د 23ێ تیرمەها سالا 2023 دە ل جادەیا سەرەکە یا زاخۆ د ئەنجاما تەقاندنا بۆمبەیا ژ دوور ڤە یا کو د ناڤ ئۆتۆمۆبیلا وی دا هاتبوو بجیهکرن، سەرلەشکەر محه‌مه‌د میرزا سۆفی شەهید بوو. ئاساییشا گشتی یا هەرێما کوردستانێ بەلگەیێن کو چ شک و گومان ل سەر ڤێ جینایەتا کو په‌كه‌كێ پێک ئانیە نه‌هشتن، بەلاڤ کرن. لێ بەلێ وەکە هەرجار پەکەکێ د مەدیایا خوە دە راگهاند وان ئەڤ کارە ئەنجام نەدایە.

پشتی دەرباس بوونا سالەک و 5 مەهان ل سەر تەرۆر کرنا محەمەد میرزا، پەکەکێ د مەدیایا خوە یا ب ناڤێ چرا تیڤی دە دانپێدان ب کوشتنا محەمەد میرزا کر، لێ سەناریۆیەک دارشتیە کو تێ دە خوە مافدار دیار دکە کو ئەڤ تەرۆر پێک ئانیە.

پەکەکێ ژ بۆی کو هێنجەتان ژ بۆی ڤێ تەرۆرا خوە دروست بکە و هەر وەها بکارە ب ڤێ یەکێ د هلبژارتنێن پارلامانتۆیا کوردستانێ دە دربەیەکێ ل پەدەکێ و دەنگێن وێ بدە، سەناریۆیەک پڕ قرێژ و گەمار چێکر کو د ڤێ سەناریۆیێ دە یەک ژ کادرۆیێن خوە یێن بەرێ دەستەسەر کریە و ب رێیا وی خوەست روویێن خوە یێن رەش ب دەرەوان سپی بکە و سەدەما تەرۆرکرنا محەمەد میرزا ب سیخورتیا ژ بۆی میتێ ڤە گرێ بدە.

چرا تیڤی کو کانالەکە تەلەفزیۆنی یا تایبەت ب شێنیێن شەنگالێ یە، د 17/10/2024 دە ئانکو ب تەنێ 8 رۆژان پێش دەنگدانێن پارلامانتۆیا کوردستانێ، دانپێدانێن ولاتیەکی ئێزدی یێ ب ناڤێ “شەفیق جونو سعدو” پارڤە کر، شەفیق یەک ژ چەکدارێن یەبەشێ یە کو پەکەکێ د مەها بەرچلە یا سالا 2018 دە ب سووچا سیخورتیا ژ بۆی پەدەکێ و میتا ترکیەیێ دەستەسەر کریە.

سەناریۆیا پەکەکێ یا د چرا تیڤی دە چەوا بوو؟

د “دانپیدان”ێن خوە یێن د چرا تیڤیێ دە شەفیق باسی تێکلیێن خوە یێن ب محەمەد میرزا رە دکە و دبێژە؛ محەمەد میرزا ل همبەر سیخۆریکرنا ل سەر پەکەکێ هەر جارێ 400-500 دۆلار ب وی دانە، هەر وەها د 15/8/2018 دە ل سەر فەرمانا محەمەد میرزا ل باژارۆکێ سنوونێ چوویە سینۆرێ گوندێ کۆچۆ ژ بۆی کو ئامادەبوونا زەکی شەنگالی، ئەندامێ کۆنسەیا کەجەکێ ل وێ دەرێ تەکەز بکە، ل ور تەڤی تەکەزکرنا ل سەر ئامادەبوونا زەکی شنگالی هەر وەها وێنەیێ وەساییتا وی ژی کشاندیە و ژ محەمەد میرزا رە شاندیە، پشترە زەکی شنگالێ ژ ئالیێ درۆنەکە ترکیەیێ ڤە هاتیە هەدەف گرتن، لۆما د وێ دەمێ دە فێم کریە محەمەد میرزا تێکلی ب میتێ رە هەیە”.

هەر وەها شەفیق د “دانپێدان”ێن خوە دە دبێژە؛ “گەر من بزانیبایە ئاگاهیێن ئەز دشینم وێ محەمەد میرزا ژ میتێ رە بشینە و زەکی شەنگالی وەرە شەهید کرن، ب ت ئاوا من وسا نەدکر”.

پشتی سەناریۆیا دانپێدانێن ڤی کادرۆیێ پەکەکێ، هەر د هەمان بەرنامەیا چرا تیڤی دە باسی چەوانیا تەرۆرکرنا محەمەد میرزا ل زاخۆیێ تێ کرن و ڤێ یەکێ وەکە تۆلهلدانا زەکی شنگالی پەرچاڤ دکن، ئەڤ د دەمەکی دە یە کو د سالا 2023 دە پەکەکێ ب داخویانیەکێ راگهاندبوو تەرۆر کرنا محەمەد میرزا نە کارێ وانە.

چما پەکەکێ ئەڤ سەناریۆ چێکر؟

پەکەکێ ب سەناریۆیا دانپێدانێن یەک ژ کادرۆیێن خوە دو مەبەستێن سەرەکە هەبوون؛

1. ب ڤێ سەناریۆیا ئیستخباراتی بکارن ئێزدیان ل دژی پەدەکێ هان بدن و وسا نیشان بدن، دەستێ پەدەکێ د کوشتنا زەکی شەنگالی دە هەبوویە.

2. راپۆرا چرا تیڤیێ ب تەنێ 8 رۆژان پێش هلبژارتنێن پارلەمەنتۆیا هەرێما کوردستانێ وەکە پرۆپاگاندایا هەلبژارتنان ل دژی پەدەکێ هات پارڤەکرن دا کو ب ڤێ یەکێ دەنگێن پەدەکێ کێم ببن.

شەفیق د سالا 2018 دە هاتیە دەستەسەرکرن، ل خوە موکرهاتنا وی ژی د سالا 2024 دە هات پارڤەکرن، ئەڤ ب تەنێ دەرەوەکە پەکەکێ و سەناریۆیەکە قرێژ بوو ل دژی پەدەکێ.

د دەما کوشتنا زەکی شنگالی دە چرا تیڤیێ چەوا باسی بوویەرێ کربوو؟

تێلەفزیۆنا چرا تیڤی یا سەر ب پەکەکێ د دەما کوشتنا زەکی شەنگالی د 15/8/2018 دە راگهاندبوو، پێش کو بالەفرێن ترکیێ وەرن و وەساییتا زەکی شنگالی هەدەف بگرن، ئۆتۆمبێلا «زەکی شنگالی» ژ ئالیێ کۆپتەرێن ئیراقێ هاتبوو تەعقیب کرن، به‌را باله‌فرێن ترکیێ ئێرشێ ل سەر ئۆتۆمبێلا «زەکی شنگالی» بك‌ن دیمەنێن وەساییتا وی ژ ئالیێ کۆپتەرێن ئیراقێ ڤە ژ بۆی میتێ هاتبوون شاندن.

راستیا تەرۆرکرنا محەمەد میرزا چەوا بوو؟

په‌كه‌كێ و پێکهاتەیێن وێ پشتی تێکچوونا خوە یا د هلبژارتنێن باکورێ کوردستانێ و ترکیێ دە، هەر تم دخوەست رۆژەڤێ ب گوهه‌رن و کوردان ب مژارێن تێگەهـ ئاڤاکرنێ ڤە مژوول بکن. ب ڤی ئاوایی دخوەست بنکەتنا خوە ڤەشێرە. د ڤێ چارچۆڤەیێ دە په‌كه‌كێ زێدەتر بەرێ خوە دا کوردان. په‌كه‌كێ ب هنه‌ك رێبازێن خیانه‌ت و بێبەختیێ یێن وه‌كه‌ جینایەتا تەرۆرکرنا محەمەد میرزا ل زاخۆ و هه‌روه‌ها ژ بۆ كو ئالۆزیێن ناڤخوەیی زێدەتر بكه‌، زەختێن دەروونی چێبکە و خه‌لكی بترسینە ئەڤ کارێ بێبەختانە ئەنجام دا.