سەرۆکێ پارتیا پێشەرۆژێ ئه‌حمه‌د داوودئۆغلو راگهاند، سەردانا مەسروور بارزانی بۆ ترکیێ د دەمەکە گونجایی دە بوو و گۆت، دڤێ دیالۆگ ل گەل برایێن کورد ل ئیراق و سووریەیێ بەردەوام بە.
سەرۆکێ پارتیا پێشەرۆژێ ئه‌حمه‌د داوودئۆغلو دەربارێ سەردانا سەرۆکوەزیرێ هەرێما کوردستانێ مەسروور بارزانی بۆ ترکیەیێ دە راگهاند، «سەردانا مەسروور بارزانی بۆ ئەنقەرەیێ و هەڤدیتنا وی یا ب سەرۆککۆمارێ ترکیەیێ رەجەپ تاییپ ئەردۆگان رە، د دەمەکە گونجایی دە بوو».
داوودئۆغلو گۆت: «ل هەمبەر هێزێن داگیرکەرێن کو دخوازن هەرێمێ تێخن ناڤا ئالۆزی و تەڤلیهەڤیێ دە، دڤێ ئەم ب برایێن خوە یێن کوردێن ل ئیراق و سووریەیێ رە دیالۆگا خوە بدۆمینن».
هەروه‌ها داوودئۆغلو گۆت: «دڤێ ل رۆژهلاتا ناڤین نەتەوەیێن دۆست نەبن قوربانیێن ناکۆکی و بەرژەوەندیێن وەلاتێن جیهانێ. ئاشتیا ل رۆژهلاتا ناڤین دێ ب پشتگری و هەڤرێزیێ پێک وەرە».
سەرۆکوەزیرێ هەرێما کوردستانێ مەسروور بارزانی رۆژا 7ێ چلەیێ ب سەردانەکێ گهیشت ئەنقەرەیێ.
د جڤینێن سەرۆکوەزیر مەسروور بارزانی ب وەزیرێ دەرڤەیێ ترکیەیێ هاکان فیدان رە، گوفتووگۆ ل سەر پێشخستنا پەیوەندیێن د ناڤبەرا هەرێما کوردستانێ و ترکیەیێ دە و پێشهاتێن داوی یێن ئیراق و ناڤچەیێ هاتن کرن.
سەرۆکوەزیرێ هەرێما کوردستانێ مەسروور بارزانی پشتی هەڤدیتنا ل گەل سەرۆککۆمارێ ترکیەیێ رەجەپ تاییپ ئەردۆگان ژی ژ پلاتفۆرما «X»ێ راگهاند، «مە ل ئەنقەرەیێ ب سەرۆککۆمار رەجەپ تاییپ ئەردۆگان رە خورتکرنا تێکلیێن دوئالی و پێشهاتێن داوی یێن ل ئیراق، ناڤچە و سووریەیێ گۆتووبێژ کرن».
هەروه‌ها گۆت: «مە تەکەزی ل سەر چارەسەرکرنا کێشەیێن د ناڤبەرا هەرێما کوردستانێ و حکوومەتا فەدەرال دە ل سەر بنگەها دەستوورێ و راکرنا ئاستەنگیان ل پێشیا هناردەکرنا پەترۆلا هەرێما کوردستانێ کر».
