روونشتنا یەکێ یا گەرا شەشێ یا پەرلەمانێ کوردستانێ ئیرۆ (دوشەمبێ، 2/12/2024) ب رێ ڤە دچە. ل گۆر کارنامەیێ، ئەو روونشتن بەری نیڤرۆ تێ دەستپێکرن و سەرۆکێ دیوانا پەرلەمانی ئەردەلان محەمەد سەرسپی دێ روونشتنێ ب رێ ڤە ببە. ھەروەسا پاشتر ژی کاندیدێن نووھلبژارتی ژ ئالیێ سەرۆکێ پەرلەمانێ ڤە ژ بۆ سۆندخوارنێ تێن گازیکرن.
ھۆلا روونشتنێ یا پەرلەمانێ ئامادەیە، پرۆتۆکۆلا پەرلەمانی ژی ب ھەمی ئاوایان ھاتیە ئامادەکرن. ئەڤ ژ بۆ جارا یەکێیە ل گەرا شەشێ یا پەرلەمانا کوردستانێ بەری دەستپێکرنا کاری یا کاندیدان، سەنتەرێ لێکۆلینێ یێ پەرلەمانێ رێبەرەکە کاری یا پەرلەمانێ پارڤە دکە، ژ بۆ شارەزابوونا ئەندامێن پەرلەمانێ ل سەر کارێ پەرلەمانێ و کارێ یاسادانانێ. ھەروەسا لژنەیەک ژی ژ بۆ پێشوازیا کاندیدێن نووھلبژارتی ھاتیە پێکانین.
ل گۆر پەیرەوێ ناڤخوەیێ پەرلەمانی، د روونشتنا یەکێ دە ب تەمەنترین سەرۆک دکارە دەریێ خوەکاندیدکرنێ ژ بۆ دەستەیا سەرۆکاتیا پەرلەمانی ڤەکە.
کارنامەیا پەرلەمانێ کوردستانێ ژ چار بەندان پێک تێ:
یەک: ڤەکرنا وێ روونشتنێ ب چەند ئایەتێن قورانا پیرۆز.
دو: دەقیقەیەک راوەستیان وەکی رێزگرتن ل جانێ پاکژێ شەھیدێن کوردستانێ.
سێ: گازیکرنا بەمرترین کاندیدێن ئامادەبوویی ژ کاندیدێن نووھلبژارتی یێن گەرا شەشێ یا ھلبژارتنێن پەرلەمانێ کوردستانێ ژ ئالیێ سەرۆکێ دیوانا پەرلەمانی ڤە، ژ بۆ سۆندخوارن و برێڤەبرنا وێ روونشتنێ؛ ل گۆر حکمێ بەندا دویێ یا مادەیا 11 و بەندا یەکێ یا مادەیا 12 ژ پەیرەوێ ناڤخوە یێ پەرلەمانی.
چار: سەرۆکێ روونشتنا یەکێ یا گەرا شەشێ یا پەرلەمانێ کوردستانێ کاندیدێن نووھلبژارتی ژ بۆ گەرا شەشێ یا پەرلەمانێ کوردستان – ئیراقێ ژ بۆ سۆندخوارنا قانوونی گازی دکە، ل گۆر حکمێ بەندا دویێ یا مادەیا 12 ژ پەیرەوێ ناڤخوە یێ پەرلەمانێ کوردستانێ. پاشی ئەو روونشتن ژ ئالیێ سەرۆکێ روونشتنا یەکێ ڤە ل گۆر حکمێ مادەیێن پەیرەوێ ناڤخوە یێ پەرلەمانێ کوردستانێ تێ برێڤەبرن.
