سەرۆککۆمارێ ترکیەیێ رەجەب تەییب ئەردۆگان د جڤینا فراکسیۆنا پارتیا خوە ئاک پارتیێ دە گۆت، ناڤچە بوویە گۆلا خوینێ و ئەرکێ دەولەتێیە کو رێیێن جودا ببینە. ئەردۆگان دبێژە، دەما چەک دهێن بناخکرن، وێ دەمێ پێشیا سیاسەتێ ھەتا داوی ڤەدبە.
ئەردۆگان گۆت: “ب مەرجێ پابەندبوونا یاسایێ، پێشیا سیاسەتا سڤیل ڤەکریە. کەس نکارە رێخستنا تەرۆرێ بگرە با خوە و سیاسەتێ بکە. پشتی بانگا برێز باخچەلی کو نێرینا ھەڤپەیمانا جومھور نیشان ددە، لێ داخویانیێن ژ قەندیل و دەم پارتیێ ھێڤی نادن.”
سەرۆکۆمارێ ترکیەیێ گۆت ژی: “مە بەرێ ژی گۆتبوو، دەما وە چەک بناخ کرن، وێ دەمێ ئەم دێ پێشیا وە ڤەکن. لێ ئەگەر ھوون چەکان بناخ نەکن و بۆمبەیان بتەقینن، دەستێ دەولەتێ دگھە وە.”
ئەردۆگان گۆت ژی: “ئەم دێ وی دیوارێ تەرۆرێ ھلوەشینن کو دخوازن د ناڤبەرا ترک و کوردان دا لێکن. ئەم دێ ترکیەیا کو تەرۆر و سیاسەتا تەرۆر پشتگریێ ددەتێ لێ تونەبە، رادەستی نفشێن بێ بکن.”
ھەروھا ئاماژە ب وێ کر، “ژ دەریایا سپی ھەتا سینۆرێ ئیرانێ ئەم دێ گاڤ ب گاڤ رێرەوا ئەولەھیێ ل بەر سینۆرێ خوەیێ باشوور خورت بکن و ل وێ دەرێ پرۆژەیا سافیکرنا رێخستنێن تەرۆرێ بگھینن ئەنجامێ.”
ل ئالیێ دن، سەرشێورمەندێ سەرۆککۆمارێ ترکیەیێ محەمەد ئوچوم پشتی بانگا دەولەت باخچەلی راگھاند، یان چەک دێ هێن دانان، یان سیبەرێن سیاسەتا یاسایی ژی دێ ژ ھۆلێ رابن.
ئوچوم ھەر وھا گۆت، دەولەت پێویست ببینە ھەڤدیتنا دەم پارتی و ئۆجالان دبە، لێ یا گرنگ ناڤەرۆکا ھەڤدیتنێ چیە؟ سیاسەتمەدارێن دەم پارتیێ ژی بالێ دکشینن ل سەر ناکۆکیێن پرۆسەیێ کو ژ ئالیەکێ ڤە تێ خوەستن ئۆجالان پەیام بدە، ژ ئالیێ دن تەجرید بەردەوامە ھەروھا دانینا قەیوومان ژی ب لێگەرینێن ئاشتیێ رە ناگونجن.
