پارتییا وەلاتپارێزێن کوردستانێ (PWK) ھەلوەستا خوە ژ رووخاندنا رەژیما بەشار ئەسەد نیشان ددە و بانگ ل لھەڤھاتن و تفاقا ئالیێن کوردێن رۆژئاڤایێ کوردستانێ دکە.
نڤێسینگەها راگەھاندنێ یا پارتییا وەلاتپارێزێن کوردستانێ ئیرۆ 12/12/2024 داخویانیەک دەربارێ رووخاندنا رەژیما بەشار ئەسەد، رەوشا نھایا سووریەیێ و رۆژئاڤایێ کوردستانێ دە بەلاڤ کر و پشتگرییا ژ بۆ ھەر ھەولدانەکە بۆ لھەڤھاتن و تفاقا ئالییێن کوردێن رۆژئاڤایێ کوردستانێ کر.
داخویانیا نڤێسینگەها راگەھاندنێ یا PWK :
رووخاندنا رەژیما بەشار ئەسەد یا 61 سالی، جیھێ دلخوەشییێ یە.
رووخاندنا رەژیمێن دیکتاتۆر، د رێیا رووخاندنا دیکتاتۆرێن دن ژی دە ھێڤییێن مە خورتر دکن.
ھەلبەتە کو رەوشا کو پشتی رووخاندنا رەژیما ئەسەد دەرکەتییە ھۆلێ، ھینا نە دییارە دێ بەر ب کو ڤە بچە. رەوشا ھەیی، ژ بۆ گەلێ مەیێ رۆژئاڤایێ کوردستانێ ژی ژ بۆ ھەموو گەلێن سوورییەیێ ژی گەلەک ریسک و خەتەرییان ژی گەلەک فرسەندان ژی د ناڤا خوە دە دحەوینە.
د رەوشوەکە وەھا حەساس دە، ھندەک بەحس ھەنە، تێ گۆتن کو ئەمەریکا و فرانسا ھەول ددن کو پەیەنەکە و ئەنەکەسە بجڤن و بکاربن وەک ھەیەتەکە ھەڤبەش ل گەل رێڤەبرییا شامێ ھەڤدیتنان بکن.
ئەم وەک پارتییا وەلاتپارێزێن کوردستانێ (PWK) پشتگرییا ھەر ھەولدانەکە ژ بۆ لھەڤھاتن و تفاقا ئالییێن کوردێن رۆژئاڤایێ کوردستانێ دکن. ئەم پشتگرییا ھەولدانێن ژ بۆ لھەڤھاتنا ئالییێن کوردی یێن رۆژئاڤایێ کوردستانێ، وەکە ئەرکەکا نەتەوەیی یا ھەموو کوردێن جیھانێ دزانن.
ئەم د وێ باوەرییێ دە نە کو ل گۆری ڤێ رەوشا نوو، ژ بۆ بەرژەوەندییێن گەلێ مەیێ رۆژئاڤایێ کوردستستانێ، پێویستییەکە لەزگینی پێ ھەیە کو ل رۆژئاڤایێ کوردستانێ پەیەنەکە، ئەنەکەسە و ھەموو پارتییێن کوردان بجڤن و بێنە جەم ھەڤ.
ئەم دبێژن، ئیرۆ ھەموو ئالییێن سییاسی یێن ل رۆژئاڤایێ کوردستانێ، دڤێت تشتێن کو ھەتا ئیرۆ روودانە دەینن ئالییەکی، ژ بۆ ئاڤاکرنا ئیدارەیەکە ھەڤبەشا لەشکەری، ئابۆری، سییاسی، دیپلۆماسی بێنە جەم ھەڤ و وەک ئالییێ کورد و کوردستانی ببن تەرەف و مخاتابێ ھەموو دەولەتان. ئەڤە ئەرکە و پێویستییەکا ئەساسی یا ژ بۆ پاراستن و پێکانینا بەرژەوەندییێن گەلێ مەیێ رۆژئاڤایێ کوردستانێ یە.
ئەم بانگی دەولەتا ترکییەیێ دکن کو داوی ل ئێریشێن خوەیێن ل سەر رۆژئاڤایێ کوردستانێ بینن؛ ل گەل ھەموو ئالییێن کوردی یێن رۆژئاڤایێ کوردستانێ ژ بۆ دییالۆگێ گاڤێن پێویست باڤێژن. ھەر گاڤەکا کو دەولەتا ترکییەیێ ژ بۆ رێزلێگرتنا مافێن نەتەوەیی، دەمۆکراتیکێن ملەتێ کوردێ رۆژئاڤایێ کوردستانێ باڤێژە؛ دێ رێیا چارەسەرییەکا دەمۆکراتیک، ئاشتییانە، سییاسی ل باکورێ کوردستانێ ژی خورتر بکە.
ئەڤە 100 سالە کو دەولەتا ترکییێ سییاسەتا ل دژی ملەتێ کورد دمەشینە؛ لێ ڤێ سییاسەتێ نکاریبوویە ملەتێ کورد و دۆزا وی یا رەوا ژ ھۆلێ راکە. ئەم بانگی دەولەتا ترکییێ دکن کو داویێ ل ڤێ سییاسەتا خوە بینە. دڤێت ب دییالۆگێ رێیا قەبوولکرنا ھەبوونا ملەتێ کورد و مافێن وی یێن نەتەوەیی، دەمۆکراتیک ل باکورێ کوردستانێ و ترکییەیێ بێ ڤەکرن.
ئاشکەرەیە کو پێشھاتەیێن ئیرۆ ل سوورییەیێ رووددن، دێ کارتێکرنا خوە ب تایبەتی ل رۆژئاڤایێ کوردستانێ و ھەروەھا ل ھەموو پەرچەیێن کوردستانێ ژی ھەبە. ژ بەر ڤێ راستییێ ژی ژ ھەر دەمێ زێدەتر ئیرۆ پێویستی ب وێ یەکێ ھەیە کو ل سەر ھشمەندییا نەتەوەیی، دەمۆکراتیک، د ناڤا ھێزێن ھەر چار پەرچەیێن کوردستانێ دە، تۆر و مەکانیزمایەکا کو بکاربە سەرکردایەتی، ھەماھەنگی، دییالۆگ، دانوستەندن، شێورا ناڤخوەیی، ب ھەڤ رە دییارکرنا فکر و ھەلوەستێن ھەڤبەش بھوونە ھەیە.
