ھەڤدیتنا دەم پارتی و ئۆجالان یا کو دەمەکی درێژە دهاتە چاڤەرێکرن بهێتە ئەنجامدان، هاتە ئەنجامدان. پشتی ھەڤدیتنێ دھات ھێڤیکرن کو دەم پارتی داخویانیەکێ بدە، لێ پشتی دەرباسبوونا 24 دەمژمێران ژ نوو ڤە داخویانی دا. ژ بەر کو شاندا دەم پارتیێ دەستپێکێ ھەڤدیتن لگەل سەرکردایەتیا پەکەکێ یا ل ترکیەیێ و سازیێن پەکەکێ یێن ل بەلچیکایێ ئەنجام دا و پاشێ گۆتنێن ئۆجالان ئانین زمان. پشترە ب ئیحتیمالەکا مەزن تشتێن کو کەجەکێ گۆتیە وان “نەبێژن” ژێ هاتن دەرخستن و سانسوور بوون. دەولەتێ ژی بەریا کەجەکێ ژ شاندێ رە گۆت کا چ بێ راگھاندن و چ نەیێ راگھاندن.

ھەکە بێ بیرا وە، خوارزایێ ئۆجالان عۆمەر ئۆجالان ژی د 23 جۆتمەھێ دە لگەل ئۆجالان ھەڤدیتن کر، لێ تەنێ پشتی 45 رۆژان چەند پەیڤان ل سەر ھەڤدیتنێ ئاخڤی. ژ بەر کو قەندیلێ ژێ رە گۆتبوو نەئاخڤە.

واتە داخویانیا کو ل سەر ھەڤدیتنا بوولدان و ئۆندەر هات دایین، ژ سانسوورا دەولەت و پەکەکێ دەرباس بوویە. ژ بەر ڤێ یەکێ ئەم دانووستاندنێن راستین نزانین.

لێ د ئەنجامێ دە شیانا مەیا تێگھشتنا بوویەران ھەیە. ب بەرچاڤگرتنا ھەڤدیتنێن ئیمرالی-پەکەکێ-دەولەتێ یێن کو 25 سالن بەردەوام دکن، ھەرچەند نە پەیڤ ب پەیڤ بت ژی، دەرفەتا مە یا تێگھشتنا مەنتقێ گشتی یێ گۆتووبێژان ھەیە.

کی نوونەرتیا کوردان ل سەر مێزێ ئیمرالیێ دکە؟

یەکەم؛ پرسگرێکا کورد تێ گۆتووبێژکرن، ل باکورێ کوردستانێ 32 ملیۆن کورد دژین و چارەنڤیسا ڤان مرۆڤان تێ دیارکرن، لێ د ھەڤدیتنێ دە نوونەرێ کوردان تونە یە. شاندا کو چوویە جەم ئۆجالان نە نوونەرێن کوردانن. یەک ترکە یەک ژی عەرەبە… ھەروھا ئەگەر کورد ژی بن، یا گرینگ ئەوە کو ئەو نوونەرتیا کوردستانێ بکن، ئەڤ ھەر دو کەس نە کوردن و قەت نوونەرتیا کوردان ژی ناکن. یا بالکێش ئەوە کو عەڤدللا ئۆجالان ژی دەما د سالا 1999 دە ژ کینیایێ دھات ترکیەیێ گۆت “دیا من ترکە”. پاشێ ژی گۆت “ئەز نە گەلەک کورد تێمە حەسباندن، من ل شامێ ژی قەت ب کوردی نەدئاخڤی”. واتە وێ دەمێ ئۆجالان ژی نە کوردە. باشە، ئەم دکارن ببێژن د ھەڤدیتنێن ئیمرالیێ دە پەرڤینا عەرەب، سڕیێ ترک، ئۆجالانێ ترک و دەولەتا ترک ب ھەڤ را روونشتنە و ل سەر “پرسگرێکا کورد” ئاخڤینە.

یەک ژ یێن کو چوونە پەرڤین بوولدانە کو وێ د سالا 2012 دە گۆتبوو ئۆجالان “ئەم نە کوردین، ئەم عەرەبێن سێرتێ نە”. پەرڤین بوولدان د پێڤاژۆیا چارەسەریێ یا 2013 دە ژی د ناڤ شاندا کو چوو ئیمرالیێ دە بوو. ئەو کەسەک بوو کو دەولەتێ-پەکەکێ و ئیمرالیێ ل سەر وێ ل ھەڤ کربوون. ژ سالا 2007 ھەتا ئیرۆ 17 سالن پارلامەنتەریێ دکە و 5 سالان ژی ھەڤسەرۆکیا ھەدەپێ کر. ژ بەر کو کەسەکا بێ دیتنا سیاسی بوو و تەنێ د ناڤبەرا قەندیل-ئیمرالی-دەولەتێ دە چەنتە هەلگری دکر، ژ ئالیێ ھەر سێ ھێزان ڤە ھات پشتگریکرن. د وەساییتا وێ یا پاراستی دە دو جاران مادەیێن ھشبەر ھاتن دیتن. لێ دەولەتێ ل ھەمبەر ڤێ ژی دەنگ دەرنەخست. کوردێن کو دەنگێ خوە ددان ھەدەپێ ژی دگۆتن چما ئەم دەنگێ خوە ددن ڤێ ژنێ.

رەوشا سڕی سوورەییا ئۆندەر ب تەمامی کۆمەکا گومانێیە. ئەو ترکە، ژ چەپێن ترک ھاتیە و د رابردوو دە د ناڤا سازیێن کەمالیستێن ئەرگەنەکۆنێ کو دەولەتا ترک ب رێ ڤە دبرن دە جھ گرتییە. ژ ئالیێ ھەر کەسی ڤە تێ قەبوولکرن کو ئەو ھەسپێ تروادە بوو کو ژ بۆ ژناڤبرنا ھێزا کوردێن باکور یا 2012 ھات بکارئانین. ئەو کەسێ سەرەکییە کو ب گۆتنا “ئەم ناھێلین تو ببی سەرۆک(ئەردۆگان)” دەمیرتاش شاند ناڤا زەڤییا مایینان. پاشێ دەمیرتاش و پارلامەنتەرێن ھەدەپێ یێن وێ دەمێ یان کەتن گرتیگەھێ یان ژی ھەموو رەڤیان و نەچار مان کو بچن ئەورۆپایێ، لێ سڕی سوورەییا ئۆندەر کو سەرکێشییا ڤێ پێڤاژۆیێ دکر دیسا بوو پارلامەنتەر و ھەتا وەک بەردێلا خزمەتێن وی وەک دییاری بوو جیگرێ سەرۆکێ پارلامەنتۆیێ. http://Sırrı Süreyya Önder gibi Kürt hareketine sızmış misyoner Türkleri daha önce de yazmıştık. Konuya bakmak isteyenler şu linke bakabilir.

ئۆجالان دکارە چ بێژە ؟

ب ئاوایەکی بالکێش د چاپەمەنیێ دە، ھەم مەدیایا د بن کۆنترۆلا دەولەتا ترک دە و ھەم ژی مەدیایا پەکەکێ هات گۆتن کو گۆتنێن ئۆجالان دێ پر گرینگ بن. و ھەر کەس ڤێ دپرسە: “ئۆجالان دێ چ ببێژە؟”. لێ پرس شاشە، دڤێت پرس ئەڤ بە” دەولەت دێ دەستوورا چ بدە کو ئۆجالان چ ببێژە؟”

بەلێ، ئۆجالان ژ سالا 1999 ڤر ڤە چ تشتێ کو دەولەتا ترک نەخوەستیە و زیانێ بدە بەرژەوەندیێن دەولەتا ترک نەگۆتیە. ببەخشینن، دبە کو ھندەک ژ وە حەز ژ ئۆجالان دکن و دفکرن کو وی خزمەتەکا مەزن کریە. لێ چیرۆک نە وەک یا کو ھوون دزاننە.

دەولەتێ چ خواست بت، ئۆجالان ئەو گۆتییە. دەولەتا ترک گۆت گەریلا ڤەکشینە، ڤەکشاند؛ دەولەتێ گۆت بلا پەکەکە شەری دەست پێ بکە، دەست پێ کر؛ گۆت ئاگربەستێ بشکێنن، شکاند؛ ژ بۆ ھلبژارتنێن ستەنبۆلێ گۆت ژ بۆی مە دەنگان بخوازە، خواست. ئیرۆ ژی شاندا دەمێ ئەشکەر کر، ئۆجالان ژ وان رە گۆتیە، ” ئەز دێ هاریکاریا پێویست ژ بۆ پێشنیارا برێز باخچەلی و برێز ئەردۆگان بکم” کو ئەڤ ژی تام ئەو تشتە یێ کو دەولەت ژ ئۆجالان دخوازە، پاشێ بۆ نامەیا نەورۆزا 2013 گۆت؛ “ئەو نامە دەولەتێ ب من دا نڤیساندن، ئەو پەیڤ دەولەتێ لێ زێدە کرن”. ئەم ئەوێ ژی بھێلین ئالیەکی، ژ بۆ کۆبانێ کو ب سەدان کوردان خوین رژاندن وی گۆت “من و ھاکان فیدان(سەرۆکێ میتێ) کۆبانی رزگار کر”. ئۆجالان نھا ژی نکارە – ناخوازە گاڤەکێ ژی بێ خواستەکا دەولەتێ باڤێژە. ژ بەر ڤێ یەکێ، ھەڤدیتنێن ئیمرالیێ نھا پرۆژەیێن ژ بۆ خورتکرنا دەستھلاتا ترکیەیێ یا ل سووریەیێ پێشکێش دکن. بەلێ، ئۆجالان دیسا بۆچوونەک کو پێڤاژۆیێ ژ بۆ کوردان تەڤلیھەڤ دکە ئەشکەرە کر کو تێ دە ئیفادەیێن وەک “نووژەنکرنا روحا ئەشمە، ئاشتیا ترک-کورد، پێنگاڤێن پێویست ژ بۆ پاراستنا یەکپارچەییا ترکیەیێ” و ھتد…. هەبوون.

ئۆجالان ژ بەر ڤێ راستییێ خوە تشتەکی نوو نەگۆت. و ژ مە رە ژی یا کو دەولەت دخوازە هات گۆتن.

پیرۆزکرنا گۆتنێن ئۆجالان ب خوە شاشییە، لێ ھەولدانا دەرخستنا واتەیێن کوور یێن د بەرژەوەندیا کوردان دە ژ وان گۆتنێن وی شاشیەکا ھێژ مەزنترە. ھەڤدیتنێن ئیمرالیێ نە ھەڤدیتنێن چارەسەرکرنا پرسگرێکا کوردانە، بەلکو ھەڤدیتنێن برێڤەبرنا پرسگرێکا کوردانە، ژ ئالیێ دەولەتا ترک ڤە.