شارەدارێ قۆسەرێ ئیستیقالە ژ دەم پارتیێ کر!

شارەدارێ قۆسەرێ یێ پارتیا دەمێ زەینی ئیپەک راگھاند کو وی ئیستیقالا خوە پێشکێشی دەمێ کریە و دێ ب ئاوایەکی سەربخوە ئەرکا خوە بەردەوام کت.

زەینی ئیپەک کو د ھلبژارتنێن ھەرێمی دە ژ پارتیا دەمێ وەکی شارەدارێ قۆسەرێ ھات ھلبژارتن، تێکلداری ئیستیقالا خوە ژ دەم پارتێێ داخویانیا د خوە دە ئەڤ ئاگاھی دان:

نێزیکی 35 سالان من ب دلسۆزی و جۆشەکا مەزن خزمەتا پارتیا وەکھەڤیا گەلان و دەمۆکراسیێ و پرەنسیپێن وێ کر.ئەز ژ بۆ شارەداریا قۆسەرێ وەک کاندید ھاتم نیشاندان.

لگەل راگھاندنا ئەنجامێن ھلبژارتنێ ب ئیرادەیا گەلێ مە ھاتم ھلبژارتن و من دەست ب خزمەتێ کر. پشترا ژ ئالیێ ھندەک کەسێن کو من لگەل وان د ناڤا شارەداریێ دە دەست ب خەباتێ کر، گەف ل من خوارن کو دێ ھندەک وێنەیێن تایبەت د چاپەمەنیێ دە بێن پارڤەکرن.

ژ بۆ کو ئەڤ پیلانە و پیلانا کو ب ئارمانجا دەستەسەرکرنا رێڤەبەریا شارەداریێ یا ل دژی من و تێکۆشینا ل دژی ڤان، من ژ ئەندامەتیا دەمێ ئیستیقالە کر.

د ڤێ خالێ دە ئەز د وێ باوەریێ دە مە کو ئیرادەیا ھەری مەزن ئیرادەیا گەلە. “ئەز ب ڤێ ئیرادەیا خوە ھەبووم، ئەز دێ ھەبوونا خوە بدۆمینم و ب رێزداری رادگھینم کو ئەز دێ ب ئاوایەکی سەربخوە ب ڤێ ئیرادەیا مەزن خزمەتا گەلێ خوەیێ ھێژایێ قۆسەرێ کم.”

پارتیا دەمێ راگھاند کو د 1ێ تەباخا 2024 دە دەر بارێ زەینی ئیپەک دە لێپرسینا دیسیپلینێ دایە دەستپێکرن.

د داخویانیا پارتیا دەمێ دە وھا ھات گۆتن: “ژ گلی و بەلگەیێن کو د دەربارێ ھەڤشارەدارێ مە یێ قۆسەرێ زەینی ئیپەک دە گھیشتنە پارتیێ، ھاتیە دیارکرن کو ل دژی بەرنامە، پرەنسیب و نرخێن ئەخلاقی یێن پارتیا مە تەڤدگەرە. ژ بەر ڤێ سەدەمێ دەربارێ وی دە لێپرسینا دیسیپلینێ ھات دەستپێکرن. “ئەنجامێن لێپرسینا دیسیپلینێ یا کو دێ د دەمەک کورت دە ب داوی هێن، دێ بۆ رایا گشتی ژی هێن پارڤەکرن.”