یه‌په‌گێ ده‌هان هه‌زار كوردێن عه‌فرینێ ل ژێر ره‌حما چه‌ته‌یێن ته‌كفیری هشتن
هێزێن یه‌په‌گێ و هه‌سه‌دێ «باسكێن په‌كه‌كێ ل رۆژئاڤا كوردستانێ»، ده‌هان هه‌زار كۆچبه‌رێن عه‌فرینێ و شێنیێن كورد ل هه‌رێمێن تلرفعه‌ت، شه‌هبا، تاخێن شێخ مه‌قسوود و ئه‌شره‌فیێ ب ته‌نێ ل ژێر ره‌حما چه‌ته‌یێن «هه‌یئه‌ت ته‌حریر ئه‌لشام» هشتن، یه‌په‌گێ وه‌كه چاوا ل 2018ان عه‌فرین ژ بۆی داگیركه‌ران هشتی، ئیرۆ جاره‌كه دن خه‌لكێ عه‌فرینێ یێ كو ژ ده‌ما داگیركرنێ ڤه كۆچبه‌ر بووی، بۆ چاره‌نووسه‌كه نه‌دیار هشت، یه‌په‌گه و هه‌سه‌ده بێ شه‌ر ژ وان هه‌رێمان ڤه‌كشیان.
گه‌لۆ ڤه‌كشینا یه‌په‌گێ دهێته واته‌یا خیانه‌تا ل گه‌ل؟
ئه‌ڤ ده‌ما 6 رۆژانه ملیسێن هه‌یئه‌ت ته‌حریر ئه‌لشام ئێریشی حه‌له‌بێ و حه‌مایێ دكن، هه‌ر كو دچه شه‌ر به‌رفه‌ره‌هـ دبه، د ناڤا سێ رۆژێن ئه‌ول ده ملیس كه‌تن تلرفعه‌تێ و هه‌رێما شه‌هبایێ، یه‌په‌گێ ئه‌ڤ ده‌ر بێی كو ت به‌رخوه‌دانه‌كێ بكه، راده‌ست كرن و ژ وان هه‌رێمان ڤه‌كشیان.
ل گۆری ئاگاهیێن داركا مازی ژ چاڤكانیێن خوه یێن رۆژئاڤا گرتنه، یه‌په‌گه ل سه‌ر بانگا ملیسێن ته‌حریر ئه‌لشام ب چه‌كێن خوه ڤه ژ هه‌رێمێن تلرفعه‌ت، شه‌هبا و هه‌روها تاخێن شێخ مه‌قسوود و ئه‌شره‌فیێ ڤه‌كشیان و ب ده‌هان هه‌زار كوردێن عه‌فرینێ یێن كو ژ سالا 2018ان ڤه كۆچبه‌ری وان هه‌رێمان بووبوون، ل ژێر ره‌حما ملیسێن ته‌كفیری هشتن.
چاڤكانیێن مه ئاشكه‌ره كرن، ته‌ڤی كو رێڤه‌به‌رییا خوه‌سه‌ر و فه‌رماندارێ گشتی یێ هه‌سه‌دێ دوهـ سه‌فه‌ربه‌رییا گشتی راگهاند و بانگا چه‌كلهه‌گرتنا گشتی كرن، لێ ب فه‌رمانا راسته‌راست یا قه‌ندیلێ و ل سه‌ر بانگا ملیسان ئه‌و ژ دوهـ ڤه د ناڤا چه‌ند ساعه‌تان ده ژ وان هه‌رێمان ڤه‌كشیان و نێزی 200 هه‌زار كۆچبه‌رێن كورد كو پرانی ژێ یێن عه‌فرینێ نه ل وان هه‌رێمان ب ته‌نێ هشتن.
یه‌په‌گێ ژ خه‌لكێ ره گۆت چاره‌نووسا مه یه‌كه، لێ شه‌ڤا بووری ئه‌و ب بێده‌نگی ڤه ڤه‌كشیان!
ل گۆری ئاگاهیێن ده‌ستێ مه، چەکدارێن یه‌په‌گێ خەلک خاپاندن و ژ وان رە گۆتن کو چارەنڤیسا وان یەکە، لێ پشترە شەڤا بۆری ب بێدەنگی ئەو دەڤەر ژ چەکدارێن ئۆپۆزسیۆنا سووریێ ره ڤالا کرن و د ئەنجامێ دە زێدەتری 200 هەزار وەلاتیێن عەفرینێ ژ بۆ چارەنڤیسەکە نەدیار هشتن.
ل گۆری ئاگاهیان، ترس کەتیە ناڤا پەنابەرێن كورد یێن كو نها ژ ئالیێ چەکدارێن ئۆپۆزیسیۆنا سووریێ و ئەنجوومەنا رزگاریا سووریێ ڤە هاتنە دۆرپێچکرن.
کوردێن کو عەفرینێ كۆچبه‌ری شەهبایێ بوونە نها د بن خەتەرێ دە نە، ئه‌و ژ كامپێن خوه ده‌ركه‌تنه و ملیسێن ته‌حریر ئه‌لشام ده‌ستوور ب وان ناده‌ن كو ژ هه‌رێمێن شه‌ر ده‌ركه‌ڤن.
ئارتێشا ده‌وله‌تا ترك و ملیسێن كو پشتگریێ دده وان، ل ده‌ستپێكا سالا 2018ان ئۆپه‌راسیۆنا داگیركرنا عه‌فرینێ ب ناڤێ «چقلێ زه‌یتوونێ» ده‌ستپێكر و د كێمتری دو مه‌هان ده هه‌رێما عه‌فرینێ داگیر كر، رێخستنا په‌كه‌كێ و هێزێن گرێدای وێ ئه‌ڤ باژار ژ بۆ تركیێ هشت.
ل گۆری ئامارێن فه‌رمی یێن نه‌رینگه‌ها سووریێ یا مافێن مرۆڤان نێزی 300 هه‌زار شێنیێن عه‌فرینێ و ده‌ردوورا وێ كۆچبه‌ری هه‌رێمێن تلرفعه‌تێ و شه‌هبایێ بووبوون، كوردێن كو ل عه‌فرینێ ژی مایی رۆژانه سته‌م و زۆرییا میلیسێن تركیێ ژیان دكرن.
ئه‌ڤ ڤه‌كشین دشبهه پێڤاژوویا 2014ان ل شه‌نگالێ
ئه‌ڤ ره‌وشا كو نها ل رۆژئاڤا تێ ژیان كرن و پرسا ڤه‌كشینا هێزێن یه‌په‌گێ و هه‌سه‌دێ دشبهه پێڤاژۆیا 2014ان ده‌ما پێشمه‌رگه ل شه‌نگالێ پێشیا ته‌رۆرا داعشێ گرتی، شه‌ر كری، ل به‌ر خوه دای و شه‌هید داین و به‌شا هه‌ری زۆرا شێنیێن ئێزدی ژ زوورا داعشێ رزگار كری، لێ په‌كه‌كێ د گۆ پێشمه‌رگه ڤه‌كشیا و بازدا!
د وێ ده‌مێ ده په‌كه‌كێ ته‌ڤ مه‌دیایا خوه سه‌فه‌ر به‌ر كر كو پێشمه‌رگه‌ی وه‌ك هێزه‌كه شكه‌ستی نیشان بده و نووچه‌یێن ب سه‌ر ناڤێن «پێشمه‌رگه ل شه‌نگالێ ره‌ڤیا و بازدا» د وه‌شاندن، چاپه‌مه‌نییا رۆژئاڤا كوردستانێ ژی كو خوه د چارچووڤه‌یا مه‌دیایا په‌كه‌كێ ده دبینه هه‌مان هه‌لوه‌ست هه‌بوو.
شێنیێن باشوور وێ ت جاری ژبیر نه‌كن وه‌ختا كو «به‌فرینكا گه‌نی» ئا نووچه‌گهانا رۆناهی تی ڤی د ناڤا شه‌نگالێ ده دیمه‌ن د وه‌شاندن و ژ ده‌ره‌و دگۆ: «پێشمه‌رگه ل شه‌نگالێ ره‌ڤیا»!.
پرسا سه‌ره‌كه ل ڤر ئه‌ڤه گه‌لۆ چما ده‌ما پێشمه‌رگه ژ به‌ر هه‌ڤسه‌نگی و دوباره به‌لاڤه‌كرنا هێزێ و دانینا سه‌نگه‌ران ل شه‌نگالێ و پشتی كو به‌شا هه‌ری زۆر شێنییان رزگاركری ڤه‌كشیایی ئه‌ڤ دبه ره‌ڤین و بازدان، لێبه‌لێ ڤه‌كشینا كو نها هه‌سه‌ده و یه‌په‌گه ئه‌نجام دده دبه له‌هه‌نگی، قه‌هره‌مانی، جانفیدایی و وه‌لاتپارێزی، گه‌لۆ ما دبه ئێڤاری سه‌فه‌ربه‌ری وه‌ره راگهاندن و یه‌په‌گه بانگی گه‌ل بكه كو چه‌كان هه‌لگرن و ژ وان ره ببێژن چاره‌نووسا مه یه‌كه و پاش چه‌ند ساعه‌تان وان د تاریاتیێ ده ل به‌ر ره‌حما چه‌ته‌یێن ته‌حریر ئه‌لشام بهێلن؟!!.
