د سالا نوو ده تركیێ ب ده‌هان بۆمبه ل سه‌ر 12 گوند و هه‌رێمێن دیار یێن دهۆكێ باراندنه
ئارتێشا تركیێ ب سه‌ده‌ما ته‌ڤگه‌را په‌كه‌كێ، ژ 1ی چله‌یێ ڤه ب ده‌هان بۆمبه و مووشه‌ك ل سه‌ر 12 گوند و هه‌رێمێن دیار یێن پارێزگه‌ها دهۆكێ باراندنه، ئێریشان زراره‌ك مه‌زن ل په‌ی خوه هشتیه و شێنیێن ڤان گوندان د نیگه‌رانیه‌كه به‌رده‌وام ده رۆژێن خوه ژیان دكن.
ل گۆری بیلانچۆیا په‌ڤچوونێن په‌كه‌كێ و ئارتێشا تركیێ یێن ژ 1 چله‌یا ئیسال 2025ێ ڤه، 12 گوند، گه‌لی و چیایێن دیار یێن سینۆرێ پارێزگه‌ها دهۆكێ د ئۆپه‌راسیۆنا په‌نجه ده هاتنه بۆردومان كرن، ده‌وله‌تا ترك ئێریش دژوار كرنه، هه‌موه‌خت په‌كه‌كێ ژی ته‌ڤگه‌را چه‌كدارێن خوه پێتر نێزی گوندان كریه.
گوند و هه‌رێمێن دهۆكێ یێن ژ 1ی چله‌یا 2025ێ ڤه كه‌تنه به‌ر ئێریشان
گوندێن مژێ و کەڤنە مژێ.
ئاقارێ گوندێ شێلازا ل ناحیا کانی ماسێ.
گوندێ دەرگەلا مووسا بەگێ.
چیایێ هنداڤی گوندێ ئێکمالە.
سۆرا سگێرێ و سگێرا کەڤن.
ده‌ردوورا گوندێ بابیرێ.
پشتا گوندێ گوهەرزێ.
گه‌لیێ دێرا ل ناحێا کانی ماسێ.
ئاقارێ گوندێ بلاڤا کەڤن.
گەلیێ سێڤێ.
ئێریش ووسا بوون:
ل 2/1/2025ێ:
دەمژمێر 4:04 سپێدێ ئارتێشا تركیێ ئاقارێ گوندێن مژێ و کەڤنە مژێ ل دەڤەرا بەرێ گارە تۆپبارانکرنە و نێزی 20 گوللـه‌تۆپان لێدانە.
ل 3/1/2025ێ:
دەمژمێر 11:48 شەڤێ ئارتێشا تركیێ ئاقارێ گوندێ مژێ توپبارانکر.
دەمژمێر 12:25 تا 12:45 نیڤرۆ بالافرێن ئارتێشا تركیێ ئاقارێ گوندێ شێلازا ل ناحیا کانی ماسێ ل دەڤەرا بەرواری بالا بۆردومانکریە و سێ مووشەک لێدانە.
ل 4/1/2025ێ:
دەمژمێر 11:45 سپێدێ بالافرێن ئارتێشا تركیێ ئاقارێ گوندێ دەرگەلا مووسا بەگێ ل ناحیا کانی ماسێ ل دەڤەرا بەرواری بالا بۆردومانکریە.
ده‌مژمێر 2:08 پشتی نیڤرۆ بالافرێن ئارتێشا تركیێ چیایێ هنداڤی گوندێ ئێکمالە بۆردومانكریه.
ده‌مژمێر 2:17 پشتی نیڤرۆ پشتا سۆرا سگێرێ ل دەڤەرا بەرێ گارە بۆردومانکریە، هەروەها سگێرا کەڤن ل ناحیا دێرەلۆک ل دەڤەرا نهێلیا ژی بۆردومانکرنە.
دەمژمێر 5:25 ئێڤاری تۆپخانه‌یا ئارتێشا تركیێ ئاقارێ گوندێ مژێ ل دەڤەرا بەرێ گارەی تۆپبارانکریە.
دەمژمێر 4:00 تا 4:20 ئێڤارێ ئارتێشا تركیێ ده‌ردوورا گوندێ بابیرێ ل ناحیا بامەرنێ تۆپبارانکریە.
دەمژمێر 9:50 شەڤێ بالافرێن هەلیکۆپتەر یێن تركیێ پشتا گوندێ گوهەرز ل ناحیا دێرەلۆکێ ل دەڤەرا نهێلیا بۆردومانکریە.
ل 5/1/2025ێ:
دەمژمێر 4:50 ئێڤاری ئارتێشا تركیێ گەلیێ دێرا ل ناحێا کانی ماسێ ل دەڤەرا بەرواری بالا توپبارانکریە و 4 گوللـه‌تۆپ لێدانە،
دەمژمێر 9:39 شەڤێ ئارتێشا تركیێ ئاقارێ گوندێ بلاڤا کەڤن ل ناحیا دێرەلۆکێ ل دەڤەرا نهێلیا تۆپبارانکریە.
دەمژمێر 12:20 شەڤێ بالافرێن هەلیکۆپتەر یێن ئارتێشا تركیێ دەڤەرێن گەلیێ سێڤێ و پشتا گوندێ گوهەرزێ ل ناحیا دێرەلۆکێ ل دەڤەرا نهێلیا بۆردومانکرینە.
ژ خزیرانا سالا رابووری 2024ێ ئارتێشا تركیێ قووناغه‌كه نوو ژ ئۆپه‌راسیۆنا په‌نجه ل دژی په‌كه‌كێ ل باشوورێ كوردستانێ ده‌ستپێكربوو، رۆژانه گوندێن دهۆكێ د ڤێ ئۆپه‌راسیۆنێ ده دهاتن بۆردومان كرن.
ل داوییا سالێ سه‌رۆككۆمارێ تركیێ ره‌جه‌ب تاییب ئاردۆگان گۆت كو ئه‌وێ ل سالا نوو ئێریشێن خوه یێن ب باندۆر ل دژی په‌كه‌كێ ل هه‌ر ده‌رێ ده‌وام بكن، لوما ژی ژ ده‌ستپێكا سالا نوو ڤه ئارتێشا تركیێ دیسا ئێریشێن هه‌وایی یێن ل دژی په‌كه‌كێ ل باشوورێ كوردستانێ دژوار كرنه و د 6 رۆژێن داوین ده ب ده‌هان جاران ئێریشی گوندێن دهۆكێ كرییه.
