سەرۆکوەزیرێ هەرێما کوردستانێ مەسروور بارزانی ئیرۆ 26ێ مژدارێ کەڤرێ بنگەهینێ ناڤەندا هشیارکرن و چارەسەرکرنا بکارهێنەرێن مادەیێن هشبه‌ر دانی کو ژ ئالیێ دەزگەها خێرخوازیا بارزانی و رێخستنا LDS ڤە ل هەولێرێ تێ ئاڤاکرن.
سەرۆکوەزیر مەسروور بارزانی گۆتارەک د مەراسیما دانینا کەڤرێ بنگەهین دە گۆتارەک پێشکێش کر و گۆت: «رووبرووبوونا دژی مادەیێن هشبەر ژ بۆ حكوومه‌تا هەرێما کوردستانێ مژارەکە گەلەک گرینگە، ژ بەر ڤێ ئەو کار ب ئاوایەکی بەرفرەهـ کار ژ بۆ چارەسەر کرنا ڤێ پرسگرێکا کو مەترسیەکە جدییە ل سەر جڤاکا مە و د هەموو وارێن ژیانا مە دە دبە سەدەما زەرەرەکە بەرفرەها تەندورستی، جڤاکی، ئابۆری و ئەولەکاری، دکە».
هەروها گۆت ژی: «مادەیێن هشبه‌ر سەدەما سەرەکە یا لاوازکرنا جوان و سەرمایا مە یا مرۆڤییە، ژ بەر ڤێ یەکێ ئەم هەر تشتی دکن ژ بۆ پێشیگرتنا ل بەلاڤبوونا ڤێ مەترسیا مەزن. هەر ژ بۆ ڤێ یەکێ ژی حكوومه‌تا هەرێما کوردستانێ کۆمیتەیەکە بلند ژ بۆ رووبرووبوونا مادەیێن هشبه‌ر پێک ئانیە، کو هەژمارەک وەزارەت و دەزگەهێن پێوەندیدار تێ دە بەشدار بوونە. هەر وها ژ بۆ پێشخستن، رەهابیلیتاسیۆن و دەرمانکرنا ئالوودەبوویێن مادەیێن هشبه‌ر ژی سندۆقەک هاتیە ئاڤاکرن».
سەرۆکوەزیر مەسروور دا زانین: «ئاڤاکرنا ڤێ ناڤەندێ بەشەک ژ هەولێن مەیێن ژ بۆ ئالیکاریکرنا نەخوەش و ئالوودەبوویێن مادەیێن هشبه‌رە، ژ بۆ چارەسەری و ئالیکاریان وانە ژ بۆ دوبارە ڤەگەرن ژیانا نۆرمال. هەروها ئەڤ ناڤەند هەولدانەکە ژ بۆ هشیارکرنا دەربارێ مەترسی، ئەنجام و کارەساتێن بکارانینا مادەیێن هشبه‌رە.»
تەکەزی ل سەر وێ یەکێ ژی کر: «دڤێ ئەم ب توندترین ئاوایێ رووبروویێ مافیا و بازرگانێن مادەیێن هشبەر ببن و وان ب توندی جەزا بکن. لێ دڤێ جوداهی د بازرگانێن تاوانبار و ئەو کو مخابن ژ بەر هەر سەدەمەکێ دبن قیربانی ئالوودەیێ مادەیێن هشبه‌ر».
سەرۆکوەزیر مەسروور بارزانی داخواز ژ دەزگەهێن ئەولەکاریێیێن هەرێما کوردستانێ کر کو رووبروویی ڤێ دیاردەیا ترسناک ببن کو مخابن ئەڤ دیاردە زێدە دبە و هەر رۆژ ئەم دبینن کو کامپانیایێن گرتنا هەژمارەک بازرگانان د مەدیایێ دە تێنە وەشاندن. راستە گرتنا ڤان کەسان جهێ دەستخوەشیێیە، لێ ئەم گەلەکی نیگەرانن کو ئەڤ دیاردە هەتا رادەیەکێ بەلاڤ بوویە کو بوویە نووچەیەکە رۆژانە».
