سەرۆکێ ئەنجوومەنا خوەجهی یا ئه‌نه‌كه‌سێ یا عه‌فرینێ ئەحمەد حەسەن گۆت، “نێزکێ 2 هەزار و 500 مالبات ڤەگەریانە عه‌فرینێ و هنەک ژ وان هاتنە دەستەسەرکرن”.
سەرۆکێ ئەنجوومەنا خوەجهی یا ئه‌نه‌كه‌سێ یا عه‌فرینێ ئەحمەد حەسەن ل سەر رەوشا عه‌فرینێ و ڤەگەرا کۆچبەرێن کوردێن عه‌فرینی ژ رووداوێ رە ئاخڤی.
ئەحمەد حەسەن ل سەر ڤەگەرا کۆچبەران گۆت، “ڤەگەرا مالباتێن کوردان ژ بۆ عه‌فرین و دەردۆرێن وێ رۆژ ب رۆژ زێدەتر دبە و هەتا نها نێزکی 2 هەزار و 500 مالباتان ڤەگەریانە”.
هەر وها ئەحمەد دیار کر کو پشتی بوویەرێن سووریەیێ وەلاتیێن کو ژ تل رفعەت و شەهبایێ ڤەدگەرن وارێ خوە عه‌فرینێ، حکوومەتا خوەجهی و گرووپێن چەکدار ژ وان رە پرسگرێكا دەردخن.
ئەحمەد حەسەن وها پێ دە چوو، “ژ ناڤ وان مالباتێن کو ڤەگەریانە نێزکی 200 مێر ب هنجەتا کو پێشتر ب رێڤەبەریا خوەسەر رە کار کرنە هاتنە دەستەسەرکرن، یێن کو هاتنە دەستەسەرکرن هنەکی ژ وان دشینن دادگەهان و ل وێ دەرێ ناڤبەرا 500-700 دۆلاری دە جەزایێ مادی ل وان تێ برین و پشترە تێن بەردان”.
هەر وها ئەحمەد حەسەن دا زانین، هەموو ئەو وەلاتیێن کو هاتنە دەستەسەرکرن ژ ئالیێ حکوومەتا خوەجهی ڤە نەهاتنە دەستەسەرکرن، هنەکی ژ وان ژ ئالیێ گرووپێن چەکدار ڤە هاتنە دەستەسەرکرن.
ل ئالیێ دن، ئەحمەد حەسەن راگهاند، هەر مالبات ئان کەسەک ل هەرێما عه‌فرینێ بێ گرتن ئەنجوومەنا خوەجهی یا عه‌فرینێ ئالیکاریا وان دکە و گۆت: “دۆهـ ل گوندێ برچقاسێ ژن و مێرەک هاتبوون گرتن 5 هەزار دۆلاران ژ وان دخوەستن، ئەنجوومەنێ دەستوەردانێ کر و ئەو بێ پەرە هاتن ئازادکرن”.
د بەشەکە دن یا ئاخافتنا خوە دە ئەحمەد حەسەن دیار کر کو هنەک ژ وان کەسێن هاتنە دەستەسەرکرن ئەو ناشینن دادگەهان و بێ دادگەهـ ب 1-2 هەزار دۆلاران تێن ئازادکرن.
ل گۆرێ زانیاریێن ئەحمەد حەسەن هەتا نها عەرەبێن هاوردە یێن ژ پارێزگەهێن دن ژ عه‌فرینێ ڤەنەگەریانە هەرێمێن خوە، ژ بەر وێ یەکێ وەلاتیێن کورد یێن ڤەگەریانە عه‌فرینێ ل مالێن مرۆڤێن خوە دمینن و ل بەندێنە ژ ور ڤەگەرن ناڤ مالین خوە.
8ێ کانوونا پێشینا 2024ان هەیئەتا تەحریر ئەل شامێ (هتش) شاما پایتەختا سووریەیێ کۆنترۆل کربوو و رەژیما بەشار ئەساد رووخاندبوو.
پشتی کۆنترۆلکرنا شامێ، گرووپێن “ئارتێشا نشتمانی یا سووریەیێ” ناڤچەیێن شەهبا و منبجێ کۆنترۆل کرن کو پێشتر د بن کۆنترۆلا هه‌سه‌دێ دە بوون.
ژ بەر ڤێ یەکێ خەلکێ وان هەر دو ناڤچەیان کو پرانیا وان کۆچبەرێن کوردێن عه‌فرینێ بوون هنەک ژ وان ڤەگەریا سەر مال و ملکێن خوە و هنەکی دن ژی جارەکە دن کۆچبەری هەرێمێن د کۆنترۆلا رێڤەبەریا خوەسەردە نە بوون.
