گرووپێن چەکداران یێن سەر ب ترکیەیێ ڤە ژ سەرێ سبێ ڤە ئێریشی تلرفعەتێ و گوندێن هەرێما شەهبایێ یێن ل باکورێ حەلەبێ د دەستێ یەکینەیێن پاراستنا گەل (یه‌په‌گێ) دە نە، دکن.
ژێدەرێن تایبەت ژ تلرفعەتێ ژ ک24ێ رە گۆتن، گرووپێن چەکداران یێن سەر ب ترکیەیێ ڤە ژ سەرێ سبێ ڤە ئێریشی تل رفعەتێ و گوندێن هەرێما شەهبایێ دکن.
مەدیایا سەر ب رێڤەبەریا خوەسەر ژی بەلاڤ کر، ل سەر خەتا هەربل، زیوان، رادار، شەئالێ و سەمووقا یێن ل شەهبایێ، شەر و پەڤچوونێن گران دەرکەتنە.
ئەڤ یەک پشتی وێ تێ، دەستەیا تەحریر ئەل-شامێ و هەڤالبەندێن وێ دوهی کەت باژارێ حەلەبێ و پرانیا تاخێن باژێر خستن بن کۆنترۆلا خوە و هەول ددن تاخێن ئەشرەفیە، شێخ مەقسوود و هن تاخێن دن یێن کو ل باکورێ حەلەبێ د دەستێ یه‌په‌گێ دە مانە، دۆرپێچ بکن و رێیا د ناڤبەرا وان تاخان و هەرێما شەهبایێ دە ل دەڤەرا مسلمیێ بگرن و قوت بکن.
ب قوتکرنا ڤێ رێیێ رە، باژارۆکێ تلرفعەتێ، هەر دو باژارۆکێن شیعەنشین نبول و زەهرائا و گوندێن هەرێما شەهبایێ ب تەمامی ژ ئالیێ گرووپێن چەکداران ڤە تێن دۆرپێچکرن و ب مەترسیەکە جدی رە رووبروو دمینن.
پشتی ڤەکشینا هێزێن رێژیما سووریەیێ و ملیسێن وان ژ هەر دو باژارۆکێن شیعەنشین یێن نبول و زاهرائایێ، یه‌په‌گه دوهی دەرباسی وان هەر دو باژارۆکان بووبوو.
باژارۆکێ تلرفعەت و هەرێما شەهبایێ د ناڤبەرا هەرێما عەفرین و حەلەبێ دە نە و د دەستێ یەکینەیێن پاراستنا گەل (یه‌په‌گێ) دە نە. ژ دەما داگیرکرنا عەفرینێ ژ ئالیێ ئارتێشا ترکیێ و گرووپێن چەکدارێن سەر ب وێ ڤە د ئادارا 2018ان دە، دۆرا 150 هەزار عەفرینی ل 5 کامپان و ل گوندێن وێ هەرێمێ بجهـ بوونە. هەروه‌ها هن خالێن هێزێن رێژیما سووریەیێ و هێزێن رووسی ژی ل وێ هەرێمێ هەبوون.
