سەرۆکێ جه‌هه‌پێ ئۆزگور ئۆزەل گۆت: “مەسەلەیا سەرەکە یا تایینکرنا قەیوومان ل سەر شارەداریێن جه‌هه‌پێ و دەمێ جەزاکرنا گەلە”.
سەرۆکێ پارتیا گەلا کۆماری (جه‌هه‌پێ) ئۆزگور ئۆزەل ئیرۆ ل باژارێ ئەنقەرە یێ ترکیەیێ بەشداری کۆنگرەیا گشتی یا وەقفا چاندا ئەنادۆلێ یا حاج بەکتاش وەلی بوو و دەربارێ مژارێن د رۆژەڤێ دە ئاخڤی.
وەزارەتا کارێن ناڤخوە یا ترکیەیێ رۆژا ئینیێ قەیووم تایینی شارەداریا دێرسمێ یا دەم پارتیێ و شارەداریا ناڤچەیا پلوورێ یا دێرسیمێ یا جه‌هه‌پێ کرن.
ل شوونا سەرۆکێ شارەداریا دێرسمێ جەودەت کۆناک، پارێزگارێ دێرسمێ بولەنت تەکبیکۆگلو وەکی قەیووم هات تایینکرن و ل شوونا سەرۆکێ شارەداریا پلوورێ مسته‌فا سارگول ژی قایمەقامێ پلوورێ حسێن شامیل وەکی قەیووم هات تایینکرن.
ئۆزگور ئۆزەل د ئاخافتنا خوە دە نەرازیبوون ل هەمبەر دانینا قەیووم ئال سەر شارەداریان نیشان دا و گۆت: “یێن کو دەما دەنگ ژ بۆ وان هاتن دایین ئیرادەیا مللی دکن تاج و دخن سەرێ خوە، دەما دەنگ ب کەسەک دن هاتن دایین، حەسابێ دپرسن و کەسێن دەنگ دانە جەزا دکن. ئەگەر ببینن کو کەسەک مخالەفەتە، وی دخن گرتیگەهێ لێ د هلبژارتنێ دە دەنگدانا گرتییە و نابینن. ژ بەر وێ هەموویان ب هەڤ رە جەزا دکن”.
هەر وها ئۆزەل گۆت، “مەسەلەیا سەرەکە نە ئەوە کو قەیووم ل سەر ئەسەنیورتێ ئان ژی ل مێردینێ ل شوونا ئه‌حمه‌د تورک بێ تایینکرن، مەسەلەیا سەرەکە یا تایینکرنا قەیوومان ل سەر شارەداریێن جه‌هه‌پێ و دەمێ جەزاکرنا گەلە”.
