جڤینا ئه‌نه‌كه‌سێ و هه‌سه‌دێ، یه‌كرێزییا ده‌ره‌و یا په‌كه‌كێ ئیفشا كر
یێك ژ گرینگترین جڤینێن یه‌كرێزیێ دوهـ د نێڤبه‌را ئه‌نه‌كه‌سێ و هه‌سه‌دێ ده هات ل دارخستن. ته‌ڤی كو په‌كه‌كه ده‌وام قالا یه‌كرێزییا كوردان دكه، لێبه‌لێ ب رێزكه‌كێ ژی ئه‌ڤ گاڤا پڕ گرینگ یا ل رۆژئاڤا به‌حس نه‌كر. جڤینا ئه‌نه‌كه‌سێ و مه‌زلووم عه‌بدی ته‌ڤی كو دكاره وه‌كه هێڤێنێ یه‌كرێزییا راستین ل رۆژئاڤا بێ حه‌ساب كرن، لێ د هه‌مان ده‌مێ ده روویێ راست یێ په‌كه‌كێ ئیفشا كر. په‌كه‌كه ناخوازه یه‌كرێزی چێببه ژ بۆ كو ئه‌جێندایێن وێ نه‌كه‌ڤن خه‌ته‌ریێ.
ب گارانتیا كوالسیۆنا ناڤده‌وله‌تی یا كو ئامه‌ریكا سه‌رپه‌رشتییا وێ دكه، دوهـ بوویه‌ره‌كه پڕ گرینگ ل حه‌سه‌كێ یا رۆژئاڤا كوردستانێ چێبوو، ئه‌نجوومه‌نا نشتیمانی یا كورد ل سووریێ ئه‌نه‌كه‌سه و مه‌زلووم عه‌بدی فه‌رماندارێ گشتی یێ هێزێن سووریه‌یا ده‌مۆكراتیك هه‌سه‌دێ جڤیان. مرۆڤ دكاره ببێژه ئه‌ڤ جڤین وه‌كه كه‌ڤرێ بنگه‌هین یێ ئاڤاكرنا یه‌كرێزییا كورده ل رۆژئاڤا كوردستانێ.
ژ هێلا ئه‌نه‌كه‌سێ ڤه هه‌ر یێك ژ محه‌مه‌د ئیسماعیل، سلێمان ئۆسۆ، نعمه‌ت داوود و فه‌یسه‌ل یووسف و ژ هێلا هه‌سه‌دێ ڤه، مه‌زلووم عه‌بدی، رێدوور خه‌لیل و هۆزان د جڤینێ ده حازر بوون.
ئه‌نه‌كه‌سه: مە ل سەر بەردەوامیا دیالۆگێ ل هەڤ کر
ئه‌نه‌كه‌سێ خوه‌ست هه‌سه‌ده ژ په‌كه‌كێ دوور ببه
ئه‌نه‌كه‌سێ ده‌ربارێ جڤینێ گۆت: «جڤین باش دەرباس بوویە، مە ل سەر بەردەوامیا دیالۆگێ ل هەڤ کر و دێ جڤینەکە دن ژی وەرە کرن».
هه‌ر وها دیار كر، د دەمەکە نێزیک دە دێ جڤینەکە دن هەبە.
چاڤكانیێن تایبه‌ت یێن داركا مازی ئاشكه‌ره كر كو د جڤینا ب مه‌زلووم عه‌بدی ده، ئه‌نه‌كه‌سێ ئه‌ڤ داخوازی ئاراسته كرنه:
ئه‌شكه‌ره كرنا چاره‌نووسا گرتیێن ژ هێلا په‌كه‌كێ ڤه هاتنه گرتن.
نابه یێ كو نه ژ خه‌لكێ رۆژئاڤا به د ناڤا وان ده ب خه‌بته.
دوور كه‌تنا ژ رێخستنا په‌كه‌كێ.
كۆمیته‌یه‌ك هه‌ڤبه‌ش هات پێكئانین
هه‌سه‌ده: دڤێ ناکۆکیێن د ناڤبەرا ئالیان دە زوو چارەسەر ببن
هێزێن سووریەیا دەمۆکراتیک هه‌سه‌دێ ژی ب داخویانیەکە نڤیسکی راگهاند کو جڤین پێک هاتیە.
ل گۆری داخویانیا هه‌سه‌دێ، د جڤینێ دە هاتیە دیارکرن کو دڤێ ناکۆکیێن د ناڤبەرا ئالیان دە زوو چارەسەر ببن و بەردەوامیا هەڤدیتنان گرینگە.
ل داویا جڤینێ بریار هات گرتن كو كۆمیته‌یه‌كه هه‌ڤبه‌ش ژ بۆی چاره‌سه‌ركرنا كێشه‌یان وه‌ره ئاڤاكرن و جڤین به‌رده‌وام ببن.
مه‌دیایا كوردی، ئه‌ره‌بی و بیانی ژی ب گه‌شبینیه‌كه پڕ مه‌زن جڤینا ئه‌نه‌كه‌سێ و هه‌سه‌دێ شۆپاندن، شیرۆڤه، ئانالیز و نووچه‌یێن یه‌كرێزییا كوردان و گرینگیا وێ ژ بۆی د قووناغا پێش مه ده د سووریه‌یا نوو ده پارڤه‌كرن، ته‌نێ مه‌دیا په‌كه‌كێ نه‌به، وێ ب رێزكه‌كێ ژی به‌حسا جڤینا ئه‌نه‌كه‌سێ و هه‌سه‌دێ نه‌كر، هه‌ر وه‌كه ت جڤین پێكنه‌هاتنه.
په‌كه‌كه ژ دامه‌زراندنا خوه و هه‌یا رۆژا مه یا ئیرۆ قالا یه‌كرێزیێ دكه، لێ گاڤا كو یه‌كرێزی چێدبه ل دژی وێ د سه‌كنه!
په‌كه‌كه ژ دامه‌زراندنا خوه و هه‌یا رۆژا مه یا ئیرۆ قالا یه‌كرێزییا كوردان دكه، ب هه‌زاران جوانێن كوردان ب ڤێ درووشمه‌یا خوه خاپاندنه و به‌رێ وان دا مرنێ، هه‌موو ته‌ڤگه‌ر و پارتیێن كوردان ره‌د دكه، ب كورتاسی هه‌ر جیهێ رێخستن لێ به، یه‌كرێزی ل وێ ده‌رێ تونه. ل رۆژئاڤا و ده‌ستپێكا شۆرشا سووریێ ل سال 2012ێ په‌كه‌كێ ل ور پێش نیزاما ئه‌سه‌د ڤه شه‌رێ كوردان كر و نه‌هشت كورد ل دژی ئه‌سه‌د رابن.
ژ وێ ده‌مێ ڤه و هه‌یا هلوه‌شینا ره‌ژیما سووریێ، ئانگۆ ئه‌ڤ 13 سالن ده‌وام پارتیێن كوردی ب خائین ته‌وانبار دكه، ئێریشی باره‌گه‌هێن وان دكر، د شه‌وتاندن، كادرۆیێن وان زیندان دكرن، ئیشكه‌نجه ل وان دكر و ل سه‌ر جاده‌یان ب كه‌ڤران سه‌رێ كادرۆیێن ئه‌نه‌كه‌سێ د شكاندن.
په‌كه‌كێ پلانسازیه‌ك ژ بۆی قووناغا پێش مه ل رۆژئاڤا كوردستانێ دانایه و د پلانێن وێ ده یه‌كرێزی تونه، ئه‌و دخوازه یه‌كرێزیه‌كه ده‌مكی چێبكه و پشتره ئه‌جێندایێن خوه یێن كو خزمه‌تا ده‌وله‌تێن داگیركه‌ر دكه یێك ب یێك جی ب جی بكه.
ژ دوهـ ڤه مه‌دیا په‌كه‌كێ نووچه‌یا جڤینا ئه‌نه‌كه‌سێ و مه‌زلووم عه‌بدی و داخویانیێن هه‌ردو ئالییان یێن پشتی جڤینێ پارڤه‌نه‌كرنه و ت قالا جڤینێ نه‌كر، ئه‌ڤ ژی دهێته وێ واته‌یێ كو په‌كه‌كه ب گۆتن قالا یه‌كرێزیێ دكه لێ ب كریار ناخوازه یه‌كرێزی چێببه و دێ ل دژی ڤێ گاڤێ هه‌ولێن خوه به‌رده‌وام بكه.
سه‌رۆك بارزانی كه‌ڤرێ بنگه‌هین یێ یه‌كرێزییا كوردان ل رۆژئاڤا دانابوو
سه‌رۆك مه‌سعوود بارزانی و هه‌ر وها نێچیرڤان بارزانی سه‌رۆكێ هه‌رێما كوردستانێ، ژ ده‌ستپێكا ئالۆزیێن سووریێ ژ بۆ كو كوردێن رۆژئاڤا بگه‌هن مافێن خوه كه‌تن ناڤ هه‌ولێن مه‌زن ده، په‌یمانێن هه‌ولێر و دهۆكێ ژ بۆی یه‌كرێزییا كوردێن رۆژئاڤا چێكرن، ئه‌ڤ هه‌ردو په‌یمان وه‌كه سه‌یوانه‌كێ ژ بۆی یه‌كرێزییا كوردان ئاڤا كرن، ئه‌و هه‌نگاڤێن یه‌كه‌م بوون یێن چێكرنا ستاتوویا رۆژئاڤا كوردستانێ و ته‌ڤلی كرنا ته‌ڤ پارت و ئالیێن سیاسیی یێن كوردستانی د پرۆسه‌یا وێ یا سیاسی ده، لێ به‌لێ په‌كه‌كێ نه‌هشت ئه‌و په‌یمان وه‌رن جی ب جی كرن و ل دژی هه‌ولێن یه‌كرێزیێ سه‌كنی.
ب كه‌تنا ره‌ژیما ئه‌سه‌د ژی بارزانی بانگ ل ئه‌حمه‌د شه‌رع كر كو دڤێ د سووریه‌یا نوو ده مافێن گه‌لێن سووریێ ب تایبه‌ت گه‌لێ كورد وه‌رن گارانتی كرن.
