سەرۆکوەکیلێ کۆما دەم پارتیێ سەزایی تەمەلی راگهاند کو دەربارێ سەرلێدانا وانا یا ژ بۆ رێبەرێ په‌كه‌كێ عه‌بدوللا ئۆجالان هەتا نها بەرسڤەکە فەرمی نەهاتیە دایین.
سەرۆکوەکیلێ کۆما دەم پارتیێ سەزایی تەمەلی ئیرۆ ل پارلامەنتۆیا ترکیەیێ جڤینەکە چاپەمەنیێ ل دار خست.
سەزایی تەمەلی ئاماژە ب وێ یەکێ کر کو پارلامەنتۆیێ ئیسال تشتەک ژ بۆ خەلکێ نەکریە و رەخنە ل پێشنیاریاسایێن کو هاتنە گۆتووبێژکرن کر.
تەمەلی ل سەر پرسا رۆژنامەگەران یا دەربارێ هەڤدیتنا دەم پارتی و ئۆجالان ژی گۆت: «هەتا نها بەرسڤەکە فەرمی ژ مە رە نەهاتیە دایین. ئەگەر بەرسڤەک بێ دایین ئەم دێ ب رایا گشتی و راگهاندنێ رە پارڤە بکن.
لێ هین ژی ت بەرسڤ نەهاتیە دایین. شیرۆڤەیێن جور ب جور تێن کرن، داخویانی تێن دایین و ل گەل ڤێ یەکێ سەرۆکێ مه‌هه‌پێ دەربارێ مژارێ داخویانیان ددە و بەندەواریا خوە تینە زمان لێ هین ژی بەرسڤەکە فەرمی نەهاتیە دایین».
سەرۆکێ مه‌هه‌پێ دەڤلەت باهچەلی پێشتر گۆتبوو کو بلا ئۆجالان بێ ل پارلامەنتۆیا ترکیەیێ د کۆمجڤینا دەم پارتیێ دە ب ئاخڤە.
دەم پارتیێ ژی ژ بۆ هەڤدتینا ب ئۆجالان رە سەرلێدان کریە.
وەزیرێ دادێ یێ ترکیەیێ بەریا چەند رۆژان گۆتبوو پشتی گۆتووبێژێن بودجەیێ ب داوی ببن دێ بەرسڤەک بێ دایین.
