بەرەیێ کوردستانا سووریێ داخوازێ ژ ھەسەدێ دکە گرتیێن سیاسی ئازاد بکە
ئەنیا کوردستانی یا سووریێ ب پەیامەکێ ژ ھێزێن سووریا دەمۆکراتیک (ھەسەدێ)ێ خوەست هەموو وان کەسێن ل رۆژئاڤایێ کوردستانێ ژ بەر سەدەمێن سیاسی ھاتنە گرتن ئازاد بکە.
د پەیاما خوە دە ئەنیا کوردستانی یا سووریێ ئاماژە ب وێ یەکێ دکە کو د ڤێ قۆناغا ھەستیار و چارەنڤیسسازا کوردستانا سووریێ دە ئەو مەترسیێن کو دبن گەف ل سەر پاشەرۆژ و مانا گەلێ مە ب تایبەت پشتی ھلوەشینا رەژیما ئەسەد و پێنگاڤێن بەر ب ئاڤاکرنا رەژیمەکا نوویا سیاسی ل وەلاتی پێش چاڤ وەرگرن، هەر وەها وەک ئەنیا کوردستانی یا سووریێ بانگەوازی ژ بۆ ھێزێن سووریەیا دەمۆکراتیک دکە و داخوازێ لێ دکە ب کریار پێنگاڤێن جیدی باڤێژن و د مژارێن ھەستیار و چارەنڤیسساز دە ببن خوەدان گاڤێن وەک؛
ڤالاکرنا هەموو گرتیگەھێن کو گرتیێن سیاسی یێن کورد تێدەنە و داوی ئانینا دۆسیایا گرتیان و ئاشکەراکرنا چارەنڤیسا وان کو ب سالانە د گرتیگەھان دە بێسەرووشوونن. ھەروەھا ب فەرمی داخوازا لێبۆرینێ ل وان بێ کرن و د ئالیێ مادی و مەعنەوی دا قەرەبوویا وان بێت کرن کو ب سالان ژ مرۆڤێن خوە دوورکەتنە و ئیشکەنجە ل وان ھاتیە کرن.
داوی ئانینا دۆسیا وان زارۆک و خۆرت و کەچێن برنە ناڤ ھێزێن چەکدار و ژ خواندن و دبستانان ھاتنە دوورخستن و دڤێت ئەو بۆ مالباتێن وان بێن ڤەگەراندن.
بەرنامە و پرۆگراما پەروەردەیێ ل بەرچاڤ بهێت دەرباسکرن و ب ئاوایەکی بهێت گوھەرتن کو ل گەل بنگەھێن مافێن مرۆڤ و رێزگرتنا زارۆک و دەمۆکراسیێ بگونجت.
د دەمەکی کورت دە دڤێت بریار ھلوەشاندن رێخستنا “جوانێن شۆرەشگەر” بێ دایین، کو رۆلەکا خراب و نەرێنی ھەبوویە و بەرۆڤاژی ھەموو نرخ و کەڤنەشۆپیێن جڤاکی کار کریە و کارێ وێ پێکھاتیە ژ رەڤاندنا زارۆکان و ھەمان دەمێ دە ئاموورەک بوویە بۆ تەحریک کرنا ل ھەمبەر پارتی و ئالیێن سیاسی یێن ئۆپۆزیسیۆنێ، ژ بۆ سیاسەتا دەستھلاتدارێن ئەمرێ واقع.
دەرخستنا چەکدرێن پەکەکێ د دەمەکی کورت دە ل کوردستانا سووریێ، کو بەرێ ژی و نھا ژی گەلەک زیان گەھاندنە پاشەرۆژا کوردستانا سووریێ، ئەگەر نە دبە بەھانەیەکا نوو ژ بۆ دەستوەردانا دەرڤە یا ل سەر کوردستانا سووریێ.
پابەندبوون ب فەدەرالیزمێ ئاوایێ ھەری باشێ سیاسییە، کو پێویستە داخوازێن کوردان ژ بۆ بنگەھ کرنا سووریەیەکا نوو و مسۆگەرکرنا مافێن گەلێ مە د چارچۆڤەیا پێکھاتەیەکی یەکگرتی یا کوردستانا سووریێ دە.
ھێزێن سووریەیا دەمۆکراتیک ببن ھێزا نشتمانی یا کوردی ل سووریێ و د چارچۆڤەیا پلانەکێ ب گۆتووبێژ ل گەل ھێزێن پێشمەرگەیێن رۆژ د چارچۆڤەیا ئارتێشەکا یەکگرتی دە ھەڤگرتن پێکبێ، ژ بۆ ببە ھێزەکا کوردی یا نیشتیمانی یا سووری و ئەرکێ پاراستنا کوردستانا سووریێ بگرە سەر خوە.
داویێ دە ژی تێ گۆتن: “ئەم وەک ئەنیا کوردستانی یا سووریێ، جێبەجێکرنا وان خالێن کو مە بەحس کری ژ بۆ پاراستنا ناڤچەیا مە وەک تەدبیرێن ھەری گرنگ و بلەز دبینین، کو ئەم راستی دەستوەردان و شەرەکی نوو نەبن و ب وی ئاوایی دێ ھەموەلاتیێن سڤیل بێن پاراستن و ژ شەرێن نوو بێن دوورخستن. ھەروەھا پێکانینا شاندەکا سیاسی یا ھەڤبەش، کو نوونەراتیا بەرژەوەندیێن گەلێ مە بکە، ژ بۆ گۆتووبێژکرنا ل گەل ئیدارەیا نوویا شامێ، دەربارێ پرسگرێکێن چارەنیڤیسساز و رەژیما سیاسی یا نوو یا وەلاتی دیار بکە گرنگ دبینن.”
