پەکەکە بوویە وەک مەکینا ڤر و دەرەوان. ژ بۆ کو چەند بەرژەوەندیێن حیزبی ب دەست بخە و چەند ئەحمەقێن ئالیگرێن خوە بخاپینە، دقێرینە و چەپ و راست دەرەوان دکە. پەکەکە ئەوقاس بێ شەرم و فەدی بوویە کو زەق ل چاڤێن خەلکێ دنێرە و دەرەوان دکە، د نووترین دەرەوا خوە دە ژی ئیدیعا دکە “ل ھەولێرێ میت، پاراستن و ئەنەکەسە ل ھەڤ جڤیانە.”
د دەمەکی دە کو کورد ل بەندا یەکیتیەکە نەتەوی نە، ل بەندێ نە کو پەیەدە و ئەنەکەسە ل هەڤ بجڤن و ب هڤ رە هەرن شامێ داکو دانوستاندنان ل سەر مافێن کوردان د سووریەیا نوو دە بکن، پەکەکە وەکە کو ت کارەکە دن نەبە، هاتیە و دەرەوەکە مەزن یا ب ڤی ئاوا د مەدیایا خوە دە پارڤە دکە.
مەدیایا پەکەکێ د نووچەیا خوە یا دەرەو و ڤرەک دە راگهاندیە “میتێ، پاراستنێ و ئەنەکەسێ د 14 کانوونێ دە ل ھەولێرێ جڤینەکە ھەڤپار لدار خستن. د جڤینێ دە بریار ھاتە دان کو ئەنەکەسە تەڤلی تفاقا کورد نەبە.” وەکە کو ئەم پەکەکێ ناس دکن، ژ ڤێ دەرەوا پەکەکێ خویا دبە دیسا پەکەکێ پلانەکە دن یا قرێژ هەیە ژ بۆی کو تفاقا کورد ل رۆژئاڤا چێنەبە و هەولێن مەزن ژ بۆی ڤێ یەکێ ددە و دخوازە ب ڤی ئاوا پەدەکێ و ئەنەکەسێ وەکە ئاستەنگێن ل همبەر تفاقا کوردی ل رۆژئاڤا دەستنیشان بکە.
کا پلانا پەکەکێ یا ژ بۆی ئاستەنگکرنا تفاقا کوردی ل رۆژئاڤا چیە هەیانی نها نایێ فێم کرن، لێ بەلێ ئەڤ نووچەیا پەکەکێ ب زەلالی خویا دکە، پەکەکە وێ پرسگرێکەک مەزن ژ بۆی تفاقا کوردی ل رۆژئاڤا دەرخینە هۆلێ. ژ بەر کو د نووچەیا مەدیایا پەکەکێ دە ت ئەرگۆمان و بەلگەیێن حەقیقی تونەنە کو نووچەیا وان پشتراست بکە، لوما ئەڤ ژ بلی دەرەوەک مەزن و زەمینەسازیا ژ بۆی پلانا وێ یا قرێژ نە ت تشتەکە دنە.
هەر مایە پەکەکە د مەدیایا خوە دە ل شوونا سلۆگانا خوە یا بێ واتە یا کو تێ دە دبێژە، “بێی سەرۆک ژیان نابە”، سلۆگانا “بێی دەرەو ژیان نابە” پارڤە بکە.
