رۆژنامەیا «واڵ ستریەت جۆرنال» ژ زارێ بەرپرسێن ئامەریکی راگهاند، ئارتێشا ترکیەیێ هێزێن خوە لگەل کۆمێن چەکدارێن سووریەیێ ل سەر سینۆرێ ب سووریەیێ ب جهـ کرنە، ئەڤ ژی نیشانەیەکە مەترسیدارا ئێریشکرنا ل سەر باکور-رۆژهلاتێ سووریێ یە.
رۆژنامەیێ د نڤیسا خوە دە وها گۆت: «ل گۆری بەرپرسێن ئامەریکی، ئارتێشا ترکیەیێ ل ناڤچەیێن سینۆری یێن ب سووریەیێ رە، دەست ب تەڤگەرا خوە یا لەشکەری کریە و چەک و جەبلخانە کۆم کرنە. ئەڤ هشیاریەکە مەترسیدارە کو ئەنقەرە دخوازە ب کۆمێن ملیسێن سووریەیێ رە، ئێریشەکە بەرفرەهـ ل دژی هەرێمێن کو د بن کۆنترۆلا کوردان دە پێک بینە.»
بەرپرسەکی ئامەریکی دبێژە: «هەژمارەک مەزن ژ چەکدار و کۆماندۆیان ب جلێن فەرمی یێن ئارتێشا ترکیەیێ ل سەر سینۆرێ نێزیکی کۆبانێ هاتنە بجهکرن.»
دەستنیشان کر ژی: «ل گۆری ئامادەکاری و کۆمکرنا هێزان، ئۆپەراسیۆنا ترکیەیێ ل سەر ناڤچەیێن سینۆری نێزیک دبە.»
ئەڤ یەک د دەمەکێ دەیە، ناڤەندا راگهاندنێ یا هه‌سه‌دێ شەڤا بۆری پشتراست کر کو هەولدانێن ناڤبەینکاریێ یێن ئامەریکایێ یێن ژ بۆ راگهاندنا ئاگربەستەکە ماییندە ل هەرێمێن منبج و کۆبانێ، نەگهیشتیە ت ئەنجامان.
هه‌سه‌دێ د داخویانیا خوە دە گۆت: «تەڤی ئالیکاریا ئامەریکایێ یا ژ بۆ راوەستاندنا شەر، لێ ترکیە و چەکدارێن وێ یێن چەتە د ڤان دەمێن داوی دە رەوش زێدە گور کرنە.»
ژ ئالیێ خوە ڤە، رێڤەبەریا ئۆپەراسیۆنێن لەشکەری یا سەر ب حکوومەتا نوو یا شامێ ڤە ژی پشتراست کر، «دەما ئاگربەستا د ناڤبەرا ئۆپەراسیۆنێن لەشکەری و هه‌سه‌دێ دە، بێیی کو بگهە رێکەفتنەکە چارەسەریێ یا گشتگیر، بداوی بوو.»
پشتی کەتنا رێژیما بەشار ئەسەد رۆژا 8ێ بەرچلە ل سەر دەستێ گرووپێن چەکدارێن ئۆپۆزیسیۆنا سووریەیێ، گرووپێن چەکدارێن سەر ب ترکیەیێ ڤە ئێریشی باژارۆکێ تل رفعەت و گوندێن باکورێ حەلەبێ یێن د دەستێ هه‌سه‌دێ/یه‌په‌گێ دە کرن و ئەو کۆنترۆل کرن، پشترە ژی بەرێ خوە دان منبجێ.
د ڤێ دەربارێ دە، سەرۆکێ پارتیا تەڤگەرا نەتەوەیی (مه‌هه‌پێ) دەڤلەت باهچەلی ژی د جڤینا فراکسیۆنا پارتیا خوە دە ل پەرلەمانتۆیا ترکیەیێ گەفێن ئێریشکرنا سەر منبجێ و دەڤەرێن دن یێن رۆژئاڤایێ کوردستانێ خوار و گۆت: «په‌كه‌كه، یه‌په‌گه و په‌یه‌ده دژمنێن مەزنێن ترکیەیێ نە. پشتی کەفتنا تل رفعەتێ، پێشڤەچوون راناوەستن و ئێریش بەر ب منبجێ ڤە بەردەوام دبن.»
