە و وی خوەستیە لەزی بدن پرۆسەیێ.
ئوراس پشتی ھەڤدیتنا ل گەل باخچەلی راگھاند: “ئامادەکاریەکە جدی ھەیە. ھەماھەنگیا ھەڤپەیمانیا جومھور ھەیە و پێشنیار ژ ئەردۆگان بۆ باخچەلی ھاتیە. لێ نەخشەرێیا چارەسەری نینە. چاڤەرێدکم، دەمێن پێش ژ لێبۆرینا گشتی ھەتا پێنگاڤێن دەستووری ھن گاڤ بھێن ئاڤێتن.”
ئوراس پشتی ھەڤدیتنا ل گەل باخچەلی، ب ھەڤسەرۆکێ دەم پارتیێ تونجەر باکرھان و شارەدارێ مێردینێ ئەحمەد تورک کو ھاتبوو دوورخستن رە، ھەڤدیتن ئەنجام دا. ل گۆر ئیدیعایان، ئەحمەد تورک و سڕی سورەیا ئۆندەر دێ سەردانا باخچەلی بکن.
ل ئالیێ دن، جیگرێ سەرۆکێ فراکسیۆنا ئاک پارتیێ عەبدوللا گولەر راگھاند، د رۆژەڤا وان دە بۆ زمانێ کوردی گوھەرتنا دەستوورێ نینە و ئەو ل بەندا ئالیانن کو پێشنیارێن خوە پێش بخن. گولەر ھەر وھا گۆت، لێبۆرینا گشتی ژی د رۆژەڤا وان دە نینە و لێبۆرینێن ھەتا نھا سوودمەند نەبوونە.
