ناڤەندا راگھاندنێ یا ھێزێن سووریەیا دەمۆکراتیک (ھەسەدە) رەد دکە کو ھێزێن وێ ل گوندەوارێ رۆژھلاتێ حەلەبێ ب پێش دە دچن.
ناڤەند راگھاندنێ یا ھەسەدێ د داخویانیەکێ دە راگھاند، “ھن دەزگەھێن راگھاندنێ یێن دژبەر ئاگاھی بەلاڤ کرنە کو ھێزێن مە بەر ب ھەرێمێن رۆژھلاتێ حەلەبێ ڤە ب پێش دە دچن. ئەم تەکەز دکن کو ئەڤ ئاگاھی نە راستن.”
ئاشکەرە کر ژی: “ت گوھەرتن د نەخشەیا لەشکەری یا بەلاڤبوونا ھێزێن مە دە چێنەبوویە. ھێزێن مە د دو رۆژێن داوین دە بەرسڤا گەلەک ئێرشێن چەتەیێن دەولەتا ترکیەیێ ل سەر ھەرێمێن د بن کۆنترۆلا مەجلسا لەشکەری یا منبجێ و مەجلسا لەشکەری یا تەبقایێ دە دان. د ئەنجامێ دە ھەژمارەک کوشتیێن چەتەیان چێبوون و ھنەک جەنازەیێن وان کەتن دەستێ شەرڤانێن مە.”
ھات راگھاندن، ھێزێن ھەسەدێ ل گوندەوارێ رۆژھلاتێ حەلەبێ پشتی پەڤچوونێن لگەل گرووپێن چەکدار یێن سەر ب ترکیەیێ، کاری ھن خالێن ل نێزیکی فرۆکخانەیا کوێرس و وێستگەھا بابیر یا ئاڤێ و باژارۆکێ خفسێ کۆنترۆل بکە.
گرووپێن چەکدارانێن سەر ب “ئارتێشا نشتمانی”یا ئۆپۆزیسیۆنا سووریەیێ رۆژا 2 بەرچلە د ئۆپەراسیۆنەکێ دە، کارین باژارۆکێ تل رفعەت و ھەرێما شەھبایێ ل باکورێ حەلەبێ و باژارۆکێن ئەل-سافرا، خەناسەر و فرۆکەخانەیا لەشکەری یا کوێرسێ ل گوندەوارێن رۆژھلاتێ حەلەبێ کۆنترۆل بکن.
