ژنەکا کۆلبەر ب گولـلەیێن ھێزێن ئەولەھیا ئیرانێ ژیانا خوە ژ دەست دا

ژنەکا کورد یا کۆلبەر ل سینۆرێ ناڤبەرا باشوور و رۆژھلاتێ کوردستانێ، ژ ئالیێ ھێزێن ئەولەھیا ئیرانێ ڤە گولـلە لێ ھاتن بەردان و ژیانا خوە ژ دەست دا.

مالپەرا مافێ مرۆڤان یا ھەنگاوێ راگەھاند؛ ژنەکا کۆلبەرا تەمەن 26 سالی یا ب ناڤێ “پرشەنگ قوباد زاھیری”، داییکا زارۆکەکێ و خەلکا ناڤچەیا نەوسوودا پاوێ ب گولـلەیێن راستەراست یێن ھێزێن لەشکەری یێن کۆمارا ئیسلامییا ئیرانێ جانێ خوە ژ دەست دا.

ھەروەھا ل گۆر ھەمان چاڤکانیێ راگەھاندیە؛ رۆژا ئینێ 22/11/2024، پرشەنگ قوباد زاھیری، کۆلبەرا خەلکا گوندێ “ھانا گەرملە” یا سەر ب ناڤچەیا نەوسووودا گرێدایی باژارێ پاوێ، ژ بەر کووراھیا برینێن خوە ل ئەنجاما بەرکەتنا گولـلەیێن ھێزێن لەشکەری یێن ئیرانێ ل یەک ژ نەخوەشخانەیێن باژارێ کرماشانێ جانێ خوە ژ دەست دا.

ھات راگەھاندن بابێ وێ کۆلبەرا ژن ئیدریس قوباد زاھری و ھەروەھا برایێ وێ، ژ ئالیێ ھێزێن ئەولەھیا ئیرانێ ڤە ھاتنە گرتن.