پارتیا دەمۆکراتا کوردستانێ – باکور (په‌ده‌كه-باکور) دبێژە، «هێڤیا مە ژ پارتیێن سیاسی یێن رۆژئاڤایێ کوردستانێ ئەوە، ل سەر خەتا نەتەوی یەکرێزی و یەکئارمانجیا خوە ئاڤا بکن».
په‌ده‌كه-باکور ئیرۆ 29-12-2024ان داخویانیەک دەربارێ بوویەر و پێشهاتنێن ل سووریە و رۆژئاڤایێ کوردستانێ روو ددن بەلاڤ کر و تێ دە و پشتەڤانیا خوە ژ بۆ ئاڤاکرنا سووریەیەک ب هێز ئارام، ئازاد و دەمۆکرات، ب دەستڤەئانینا ماف و ئازادیێن گەلێن سوریەیێ و رۆژئاڤایێ کوردستانێ نیشان ددە.
داخویانیا په‌ده‌كه-باکور
ژ بۆ رایا گشتی و چاپامەنیێ
ئەڤ دەمەکە بوویەرێن ل رۆژئاڤایێ کوردستانێ و سووریێ رووددن، ژ نێزیک ڤە دشۆپینن. ئەم وەک په‌ده‌كه باکور، ئالیگرێ هەموو هەول و خەباتێن ژ بۆ راستکرنا رێیا دیرۆکێ، ژ بۆ ئاڤاکرنا سووریەیەک ب هێز ئارام، ئازاد و دەمۆکرات، ب دەستڤەئانینا ماف و ئازادیێن گەلێن سوریێ و رۆژئاڤایێ کوردستانێ نە.
هێڤیا مە ژ پارتیێن سیاسی یێن رۆژئاڤایێ کوردستانێ، ل سەر خەتا نەتەوی یەکرێزی و یەکئارمانجیا خوە ئاڤا بکن. ب تەمسیلیەتا گەلێ کوردێ رۆژئاڤا، ژ بۆ دەستخستنا ستاتوویەکا ب نۆرمێن هوقووقا ناڤدەولەتی ئاڤا ببە، بەشدارێ دامەزراندنا سووریەیەکە ئازاد و ئارام ببن. دیپلۆماسیەکە هەڤسەنگ و هەڤبەش ب حکوومەتا دەمکی یا شامێ رە بمەشینن.
ئەم داخویانیا جەنابێ سەرۆک برێز مەسعوود بارزانی د دەربارێ ئاڤاکرنا سوریێ دە گرینگ دبینن. ژ بۆ شاشیێن دیرۆکێ جارەکە دن روو نەدە بانگا هەموو ئالیێن پەیوەندیدار دکن کو گوهێ خوە بدن هەموو ئالیێن سیاسی و کەسایەتێن خوەدان تەجرووبە، ب تایبەتی ژی سوود ژ نموونەیا باشوورێ کوردستانێ و نێرین و تەجروبەیێن جەنابێ برێز سەرۆک بارزانی بگرن.
هێڤیدارین، دامەزراندنا سوریەیەکە ب هێز و دەمۆکراتیک دە مافێن هەموو پێکهاتەیێن سووریێ ب ماکەزاگۆنەکە پێشکەفتی وەکهەڤ بێن تەمسیلکرن.
