کورد و تایبەتی ئالیێن سیاسی ل رۆژئاڤایێ کوردستانێ ل ھمبەر بەرپرسیاریەک دیرۆکی نە. سیاسەتا پەکەکێ نە ل ھەرێما کوردستانا رۆژئاڤا، لێ ل دەڤەرێن وەک دێرەزۆرێ و جھێن دن کو نە کوردستانی نە شەر دکە و ھەولددە ل بەرخوە بدە. لێ ئەڤ یەک دبە سەدەما تێکچوونا ھەسەدێ و ب دەھان شەرڤانێن کورد ژیانا خوە ژ دەست ددن.
گەرەک بێ زانین کو، ھەر ئالیەک یان دەزگەھێ کو، ستوویێ خوە ژ بۆی سیاسەتا پەکەکێ بتەوینە دێ ل ھمبەر کوشتن و تالانکرنا کوردا بەرپرسیار بە. پەکەکە بەحسا چەتەیێن چەکدارێن ترکیێ ڤە گرێدایی دکە و د مەدیا خوە دە بانگا پشتگریێ دکە. ھەر رۆژ خوەپێشەدانەکی ل وەلاتێن ئەورۆپا و ھەرێمێن د بن دەستێ خوە دە دکە. ئەڤ پرۆپاگاندەیەکا ڤالایە. پەکەکە ل گەل دەزگەھێن دەولەتا ترک د ناڤا ھەماھەنگیەکی دەیە. ژ ئالیەکی ڤێ یەکێ دکە ژ ئالیەک دن نە ل بەر تشتەکی دە بەرێ زارۆکێن خەلکێ ددە کوشتنێ.
گەلۆ سبەھی سەرۆکێ پەکەکێ، ئۆجالان ل گۆرا داخوازیا دەولەتێ بانگەکی بکە، دێ رەوش چەوا بە؟ دێ ھنگێ ژی پەکەکە بەحسا دەولەتا ترک بکە؟ باوەر بکن دێ ئەو ب خوە دەوسا ڤان چەتەیێن بەحسا وان دکن بگرن و تەرۆرێ ل دژێ کوردان پێکبینن.
ئەڤجا یا راست ئەوە کو، ل رۆژئاڤایێ کوردستانێ ھێزێن گرێدایی ھەسەدێ/یەپەگێ ب بریارەک رادیکال خوە ژ ھەموو دەڤەرێن کو، نە کوردستانە ڤەکشن و پەیەدە بانگا یەکیتیا ناڤ مالا کورد بکە. بلا ئەنەکەسە و پەیەدە یەکتیا خوە یا سیاسی راگھینن و یەپەگە و پێشمەرگەیێن رۆژ ببن یەکدەست و خاکا کوردستانێ بپارێزن. دێ ھنگێ جیھان و دەولەتێن وەک ئامەریکا و ھەموو بەشێن کوردستانی ب گەرمی پشتگریا وان بکن و دێ سەربکەڤن. دێ ھنگێ ل رۆژئاڤایێ کوردستانێ ببن خوەدێ ستاتوویەک کوردستانی و د بن سێبەرا ئالا کوردستانێ دە خاکا خوە بپارێزن.
ژ ڤێ پێڤە چ رێ ل پێشیا کوردێن رۆژئاڤایێ کوردستانی تونەیە. ئەڤ یەک نە تەنێ ژ بۆ رۆژئاڤایێ کوردستانێ ھەروەھا ژ بۆ ھەموو بەشێن کوردستانێ گەلەکی گرینگە.
ئەگەر پەیەدە ڤێ بەرپرسیاریا دیرۆکی پێک نەینە، دێ د تاریتیا سیاسەتا پەکەکێ دە ڤەمرە و ببە سەدەمێ تێکچوونا تەڤگەرا ئازادیخواز ل رۆژئاڤایێ کوردستانێ. ئەڤ رەوشا کو ئیرۆ دەستدایی ژ بۆ رۆژئاڤایێ کوردستانێ فرسەندەک زێرینە. ئەگەر ئەڤ فرسەند نەیێ بکارئانن دێ رۆژێن خرابتر ل پێشیا کوردێن رۆژئاڤایێ کوردستانێ بن.
ھەر ئالیەک سیاسی، کوردەک نیشتیمانپەروەر گەرەک یەکتیا ناڤ مالا کورد ل رۆژئاڤایێ کوردستانێ بپارێزە و د ڤێ دەربارێ دە بانگ ل پەیەدێ بکن. رەد کرنا سیاسەتا پەکەکێ ل رۆژئاڤایێ کوردستانێ ئازادیا ھەرێما کوردستانا رۆژئاڤا ل گەل خوە تینە.
