پارلەمەنتەرێن کوردێن د ناڤ ئۆپۆزیسیۆنا ترکیەیێ دە نە، پشتگریا پێڤاژۆیا نوو دکن و دبێژن دڤێ مافێن وەک زمان و ناسنامەیێ وەرن ناسین و تێکلیێن ب کوردێن دەرڤەیی ترکیەنە ژی باش بن، بەشەک ژ چاڤدێرێن سیاسی ژی دبێژن، پێڤاژۆ سەر ژناڤبرنا په‌كه‌كێ هاتیە ئاڤاکرن و ئارمانج ئەوە کو ب دەستێ ئۆجالان کورد ل سوریێ وەرن بێستاتوکرن.
دەربارێ پێڤاژۆیا نوو یا د ترکیەیێ دە دەست پێ کری، کوردێن د ناڤا ئۆپۆزیسیۆنا ترکیەیێ دە جهـ دگرن ژی هەلوەستێن خوە ئاشکەرە دکن. د ڤێ چارچۆڤەیێ دە پارلەمەنتەرێن کوردێن ناڤا جه‌هه‌پێ دە سیاسەتێ دکن دبێژن، دەستپێکرنا پێڤاژۆیەک نوو گرینگ و هێژایە، دڤێ خەلەتیێن پێڤاژۆیا بەرێ نەیێن دوبارەکرن، باوەری د ناڤبەرا ئالیان دە وەرە خورتکرن کو د پێڤاژۆیا رابردویێ دە گوهـ ب پێشنیارێن جه‌هه‌پێ نەهات دایین. پارلەمەنتەرێن کورد ئاماژە دکن کو رێیا چارەسەریا پرسا کورد سەر 4 خالان دیارە.
پارلەمەنتەرێ جه‌هه‌پێ یێ دیاربەکرێ سەزگین تانرکولو دبێژە: «ب یا من بانگا برێز باهچەلی گرینگ و هێژایە، پرسا کورد ل ترکیەیێ ل سەر 4 بنگەهان پێکانە وەرە چارەسەرکرن، یا یەکەم ئەوە کو دڤێ مافێ پەروەردەهیا ب زمانێ زکماکی وەرە ناسین، یا دویەم مافێ خوەرێڤەبرنێ یە کو ب ڤێ یەکێ ترکیە پارچە ئان ژی دابەش نابە، یا سێیەم دڤێ ب کوردێن دەرڤەیی ترکیەیێ رە تێکلیێن باش وەرە دانین، یا چارەم ژی ئەوە کو مافێ وەلاتیبوونا وەکهەڤە».
بەشەک ژ چاڤدێرێن سیاسییێن کورد ژی ئاماژە دکن ئاک پارتی ژی، مه‌هه‌په ژی و جه‌هه‌په ژی پشتگریا پێڤاژۆیێ دکن، ژ بەر کو پرۆژەیا دەولەتێ ب خوەیە، چاڤدێرێن کورد دبێژن، چارەسەری ب گوهەرینا 3 خالێن دەستپێکێ یا دەستوورا ترکیە پێکانە، لێ ئارمانجا پێڤاژۆیێ ب باندۆرا ئیرانێ و چارەنووسا کوردێن سووریێ ڤە گرێدایی یە.
چاڤدێرێ سیاسی عومه‌ر ئۆزمەن دبێژە: «ئۆجالان د هەڤدیتنا خوە یا داوی دە گۆتیە چارەسەری د مەجلیسێ دە پێکانە، مه‌هه‌په ژی، ئاک پارتی ژی و جه‌هه‌په ژی هەمان تشتێ دبێژە، دەولەت دخوازە کوردان ل رۆژئاڤا بێستاتو بکە و باندۆرا ئیرانێ ژی ل سەر قەندیلێ لاواز بکە».
دەربارێ ئارمانج و ئەنجامێن پێڤاژۆیا نوو دە ئالیێن کورد شیرۆڤە و پێشبنیێن ژ هەڤ جودا دکن لێ هەموو ئالیێ کورد یەک هێڤیێ دکن کو پرسا کورد وەرە چارەسەرکرن و کورد بگهیژن مافێن خوەیێن رەوا.
