داخویانیا یەکەمین ژ ئەندامێن پارتیا دەمێ سڕی سورەییا ئۆندەر و پەرڤین بولدان کو دوھ لگەل رێبەرێ پەکەکێ عەبدوللاھ ئۆجالان ھەڤدیتن پێک ئانیبوون، ھات دایین. ئۆجالان د پەیاما خوە دە دبێژە: ئەو ژیربین و ئیرادەیا من ھەیە کو تەڤکاریا ئەرێنی یا پێویست ژ بۆ پارادیگمایا نوو یا کو برێز باخچەلی و برێز ئەردۆگان ھێز ددن وێ بکم.
پشتی کو وەزیرێ دادێ یلماز تونچ دەستوور دا پارتیا دەمێ سەردانا سەرۆکێ پەکەکێ عەبدوللاھ ئۆجالان بکە، پارلامەنتەرێ ستەنبۆلێ سڕی سورەییا ئۆندەر و پارلەمەنتەرا وانێ پەرڤین بولدان دوھ دانێ سبێ چوون گراڤا ئیمرالیێ و ب دەمژمێران ل گەل ئۆجالان ھەڤدیتن کرن.
پەیامەک ژ بۆی چاپەمەنی و رایا گشتی
داخویانیا شاندا ئیمرالیێ:
مە د 28ێ کانوونا 2024 دە ل ئیمرالیێ لگەل برێز عەبدوللاھ ئۆجالان ھەڤدیتنەکا بەرفرەھ پێک ئانی. تەندورستیا وی باش بوو و مۆرالا وی پر بلند بوو. نرخێن وی یێن ژ بۆ چارەسەریەکا ماییندە یا پرسگرێکا کورد گرینگیەکا ژیانی بوو.
د ھەڤدیتنێ دە کو گەشەدانێن داوی یێن ل رۆژھلاتا ناڤین و ترکیەیێ ھاتن نرخاندن، برێز ئۆجالان ژ بۆ سەناریۆیێن سبەرۆژا تاری یێن ھاتنە فەرزکرن، چارەسەریێن ئەرێنی پێشکێش کرن.
چارچۆڤەیا گشتی یا رامان و نێزیکاتیا وی وھایە:
ژ نوو ڤە خورتکرنا براتیا ترک-کورد ژ بۆ ھەموو گەلان بوویە بەرپرسیاریەکا دیرۆکی و ژ بۆ ھەموو گەلان ژی بوویە ئەرکەکێ دیارکەر یێ چارەنووسێ.
– ژ بۆ سەرکەتنا پێڤاژۆیێ، پێویستە ھەموو دەردۆرێن سیاسی یێن ل ترکیەیێ بێیی کو ب حەسابێن تەنگ و دەمکی بێن گرتن، ئینسیاتیف، ئاڤاکەر تەڤبگەرن و تەڤکاریێن ئەرێنی بکن. یەک ژ زەمینا ھەری گرینگا ڤان تەڤکاریان ژی بێگومان دێ مەجلیسا ترک بە.
– گەشەدانێن ل غەززە و سووریەیێ نیشان دا کو چارەسەریا ڤێ پرسگرێکا کو ب دەستوەردانا دەرڤە ھەر کو دچە کوورتر دبە، کەتیە رەوشەکێ کو ئێدی نایێ پاشخستن. ئالیکاری و پێشنیارێن ئۆپۆزیسیۆنێ ژی ژ بۆ بدەستخستنا سەرکەتنێ د کارەکی راستەراست لگەل گرانیا ڤێ مژارێ ھێژا نە.
– ئەو ژیربین و ئیرادەیا من ھەیە کو تەڤکاریا ئەرێنی یا پێویست ژ بۆ پارادیگمایا نوویا کو برێز باخچەلی و برێز ئەردۆگان ھێز ددن وێ بکم.
– شاند دێ ڤێ نێزیکاتیێ ھەم لگەل دەولەتێ ھەم ژی لگەل دەردۆرێن سیاسی پارڤە بکە. د رۆناھیا ڤان دە ئەز ئامادە مە کو پێنگاڤا ئەرێنی یا پێویست باڤێژم و بانگاوازیێ بکم.
– ئەڤ ھەموو ھەولدان دێ وەلاتی بگھینە ئاستا کو حەق دکە و ژ بۆ ڤەگوھەرتنا دەمۆکراتیک ژی دێ ببە رێبەرەک پر ھێژا.
– ژ بۆ ترکیێ و ھەرێمێ سەردەما ئاشتی، دەمۆکراسی و براتیێ یە.
ب رێز ژ بۆ رایا گشتی،
پەرڤین بولدان و سڕی سوورەییا ئۆندەر
29 کانوونا 2024
