پارتیا دەمۆکراتا پێشڤەروو یا کورد ل سووریەیێ (پێشڤەروو) پشتەڤانیا خوە ژ بۆ دیالۆگا د ناڤبەرا ئه‌نه‌كه‌سێ و فەرماندارێ گشتییێ هه‌سه‌دێ دە نیشان ددە و وێ وەک گاڤەکە ل سەر رێیا راست دبینە.
پۆلیتبورۆیا پارتیا پێشڤەروو شەڤا بۆری 23ێ بەرچلە د داخویانیەکێ دە راگهاند، «ئەم د پارتیا دەمۆکراتا پێشڤەروو یا کورد ل سووریێ دە، پشتگریا خوە ژ بۆ جڤینا کو د ناڤبەرا ئەنجوومەنا نشتمانی یا کورد ل سووریێ و فەرماندارێ گشتییێ هه‌سه‌دێ مەزلووم عه‌بدی دە، یا د بن چاڤدێریا هەڤپەیمانیا ناڤدەولەتی دە پێک هاتیە، تەکەز دکن».
پارتیا پێشڤەروو دبێژە: «ئەم وێ یەکێ، وە گاڤا ل رێیا راست دبینن، ژ بەر کو ئەم لهەڤکرنا کوردی و یەکخستنا گۆتارا سیاسی یا کوردی وەک بژاردەیەکە ستراتەژیک دبینن کو ت ئالتەرناتیف ژێ رە نینە، ژ بۆ گارانتیکرنا مافێن رەوایێن نەتەوەیی یێن کوردی و ئاڤاکرنا دەولەتەکە هقووقی، ئازادی و دەمۆکراسیێ کو تێ دە رێز ل مافێن کۆم و تەکان بێ گرتن».
ئەڤ داخویانی پشتی وێ تێ، دوهی شاندەکە سەرۆکاتیا ئه‌نه‌كه‌سێ و فەرماندارێ گشتی یێ هه‌سه‌دێ مەزلووم عەبدی، ب ئامادەبوونا بەرپرسێن هەڤپەیمانیا ناڤدەولەتی یا ل دژی داعشێ جڤیابوون.
بەردەڤکێ فەرمییێ ئه‌نه‌كه‌سێ فەیسەل یووسف ژی دەربارێ ناڤەرۆکا جڤینێ ژ ک24 رە راگهاند، د جڤینێ دە تەکەزی ل سەر ئاڤاکرنا هەلوەستەکە کوردی هاتە کرن کو ل سەر بنگەها دانووستاندنێن د سالێن 2019 و 2020 دە هاتنە کرن، بە.
فەیسەل یووسف گۆت ژی : «ئەم دخوازن شاندەکە هەرتمی بۆ شامێ پێک بینن،نە کو ئەم رۆژەکێ ل هەڤ بکن و رۆژا دن ژی پشتا خوە بدن هەڤدو، ژ بەر نها قۆناغەکە دیرۆکی هاتیە کو کوردێن سووریەیێ بکاربن د سووریەیا پێشەرۆژێ دە ببن هەڤپار».
