سەرۆک بارزانی و ئەنەکەسێ تەکەزی ل سەر یەکرێزیا ئالیێن کوردی ل رۆژئاڤایێ کوردستانێ دکن

سەرۆک مەسعوود بارزانی ئیرۆ 8ێ چلە پێشوازی ل شاندەکا سەرۆکاتیا ئەنجوومەنا نیشتیمانی یا کورد ل سووریێ (ئەنەکەسێ) کر.

ل گۆر داخویانیا بارەگەھا بارزانی، د جڤینێ دە گۆتووبێژ ل سەر رەوش، پێشھات و گوھارتنێن داوی یێن ل سووریەیێ و ھەروھا ھەلوەستا ئالیێن کوردی ل ھەمبەر گوھارتنێن نھا ھات کرن.

د ھەڤدیتنێ دە، سەرۆک بارزانی تەکەزی ل سەر پشتەڤانیا دۆزا گەلێ کورد ل سووریەیێ، پێویستیا یەکرێزی و یەکھەلوەستیا ئالیێن کوردی، بەرچاڤگرتنا بەرژەوەندیێن گەلێ کورد ل سووریەیێ و پشتبەستن ب دیالۆگ و رێکارێن ئاشتیانە کر.

ئەنەکەسێ ژی راگهاند، ئەم سپاسیا پشتەڤانیا بەردەواما سەرۆک بارزانی ژ بۆ پرسا کورد ل سووریەیێ دکن

ژ ئالیێ خوە ڤە ئەنەکەسێ د داخویانیەکێ دە گۆتن: “د ھەڤدیتنێ دە، گۆتووبێژ ل سەر پێشھاتێن ھەرێمی و ناڤدەولەتی، ب تایبەتی رەوشا سووریەیێ یا پشتی رووخاندنا رەژیما بەرێ ھات کرن.”

ل گۆر داخویانیا ئەنەکەسێ د ھەڤدیتنێ دە ھەردو ئالیان تەکەزی ل سەر ڤان خالان کرن:

1- گرینگیا بەشداریا گەلێ کورد د دارشتنا پاشەرۆژا سووریەیێ دە.

2- پێویستیا یەکرێزیا ئالیێن کوردی ل رۆژئاڤایێ کوردستانێ.

3- رێکەفتن ل سەر نێرینەکا ھەڤبەشا کوردی دەربارێ مافێن گەلێ کورد دە.

4- کارکرنا لگەل ھێزێن نەتەوەیی یێن جودا ل سووریەیێ و رێڤەبەریا نھا یا وی وەلاتی.

د داخویانیێ دە ھات گۆتن، “شاندا ئەنەکەسێ سپاسی و پێزانینا خوە بۆ سەرۆک بارزانی نیشان دا، ژ بۆ پشتەڤانیا وی ژ گەلێ سووریەیێ، بەردەوامیا پشتەڤانیا ژ بۆ دۆزا کورد ل سووریەیێ و خەما یەکرێزیا کورد.”