شاندەکە دەم پارتیێ ژ بۆی هەڤدیتنا لگەل ئۆجالان گهیشت ئیمرالیێ
دوهی 27/12/2024 مەدیایا ترکیەیێ ئەشکەرە کربوو، ل گۆرا رایادارێن دەولەتێ ددن کەشفکرن دێ بەری سەرسالێ ھەڤدیتنەک د ناڤبەرا بەرپرسێن دەمێ و ئۆجالان دە بێ کرن. سەرێ سبەها ئیرۆ ژی هات راگهاندن، شاندەکە دەم پارتیێ ژ بۆی هەڤدیتنا ب ئۆجالان رە گهیشتیە ئیمرالیێ.
ل ڤێ دەرێ یا بالکێش ئەوە کو، کەسایەتێن ژ دەمێ دێ چنە ئیمرالیێ ژ ئالیێ دەولەتێ ڤە تێن دەستنیشانکرن. دخوەیە ھەڤدیتنێن دێ ل گەل ئۆجالان هێنە کرن ھەتا 21ی ئادارا 2025 بەردەوام بن و تێ چاڤەرێکرن کو د نەورۆزا 2025 دە داخویانیا ئۆجالان بێ راگھاندن.
پشتی داخویانیا سەرۆکێ مەھەپێ د دەربارێ ئۆجالان دە کری ھەتا نھا گەلەک ئاوایان گۆتوبێژ ھەنە. قەندیل ناخوازە گوھ بدە ئۆجالان. ھەڤسەرۆکێ پەکەکێ جەمیل بایک ئەڤ یەک د ئاخاڤتنەکا خوە دە ئەشکەرە کر. ھەروەھا داخویانی و چالاکیێن ژ ئالیێ قەندیل ڤە تێنە کرن وەک بەرسڤەکی ژ بانگا ئۆجالانە.
ژ بەری چەند رۆژەکان ھەڤسەرۆکا دەمێ و چەند بەرپرسێن پارتیا ھەرێمێن دەمۆکراتیک و پارلەمەنتەرێن کو توندرەوێن پەکەکێ یانی یێن قەندیل ڤە گرێدایینە سەردانا ھەولێرێ کرن. ل گەل سەرۆکێ یەنەکێ ھەڤدیتن کرن و پشترە سەردانا قەندیلێ کرن، واتە لگەل بەرپرسێن قەندیلێ ھەڤدیتنەک بەرفرەھ پێکانین. ئەڤجا وان چ فەرمان ژ قەندیل وەرگرتنە نایێ زانین.
گەلەک ڤەکری، دێ ئۆجالان بانگا دەست ژێ بەردانا چەکان بکە و دکارە بانگا هەلوەشاندنا پەکەکێ ژی ب ئاوایەکی بکە. لێ دێ ڤێ یەکێ د فۆرمەک گەلەک تایبەت دە پێکبینە. ئەو گۆتنا پەکەکێ یا کو دبێژە ئاشتیەک ب روومەت دێ ل گۆرا فۆرموولا دەولەتێ بێ دزاینکرن.
رەوشا سووریێ و ڤێ یەکێ ڤە گرێدایی رەوشا رۆژئاڤایێ کوردستانێ، دێ باندۆرەکی ل بریارا قەندل بکە. دخویە ترکیە پێوەندیێن ل گەل ئۆجالان رە رەوشا سوری و تایبەتی داھاتوویا پەکەکێ ل سوورییە وەک ئەساسەکی دگرە.
ئەگەر ل رۆژئاڤایێ کوردستانێ، ھێزێن کوردی رەدا پەکەکێ بکن و د ناڤخوە دە یەکرێزیەکی ئاڤا بکن، دێ ھنگێ ل ھەرێمێ گوھەرتنێن د بەرژەوەندیا کوردان دە پتر بکەڤن رۆژەڤا سیاسی دە.
