شارەداریا باژارێ مەزن یا وانێ راگھاند، ئیدیعایێن کو دبێژن ھەڤشارەدار عەبدوللاھ زەیدان ژ کار ھاتیە دوورخستن و ل شوونا وی قایمەقام ھاتیە دانان، نە راستن.
شارەداریا باژارێ مەزن یا وانێ، دەر بارێ ئیدیعایێن کو ل سەر ھندەک حەسابێن مەدیایا جڤاکی ھاتن پارڤەکرن کو دبێژن ھەڤشارەدار عەبدوللاھ زەیدان ژ وەزیفەیێ ھاتیە گرتن و ل شوونا وی قەیووم ھاتیە دانان، داخویانی دا.
د داخویانیێ دە ھات گۆت: “ژ ھێلا ھندەک حەسابێن مەدیایا جڤاکی و قەستی ڤە ل سەر بنگەھا بەلگەیەک خەلەت، ئاگاھیێن کو ھەڤشارەدارێ شارەداریا باژارێ مەزن یا وانێ عەبدوللاھ زەیدان ژ کار ھاتیە دوورخستن و ل شوونا وی ژی قەیووم ھاتیە دانان تێن بەلاڤکرن. ئەم رادگھینن کو ئەڤ ئاگاھی نە راستن و بەلگە ژی خەلەتە و ئەم ژ گەلێ خوە دخوازن کو باوەری ب ڤان بەلاڤۆکێن خەلەت نەینن.”
شارەداریا باژارێ مەزن یا وانێ گۆت: “دڤێت باش وەرە زانین کو ئارمانجا ڤان بەلاڤۆکێن وھا، تەڤلیھەڤکرنا ھشێ گەل و چێکرنا شکێ د نییەتا خوەدیدەرکەتنا ل ئیرادەیا راستین دەیە. ھەڤشارەدارێن مە ل سەر کارێ خوە نە و ب ھەموو ھەول و ھێزا خوە ڤە خەباتێن خوە ددۆمینن.”
عەبدوللاھ زەیدان د ھلبژارتنێن 31 ئادارێ دە زێدەتری سەدی 50 دەنگ وەرگرتبوو و بووبوو شارەدارێ وانێ. لێ ب ھنجەتا کو مافێ وی یێ بەشداربوونا ھلبژارتنێ نینە، پەسەندنامە نەھاتبوو دایین. پشتی خوەپێشاندانێن مەزن، کۆمسیۆنا بلند پۆستێ سەرۆکاتیا شارەدارییێ رادەستی عەبدوللاھ زەیدان کر.
