ب ده‌هان هه‌زار کۆچبەرێن عه‌فرینی یێن ژ 2018ان ڤە ل هەرێما شەهبایێ بجیهـ ببوون، ژ دوهی ڤە ل وێ ناڤچەیێ ئاسێ مانە و رێ ل بەر وان هاتنە گرتن.
پشتی شەر و پەڤچوونێن توند د ناڤبەرا هێزێن یەکینەیێن پاراستنا گەل (یه‌په‌گێ) یا سەر ب هه‌سه‌دێ ڤە و چەند هێزێن چەکدارێن سەر ب ترکیەیێ ڤە، گرووپێن چەکداران کەتن تل رفعەتێ و هەرێما شەهبایێ یا ل باکورێ حه‌له‌بێ.
پشتی کەتنا گرووپێن چەکداران و ڤەکشینا هێزێن یه‌په‌گێ، ب ده‌هان هه‌زار کۆچبەرێن عه‌فرینێ ژ دوهـ ئێڤارێ ڤە ل وێ هەرێمێ ئاسێ مانە و گرووپێن چەکداران رێیا حه‌له‌بێ و رێیا عه‌فرینێ ل بەر وان هاتیە گرتن.
باژارۆکێ تل رفەت و هەرێما شەهبایێ د ناڤبەرا هەرێما عه‌فرین و حه‌له‌بێ دەنە و د دەستێ یه‌په‌گێ دەنە. ژ دەما داگیرکرنا عه‌فرینێ ژ ئالیێ ئارتێشا ترکیێ و گرووپێن چەکدارێن سەر ب وێ ڤە د ئادارا 2018ان دە، دۆرا 200 هەزار کۆچبەرێن عه‌فرینی ل 5 کامپان و ل گوندێن وێ هەرێمێ بجهـ بوونە.
ئەڤ یەک پشتی وێ تێ، دەستەیا تەحریر ئەل-شامێ و هەڤالبەندێن وێ دوهی کەتن باژارێ حه‌له‌بێ و پرانیا تاخێن باژێر خستن بن کۆنترۆلا خوە و هەول ددن تاخێن کوردان، ئەشرەفیە، شێخ مەقسوود و هن تاخێن دن یێن کو ل باکورێ حه‌له‌بێ د دەستێ یه‌په‌گێ دە مانە، كۆنترۆل بکن.
دوهی دەستەیا تەحریر ئەل-شامێ داخویانیەک بەلاڤ کر و تێ دە بانگ ل هێزێن یه‌په‌گێ و هه‌سه‌دێ کر کو ب چەکێن خوە ژ وان هەر دو تاخان ڤەکشن. پشتی وێ داخوازا چەکداران، رەوشا هەر دو تاخێن کوردان ئەشرەفیە و شێخ مەقسوود ژی تەڤلیهەڤە و کوردێن وێ د ناڤا مەترسیێ دە نە.
