ئەندامێ شاندا ئیمرالیێ ئه‌حمه‌د تورک دبێژە، پشتی سەردانا دویەم، یان یا سێیەم یا ئیمرالیێ، ئابدوڵاهـ ئۆجالان دێ بانگ ل په‌كه‌كێ بکە کو چەکان دەینە.
سیاسەتمەدارێ کورد ئه‌حمه‌د تورک کو هات راگهاندن ئەو ژی بوویە ئەندامێ شاندا ئیمرالیێ یا دەم پارتیێ و د هەمان دەمێ دە ژی ئەندامێ شاندا دەم پارتی یا گۆتووبێژێن ل گەل ئالیێن سیاسییە، ژ رۆژنامەیەکە ترکیەیێ رە ئاخڤی و گۆت، ئەوێ ل گەل هەموو پارتیێن سیاسی هەڤدیتنان بکن و جارەکە دن سەردانا ئیمرالیێ بکن.
ئه‌حمه‌د تورک گۆت، د هەڤدیتنا دویەم، یان یا سێیەم یا ب ئابدوڵاهـ ئۆجالان رە، ئەگەرەکە مەزنە ئۆجالان بانگ ل په‌كه‌كێ بکە کو چەکێن خوە دەینە.
هەروها دا زانین، د سەردانێ دە مژارا لێبۆرینا گشتی نەهاتیە رۆژەڤێ و ئۆجالان خوەستیە بەیی کو دەستێوەردانا دەرڤە هەبە، پرسا کورد پێویستە د ناڤا ترکیەیێ دە وەرە چارەسەرکرن.
شاندەکە دەم پارتیێ کو ژ سڕی سورەییا ئۆندەر و پەروین بولدان پێک دهات، رۆژا 28ێ مەها بۆری ل گرتیگەها ئیمرالیێ ب رێبەرێ په‌كه‌كێ ئابدوڵاهـ ئۆجالان رە هەڤدیتن کربوو.
ئۆجالان ژی ب رێیا شاندا دەم پارتیێ گۆتبوو: «ئەز خوەدی وێ ئەزموون و بریارێ مە کو پشتەڤانی بدم پارادیگمایا نوو یا برێز باهچەلی و برێز ئەردۆگان».
پشترە ئه‌حمه‌د تورک ژی تەڤلی شاندەیێ بوو و سەردانا سەرۆکێ گشتییێ مه‌هه‌پێ دەڤلەت باهچەلی و سەرۆکێ پارلامەنتۆیا ترکیەیێ نوومان کورتولموش رە کرن.
هات گۆتن ژی، شاندەیا کو ژ پەروین بولدان، ئۆندەر و تورک پێک تێ، پشتی تەمامکرنا سەردانێن خوە یێن ب پارتیێن سیاسی رە، دێ بچن سەردانا رێخستنێن جڤاکا سڤیل، سەندیکا، رێخستنێن کەد و پیشەیی و دەردۆرێن جڤاکی.
