سەرۆکێ هەرێما کوردستانێ رێز و سپاسیێن گەلێ کورد پێشکێشی هزرمەند و جڤاکناس و نڤیسەرێ ترک و دۆستێ گەلێ کورد ئیسماعیل بێشکچی کر. ئیسماعیل بێشکچی ژی تەکەز ل سەر پشتگریا خوە و وەقفا ئیسماعیل بێشکچی یا بەردەوام ژ بۆ مافێن رەوا یێن گەلێ کوردستانێ کر.
سەرۆکێ هەرێما کوردستانێ نێچیرڤان بارزانی ئیرۆ (یەکشەم، 22.12.2024) پێشوازیا هزرمەند و جڤاکناس و نڤیسەرێ ناڤدارێ ترک و دۆستێ گەلێ کورد ئیسماعیل بێشکچی کر.
نێچیرڤان بارزانی د هەڤدیتنەکێ دە رێز و سپاسیێن گەلێ کوردستانێ ژ بۆ پشتگری و بەرگریکرنا هزرمەند ئیسماعیل بێشکچی ژ مافێن گەلێ کورد تەکەز کرن، هەروەسا دەستخوەشی ژی ل ئەرک و کارێن وەقفا ئیسماعیل بێشکچی نه‌خاسمه د وارێ کوردۆلۆژیێ دە کر.
بێشکچی ژی ژ ئالیێ خوە ڤە دلخوەشیا خوە ب سەردانا خوە یا ژ بۆ هەرێما کوردستانێ و پێشکەفتنێن وێ دیار کر، تەکەز ل سەر پشتگریا خوە و وەقفا ئیسماعیل بێشکچی یا بەردەوام ژ بۆ مافێن رەوا یێن گەلێ کوردستانێ کر و هەروەسا دیتن و نەرینێن خوە ب گەشبینی ڤە ل سەر پاشەرۆژا گەلێ کوردستانێ ژی بەرچاڤ کرن.
هەروەسا پارێزگەرێ هەولێرێ ئومێد خۆشناو و هەژمارەکە مامۆستایێن زانینگەها سەلاحەدینێ و برێڤەبەرێن وەقفا ئیسماعیل بێشکچی ژی د وێ هەڤدیتنێ دە ئامادە ببوون.
