ئەنجوومەنا نیشتیمانی یا کورد ل سووریێ (ئەنەکەسە) تەکەزی ل سەر وێ یەکێ دکە کو ئاڤاکرنا ھەلوەستەکا یەکگرتی یا کوردی وەک بژاردەیەکا ستراتەژیک دبینە و کار ژ بۆ بدەستڤەئانینا وێ یەکێ دکە.
سەرۆکاتیا ئەنەکەسێ د داخویانیەکێ دە راگھاند، ھندەک مالپەرێن تۆرێن جڤاکی و پەیامنێران زانیاریێن دەرەو ل سەر ھەلوەستا ئەنەکەسێ یا دەربارێ دیالۆگا کوردی – کوردی دە، بەلاڤ کرنە.
سەرۆکاتیا ئەنەکەسێ تەکەز دکە:
– تشتێن کو د بەلاڤۆکێن ناڤبۆری دە ھاتنە گۆتن، چ پێوەندیا خوە ب راستیێ ڤە نینە و ھەلوەستا ئەنەکەسێ نیشان نادە.
– ئەنەکەسە ئاڤاکرنا ھەلوەستەکا یەکگرتی یا کوردی وەک بژاردەیەکا ستراتەژیک دبینە و کار ژ بۆ بدەستڤەئانینا ڤێ یەکێ دکە، ل گۆری مافێن گەلێ مە و دۆزا وییا نەتەوی، ب بەرچاڤگرتنا پێشھاتێن قۆناغا نھا و ئەرکێن پشتی رووخاندنا رەژیما زالم.
– کارێ ئەنەکەسێ یێ ژ بۆ یەکرێزیا ھەلوەستا کوردی، نە ناکۆکە ب کارێ وێ یێ د ناڤا ھەڤبەندیا نیشتیمانی یا سووریێ دە و کارێ وێ یێ دگەل ھێزێن دن یێن نشتمانی یێن سووری، ب ئاوایەکی کو خزمەتا داخوازێن گەلێ سووریێ ب ھەموو پێکھاتەیێن وێ بکە و مافێن گەلێ کورد ل سووریێ مسۆگەر بکە.
ھەروھا سەرۆکاتیا ئەنەکەسێ د داخویانیا خوە دە گۆت: “ئەم بانگ ل ھەر کەسی دکن کو دەربارێ وەرگرتنا ئاگاھیێن تایبەت ب ئەنەکەسێ دە راست بن و ژ بەردەڤکێ فەرمی یێ ئەنەکەسێ و سەرۆکاتیا وێ وەربگرن و خوە ژ وەشاندن و بەلاڤکرنا نووچەیێن دەرەوێن کو ئارمانج دکن کو تەڤلھەڤی و خراپیێ پەیدا بکن، دوور بخن.
