شەرڤانێن مەجلسا لەشکەری یا منبجێ ئێرشێن دژوارێن گرووپێن چەکدارێن سەر ب ترکیێ ڤە ل دژی بەنداڤا تشرینێ یا باشوورێ کۆبانێ تێک برن، د ئەنجامێ دە 52 چەکدار ھاتن کوشتن.
مەدیایا نێزیکی ھەسەدێ بەلاڤ کر، چەکدارێن سەر ب ترکیەیێ خواستن ب تانک، تەمبێلێن زرخی و درۆنان ژ دو ئالیان ڤە بکەڤن قادا بەنداڤا تشرینێ. د ئەنجامێ دە د ناڤبەرا شەرڤانێن مەجلسا لەشکەری یا منبجێ و چەکداران دە شەرەکی دژوار روو دا.
دیار کر ژی، د پەڤچوونێن ل دەردۆرا بەنداڤا تشرینێ دە، 52 چەکدار ھاتن کوشتن، 2 ترومبێلێن زرخی و تانکەکە چەتەیان ھاتن ژناڤبرن و گەلەک چەک و جەبلخانە ھاتن دەستەسەرکرن.
ھێزێن مەجلسا لەشکەری یا منبجێ دیار کر، پشتی کو خالێن کۆمبوونا چەتەیان ھاتن ئارمانجکرن، ھەژمارا کوشتیێن وان زێدە بوو.
ل گۆری ئاگاھیێن مەجلسێ، پشتی زێدەتری 12 دەمژمێران ژ پەڤچوونێن دژوار، چەتە رەڤین و دووڤ را جارەکە دن ل خالەکە لەشکەری یا ل نێزیکی بەنداڤا تشرینێ بجھ بوون. لگەل وێ ئەو بوونە ئارمانجا ھێزێن وان، گەلەک ژ وان ھاتن کوشتن و بریندار بوون. ب گشتی د پەڤچوونێن ئیرۆ دە 52 چەتە ھاتن کوشتن.
چەند جارن شەرێ کۆنترۆلکرنا بەنداڤا تشرینێ د ناڤبەرا ھەسەدێ و چەکدارێن ئارتێشا نیشتیمانی یا سووریەیێ یا ترکیێ پشتەڤانیا وان دکە دە دەرکەتبوو. رۆژا ئینێ ژی، چەکداران دیمەنێن بەنداڤێ بەلاڤ کربوون و راگھاندبوو کو وان بەنداڤ ب تەمامی کۆنترۆل کریە.
