رەوانگەها سووری بۆ مافێن مرۆڤان (سۆهر) بەلاڤ کر، گرووپێن چەکدارێن سەر ب ترکیەیێ ڤە ل باژارێ منبجێ کوردان ل سه‌ر ناسنامەیێ دکوژن و مال و ملکێن کوردان کو هەژمارا وان نێزیکی 30 هەزار مالباتانە، ددزن و تالان دکن.
گرووپێن چەکداران یێن سەر ب ترکیەیێ ڤە چەند رۆژن دەرباسی ناڤا باژارێ منبجێ بوونە و پشتی شەر و پەڤچوونێن گران د ناڤبەرا وان و شەرڤانێن ئەنجوومەنا لەشکەری یا منبجێ دە، هەژمارەک ژ تاخان کۆنترۆل کرنە.
ل گۆری زانیاریێن رەوانگەهێ، چەکداران ل تاخا نەواجە، ئەل-ئەسەدیە و رێیا جەزیرێ دەست ب کریارێن تۆلهلدانێ کرنە، مال و ملکێن وەلاتیان ددزن و تالان دکن، پشرە مالان دشەوتینن.
دا زانین ژی، 3 کەس کو د ناڤا وان دە ژنەک هەبوو، ل باژارێ منبجێ ژ ئالیێ گرووپێن چەکداران ڤە هاتن کوشتن.
ئاماژە ب وێ ژی کر، 10 وەلاتیێن سڤیل د ئەنجاما تۆپبارانا هێزێن ترکیەیێ ل سەر گوندێ زەرفانێ رۆژهلاتێ منبجێ دە هاتن کوشتن.
رەوانگەها سووری بۆ مافێن مرۆڤان دا زانین ژی، ب شەر و پەڤچوونان رە، هەژمارەک مەزن ژ خەلکێ منبجێ بەر ناڤچەیێن رۆژهلاتێ فراتێ ڤە کۆچبەر دبن.
پشتی کو هەیئەت تەهریر ئەل-شامێ و هەڤالبەندێن رۆژا 27ێ مژدارا بۆری دەست ب ئۆپەراسیۆنا ل سەر حەلەبێ کر، گرووپێن چەکداران یێن سەر ب ئارتێشا نشتمانی یا ئۆپۆزیسیۆنا سووریەیێ یا کو ترکیە پشتەڤانیا وێ دکە، رۆژا 30ی مژدارێ دەست ب ئۆپەراسیۆنا «بەربانگا ئازادیێ» ل دژی تل رفعەت، گوندێن هەرێما شەهبایێ و منبجێ کر.
