سەرۆک بارزانی ھەڤپەیڤینەک لگەل کانالا سکای نیوسێ یا عەرەبی کریە و تێ دە بەحسا رەوشا ھەرێمێ و پێوەندیێن ھەرێما کوردستانێ یێن لگەل ئیراقێ و ترکیەیێ و چەند مژارێن دن کریە.
سەرۆک بارزانی دەربارێ ھلبژارتنێن پارلامەنتۆیا ھەرێما کوردستانێ گۆت:
“خەلکێ کوردستانێ سەرێ مە بلند کر”
“گەلەک ئالیان دگۆت ھلبژارتن نایێن کرن، ئەگەر بێن کرن ژی دێ گەلەک پرسگرێک پەیدا ببن.
لێ ھلبژارتن ب ئارامی و بێیی پرسگرێک ھاتن کرن. رێژەیا تەڤلیبوونا ھلبژارتنێ دەستکەفتیەکە مەزن بوو و خەلکێ کوردستانێ سەرێ مە بلند کر.
مە شاندەیەک ژ بۆ کو پێوەندیان ب ئالیێن دن بکە پێک ئانیە و ئەو شاندە دێ ژ بۆ پێکانینا حکوومەتێ ب ئالیێن دن رە ھەڤدیتنان بکە.
گاڤا یەکەم کۆمبوونا پارلامەنتۆیێ یە و پشتێ وێ دێ گاڤێن دن بێن ئاڤێتن. 10 رۆژ ل بەر دەستێ مە ھەنە و ئەو شاندە دێ دەست ب ھەڤدیتنا بکە.
ئەم چ ئالیان ڤیتۆ ناکن لێ خالەکا گرینگ ھەیە، ھلبژارتن ھاتن کرن و ئەنجام ژی دایارە.
کورسیێن سەرۆکاتیێ مافێن ھلبژارتنانن، نە ئەم شەرتێن کەسەکی قەبوول دکن و نە شەرتان ل سەر کەسەکی ژی فەرز دکن.”
یەککررنا ھێزێن پێشمەرگە
دەربارێ یەککرینا ھێزێن پێشمەرگە سەرۆک بارزانی وھا گۆت:
“پێڤاژۆیا یەککرنا ھێزێن پێشمەرگەیان بەردەوام دکە. وەزارەتا پێشمەرگە ژ دانووستاندنێن لگەل شێورمەندێن ھەڤپەیمانیا ناڤدەولەتی بەرپرسە.
ھەتا نھا ژی بەشەکە زێدە یا ھێزان کرنە یەک و ئەو پێڤاژۆ بەردەوام دکە.”
“خەباتێن ژ بۆ دەستوورا بنگەھین بەردەوام دکن”
سەرۆک بارزانی ل سەر ئامادەکرنا دەستوورا بنگەھین ژی دا زانین کو پیچەک مایە دەستوورا بنگەھینا ھەرێما کوردستانێ ئامادە ببە و گۆت:
“ژ بۆ نڤیسینا دەستوورێ رەشنڤیسەک ئامادە ھەیە و تەنێ چەند بەند مانە و ئەم دێ دەمەکە کێم تەمام بکن.
ئەڤ دەمەکە زێدەیە کو کارێ جدی ژ بۆ نڤیسینا دەستووری ھاتیە دەستپێکرن.”
سەرژمێریا ئیراق و ھەرێما کوردستانێ
سەرۆک بارزانی دەربارێ پێڤاژۆیا سەرژمێریێ یا ل ئیراق و ھەرێما کوردستانێ ژی گۆت:
“ئەم ھاتنە پشتراستکرن کو ڤێ سەرژمێریێ چ پەیوەندی ب ھەرێمێن کوردستانی یێن دەرڤەیی ئیدارەیا ھەرێما کوردستانێ نینە.
ئەگەر ژ بۆ گەشبوون و بپێشخستنا ڤان ھەرێمان سوودمەند بە، ئەز چ پرسگرێکان نابینم.
چەند خالێن نە دیار ھەبوون لێ د ئەنجاما شێور و دانووستاندنێن ل گەل بەغدایێ دە ئەڤ خال ھاتن زەلالکرن.
دڤێت سەرژمێری پشکا ھەرێما کوردستانێ یا د بودجەیێ دە بگوھەرە. ژ سەدی 12 پشکەکە نەدادپەروەر و نەوەکھەڤە.
تەڤی کو ھەرێما کوردستانێ ئەو ژی قەبوول کریە لێ دیسا ژی وەکی خوە پێشکێشی ھەرێما کوردستانێ نایێ کرن.”
پێوەندیێن ھەولێر و بەغدایێ
ل سەر پرسا “ھوون نەبوونا رەحمەتی جەلال تالەبانی د قادا سیاسی دە ھیس دکن؟” ژی سەرۆک بارزانی وھا گۆت:
“ھەلبەت وەفاتا نەمر جەلال تالەبانی د ناڤ یەکیتیا نشتمانیا کوردستانێ دە ڤالاھیەک چێکر، ئەڤ یەک پر ئەشکەرەیە.”
سەرۆک بارزانی وھا بەحسا سەردانا خوە یا بەغدایێ کر:
“سەردانا من یا بەغدایێ پشتی شەش سالان بوو. ڤێ سەردانێ گەلەک ئاستەنگێن دەروونی یێن کو بەرێ ھەبوون شکاند.
ل سەر نەخشەرێیەکێ ژ بۆ چارەسەرکرنا پرسگرێکێن جوودا ل ھەڤ کرن. دکارە بێ گۆتن کو سەردانێ کەشەکی ئەرێنی د ناڤبەرا بەغدا و ھەولێرێ دە چێکر.
نھا د ناڤبەرا ھەولێر و بەغدایێ دە ئارامی ھەیە لێ دیسا ژی پرسگرێک ھەنە کو دڤێت بێن چارەسەرکرن.
لێ ئەگەر ئیرادەیەکا باش ھەبە ئەڤ پرسگرێک ب ھێسانی تێنە چارەسەرکرن. ئەز باوەر دکم کو ئەڤ ئیرادە ھەیە.”
“ھندەک ئالی ھەول ددن دەستھلاتێن ھەرێما کوردستانێ سینۆردار بکن”
سەرۆک بارزانی دا زانین کو ل بەغدایێ ھندەک ئالی ھەول ددن دەستھلاتێن ھەرێما کوردستانێ سینۆردار بکن و دەستھلاتێن وێ یێن دەستووری کی کێم بکن و وھا دۆماند:
“دەستوورەکا مە ھەیە کو سالا 2005 ھاتیە ئامادەکرن. ھەر بریارەکا فەدەرالا نەدەستووری دێ ژ ئالیێ مە ڤە بێ رەدکرن.
د دەستوورێ دە ژی مادەیەک ھەیە کو دبێژە ئەگەر بریارێن فەدەرالی لگەل بریارێن ھەرێمێ ناکۆک بن، وێ دەمێ بریارێن ھەرێمێ دێ هێن جێبەجێکرن.”
ھنارتنا پەترۆلا کوردستانێ
ل سەر مژارا ھنارتنا پەترۆلا کوردستانێ ژی سەرۆک بارزانی گۆت:
“پەترۆل و گاز ملکێ ھەمی خەلکێ ئیراقێ نە و دڤێت ب دادپەروەری بێن پارڤەکرن.
ل بەغدایێ ھندەک کەس ھەنە کو باوەری ب دەستووری نینە و دخوازن ھەرێما کوردستانێ پشتگوھ بخن.
نھا پێشڤەچوون ھەیە و ئەم ھێڤیدارن ئەڤ پرسگرێک بێ چارەکرن.”
پێوەندیێن ئیراقێ یێن لگەل ترکیێ و ئیرانێ
پرسا “ھوون پێوەندیێن دەرڤە یێن ئیراقێ و ب تایبەتی پێوەندیێن وێ یێن ل گەل ترکیە و ئیرانێ چاوا دنرخینن؟” سەرۆک بارزانی وھا بەرسڤاند:
“سینۆرێن ئیراق و ھەرێما کوردستانێ لگەل ترکیە و ئیرانێ درێژن. ترکیە و ئیران ژی ل ھەرێمێ ئاکتۆرێن گرینگن.
ژ بۆ ڤێ ژی ئەم ناخوازن تێکلیێن خوە ب ڤان ھەر دو وەلاتان رە ئالۆز بکن.
لێ نھا، ب گشتی، د تێکلیان دە پێشڤەچوونەک گرینگ ھەیە. ئەم ھەول ددن کو لگەل ھەر دو ئالیان دیالۆگەکە ساخلەم بدۆمینن.
ئەز ھێڤی دکم کو پاشەرۆژێ پێوەندیێن مە لگەل ھەر دو وەلاتان ھین بھێزتر ببن.”
ھەبوونا پەکەکێ یا ل باشوورێ کوردستانێ
سەرۆک بارزانی پرسا “ھوون ل سەر ھەبوونا پەکەکێ ل ھەرێما کوردستانێ چ دفکرن؟ ھەر وھا ل سەر مخالەفەتا کوردا ل دژی ئیرانێ و باندۆرا وێ یا ل سەر ئەولەھیا ھەرێمێ چاوا دبینن؟” ژی وھا گۆت:
“ھەبوونا پەکەکێ ل ھەرێما کوردستانێ ژ ھەبوونا پارتیێن دن یێن کوردان یێن ل ھەرێمێ جوداترە.
پەکەکە نە تەنێ ل سەر ئەولەھیا ھەرێمێ گەفە ھەر وھا ل دژی ئالیێن دن یێن ھەرێمێ ژی تەڤدگەرە.
وەکی میناک کۆمێن مخالەفەتێ یێن کوردێن ئیرانێ ب دەھان سالن د ناڤ سینۆرێن ھەرێما کوردستانێ دە کار دکن لێ وان چ زەرەر نەدایە و یاسایێن ھەرێما کوردستانێ ژی بنپێ نەکرنە.
ئیرانێ ئەو یەک وەکی مەترسیەکا ئەولەھیا خوە دیتن و ژ بەر ڤێ یەکێ (لگەل بەغدایێ) لھەڤکرنەک چێبوو کو کۆمێن کوردان ژ سینۆر ڤەکشن.
لێ رەوشا پەکەکێ جودایە. پەکەکە دخوازە ھەرێمێ بخە بن کۆنترۆلا خوە. ئەگەر پەکەکە وەکی کۆمێن کوردێن ئیرانێ حەرەکەت بکە، چارەسەرکرنا ڤێ پرسگرێکێ پر ھێسانە.”
سەرۆک بارزانی بال کشاند سەر وێ یەکێ کو ھەرێما کوردستانێ ھەر تم پێوەندیەکە تایبەت لگەل ترکیەیێ ھەبوویە گۆت کو لگەل ئیرانێ ژی پێوەندیەکە نێزیکتر ھاتیە ئاڤاکرن.
سەرۆک بارزانی ھەر وھا تەکەز کر کو ئەو چ جاران ناخوازن نە لگەل ترکیەیێ و نە ژی لگەل ئیرانێ تێکەلیێن ئالۆز چێکن و گۆت:
“لێ ژ بۆ مە ھندەک پرەنسیبێن بنگەھین ھەنە و ئەم چ جاران ژ ڤان پرەنسیبان دوور ناکەڤن.
چ دبە بلا ببە، ئەم دێ دەستوورێ نەدن چ کەس مداخەلەیی کاروبارێن مە یێن ناڤخوەیی و بریارێن مە بکە.”
