ئوفوک ئوراس: ئۆجالان دێ بانگ ل پەیەدێ بکە تەڤلی حکوومەتا شامێ ببە

کەسایەتێ دیارێ ترکیەیێ در. ئوفوک ئوراس ئەشکەرە دکە: “رێبەرێ پەکەکێ عەبدوللاھ ئۆجالان دێ بانگ ل پەیەدێ بکە تەڤلی حکوومەتا نوویا شامێ ببە.”

ئیرۆ سەرێ سبەهێ شاندەکا دەم پارتیێ سەردانا ئۆجالانی کر. زانایێ سیاسەتێ و کەسایەتێ دیارێ ترکیەیێ در. ئوفوک ئوراس کو مەھا بۆری ل سەر پێڤاژۆیا چارەسەریێ دگەل سەرۆکێ مەھەپێ دەولەت باخچەلی و بەرپرسێن دەم-پارتیێ جڤینێن بەرفرەھ ئەنجامدابوون، راگەهاند: “بانگا دەولەت باخچەلی یا ژ بۆ ھەڤدیتنا دەم پارتی و ئۆجالان رەوابوونەک دروست کر و خەلک ژی دخوازە ئاشتی چێبە و پشتگریا ھەڤدتنا وان دکە.”

ھەروھا گۆت ژی: “ئەز ل سەر پێڤاژۆیێ گەلەک گەشبینم. ژخوە ئۆجالان ژ رۆژا ھاتبوو گرتن ھەتا نھا بەردەوام بانگا جڤاکەکا ئاشتیێ و جڤاکەکا ژ توندیێ دوور، دکر. ل گۆر پێشبینیا من ئۆجالان دێ بانگ ل تەڤگەرا کوردی یا ل سووریەیێ بکە کو ببە بەشەک ژ حکوومەتا نوویا سووریەیێ.

در. ئوفوک ئوراس دەربارێ پێڤاژۆیا چارەسەریێ دە گۆت: “پێڤاژۆیا چارەسەریێ دگەل پێڤاژۆیێن چێکرنا دەستوورا نوویا ترکیەیێ و سووریەیێ دێ ھەماھەنگ برێڤە بچە. دەم-پارتیێ گۆتبوو دەولەتا ترکیەیێ رێ نادە مە کو ئەم بچن جەم ئۆجالان و مە مژوول دکە. ئەز وەکی دەم-پارتیێ نافکرم. پێویست ناکە دەم-پارتی خوە دلگران بکە، پێڤاژۆ دێ بەردەوام بکە.”