سەرۆکێ پارتیا وەلاتپارێزێن کوردستانێ (PWK)ێ مستەفا ئۆزچەلیک ب بۆنەیا سالڤەگەرا کۆمکوژیا رۆبۆسکێ داخویانیەکا نڤیسکی بەلاڤ کر.
داخویانیا سەرۆکێ پارتیا وەلاتپارێزێن کوردستانێ وەھایە:
سەرۆکێ گشتی یێ پارتییا وەلاتپارێزێن کوردستانێ (PWK) مستەفا ئۆزچەلیک: شەھیدێن رۆبۆسکێ دبێژنە مە ‘ب ھشمەندییەکا نەتەوەیی، ھەڤکارییێن خوە پێک بینن’
د سالڤەگەرا 13ێ یا کۆمکوژییا رۆبۆسکێ دە، شەھیدێن رۆبۆسکێ، ل ڤێ کۆمکوژییا کو دەولەتا ترکییەیێ کرییە یا کو ھینا ژی وەکە “فایلی مەجهوول” مایە تەماشە دکن.
دەولەتا ترکییەیێ، ھەم ئەنجامدەرێ ڤێ کۆمکوژیێی یە، ھەم ھینا ژی قوربانییێن کۆمکوژییێ سووچدار دکە.
شەھیدێن رۆبۆسکێ و ویژدانا مرۆڤاھییێ، ب ئاوایەکی عەجێب مایی تەماشەیی وێ جیھانا کو ل ھمبەری ڤێ کۆمکوژییێ ھینا ژی وەکە کەڕ و کۆران تەڤدگەرن دکە.
بەلێ، شەھیدێن رۆبۆسکێ ل مە، ل یێن دبێژن “ئەم کۆمکوژییا رۆبۆسکێ ژ بیر ناکن” تەماشە دکن.
شەھیدێن رۆبۆسکێ، ل گۆتنێن مەیێن “ئەم شێخ سەعید، سەیید رزا، قازی محەمەد، مەلا مستەفا بارزانی، حەلەبچە و ئەنفالێ ژ بیر ناکن” گوھدار دکن.
شەھیدێن رۆبۆسکێ ل مە، ل یێن دبێژن “ئەم شەھیدێن خوە ژ بیر ناکن”، لێ دیسا ژی ھەر رۆژ ب دەھان کەسان شەھید ددن تەماشە دکن.
شەھیدێن رۆبۆسکێ، ل ئەوێن کو ب ئەزئەزتییا خوە، ب پارچەبوون و ب ژھەڤکەتنا خوە، دبن سەبەب کو رێیا ئازادییێ زەحەمەتتر و درێژتر ببە تەماشە دکن.
شەھیدێن رۆبۆسکێ، ل ئەوێن کو ب ئەزئەزتییا خوە، ب پەرچەبوون و ب ژھەڤکەتنا خوە، بەرھەمێن ھەموو فەدەکاری، شەھادەت و بەرخوەدانێن گەلێ مە لاواز دکن تەماشە دکن.
ئەوێن کو ژ بۆ یەکتییەکا نەتەوەیی، سەکنەکە نەتەوەیی، ھشمەندییەکە نەتەوەیی چێنەبە و نەکەملە، چ ژ دەستێن وان تێ دکن؛ بەلێ، شەھیدێن رۆبۆسکێ ل وان تەماشە دکن.
باشە، چ ژ مە دخوازن، چ ژ مە دڤێت شەھیدێن رۆبۆسکێ؟
شەھیدێن رۆبۆسکێ، ژ مە رە دبێژن: یێن د ناڤ پارتییەکێ دە دکارن ببن یەک، بلا ببن یەک؛ یێن نکارن ببن یەک، بلا ھەڤکاری و تفاقان بکن؛ یێن نکارن ھەڤکارییان بکن بلا د ناڤ دانوستەندن و دییالۆگان دە بن؛ یێن نکارن دییالۆگان ژی بمەشینن، بلا دژمناتییا ھەڤ نەکن.
شەھیدێن رۆبۆسکێ، ل باکورێ کوردستانێ ل بەندا پارتییەکا خورت، جەماوەری، ملی، دەمۆکراتن؛ ل بەندا تفاقەکا ستراتەژیک یا نەتەوی و دەمۆکراتیک یا خورتن؛ ل بەندا وێ یەکێ نە کو ل سەر داخوازێن بلەز یێن ملەتێ کورد، ھەڤکارییەکا بەرفرەھ پێک بهێت و ب ڤێ ھەڤکارییێ ھەموو ئالییێن کوردان ببن تەرەف و مخاتابێن دەولەتا ترکییەیێ.
شەھیدێن رۆبۆسکێ، ل باشوورێ کوردستانێ ل بەندا وێ یەکێ نە کو ب یەکرێزییا گەلێ مە، حکوومەتەکا خورت یا یەکگرتی، ملی، نیشتیمانی بێ ئاڤا کرن و ئەڤ حکوومەتە بکاربە یەکتییا دەزگەھێن پێشمەرگە، ئەولەکاری، ئابۆری، دیپلۆماسی، رێڤەبرییێن ھەرێما کوردستانێ پێک بینە، دەستکەفتییێن فەدەرالی بپارێزە و پێشدە ببە و ل گەل بەغدایێ، ل گەل ھەموو دەولەتان وەک یەک ئالییەکی تەڤبگەرن، ببن مخەتاب.
شەھیدێن رۆبۆسکێ، ل رۆژئاڤایێ کوردستانێ ل بەندا وێ یەکێ نە کو ل سەر ھشمەندییا رێکەفتنا دھۆکێ، ل گۆری شەرتێن ئیرۆیین، ئیدارەیەکا ھەڤبەشیا عەسکەری، ئابۆری، سییاسی، دیپلۆماسی یا ھەموو پارتییێن کوردان بێ ئاڤا کرن؛ ل بەندا وێ یەکێ نە کو ب یەکگرتنەکا نەتەوی، رێ ل ستاتویەکا سییاسی یا نەتەوی بێ ڤەکرن. ل بەندا وێ یەکێ نە کو ھەموو ئالییێن کوردان ل گەل رێڤەبرییا شامێ، ل گەل ھەموو دەولەتان، ب یەک دەنگی و یەک ھەلوەستی وەک تەرەفێ کوردی ببن مخەتاب.
شەھیدێن رۆبۆسکێ دبێژن، ممکونە کو د ئەنجاما ڤان پێشھاتەیێن ل رۆژھلاتا نێزیک و رۆژھلاتا ناڤین، ھندەک فرسەندێن مەزن بێنە بەر دەرییێ خوشک و برایێن مەیێن ل رۆژھلاتێ کوردستانێ. ژ بۆ کو بکاربن ڤان فرسەندان باش بکار بینن و ژ بۆ گەلێ مە دەستکەفتنان بدەست بخن، دڤێت ھێزێن نەتەوەیی یێن ل رۆژھلاتێ کوردستانێ ب ئاوایەکی بەرفرەھ، ھەڤکاری و تفاقێن خوەیێن نەتەوەیی، دەمۆکراتیک پێک بینن.
بەلێ، شەھیدێن رۆبۆسکێ و ھەموو شەھیدێن مە دبێژن، ئیرۆ ژ ھەر دەمێ زێدەتر پێویستی ب وێ یەکێ ھەیە کو ل سەر ھشمەندییا نەتەوەیی، دەمۆکراتیک، ل ھەر پەرچەیەکی کوردستانێ ھەڤکاری و تفاق بێنە ھوونادن؛ د ناڤا ھێزێن ھەر چار پەرچەیێن کوردستانێ و دیاسپۆرایێ دە ژی، تۆر و مەکانیزمایەکا کو بکاربە سەرکردایەتی، ھەماھەنگی، دییالۆگ، دانوستەندن، لھەڤخوەدیدەرکەتن، پشتگری، ئالیکاری، شێورا ناڤخوەیی، ب ھەڤ رە دییار کرنا فکر و ھەلوەستێن ھەڤبەش بھوونە ھەیە.
ئەم د وێ باوەری و ھێڤییێ دە نە کو کۆمکوژییا رۆبۆسکێ و قەساس و بەرپرسێن وێ رۆژەکێ دێ بێنە دارزاندن.
بەلێ، مە کۆمکوژییا رۆبۆسکێ یا کو د شەڤا 28/12/2023 دە، ژ ئالییێ دەولەتا ترکییەیێ ڤە ھاتیە ل دار خستن ژ بیر نەکرییە، ئەم دێ ژ بیر نەکن.
ئەم ڤێ کۆمکوژیێ شەرمەزار دکن.
ژ بۆ کۆمکوژیێن نوو روونەدن، پێویستییا مە ب ھەڤگرتن، ھەڤکاری، تفاقێن نەتەوەیی ھەیە، پێویستییا مە ب وەلاتەکی ئازاد و د وەلاتێ خوەیێ ئازاد دە ب ژیانەکا عادل و ئازاد ھەیە.
ئەم شەھیدێن رۆبۆسکێ و ھەموو شەھیدێن خوە ب رێزداری ب بیر تینن، روحا وان شاد، جیھێ وان بھەشت بە.
ئەم بانگی نەتەوێن یەکبوویی، کۆنسەیا ئەورووپایێ، مەحکەمەیا مافێ مرۆڤان یا ئەورۆپایێ و دەزگەھێن پەیوەندیداریێن جیھانێ دکن کو ژ بۆ قەساس و بەرپرسێن ڤێ کۆمکوژیێ بێنە دارزاندن، گاڤێن پێویستی باڤێژن.
28/12/2024
مەستەفا ئۆزچەلیک
سەرۆکێ گشتی یێ پارتییا وەلاتپارێزێن کوردستانێ (PWK)
