ل هەرێما عه‌فرینێ یا رۆژئاڤایێ کوردستانێ کەسەکێ کورد ژ ئالیێ عه‌ره‌بەکی هاوردە ڤە هات کوشتن.
ل گوندێ قورەنێ یێ عه‌فرینێ کەسەکی ب ناڤێ عەبدلحەمید رەشید مستەفا، ژ ئالیێ عه‌ره‌بەکێ هاوردە ڤە هات کوشتن.
عەبدلحەمید رەشید مستەفا ئیرۆ ل گوندێ خوە ب ئالایا کوردستانێ ب ئاخێ هات سپارتن.
گەلەک کەس بەشداری مەراسیما ڤەشارتنا تەرمێ عەبدلحەمید رەشید مستەفا بوون و نەرازیبوونا خوە ل هەمبەری چەکدارێن سەر ب ترکیەیێ ڤە نیشان دا.
عه‌ره‌بەکی هاوردە دۆهـ ل گوندێ قورنێ یێ ناڤچەیا بلبلێ گوللـە بەردان عەبدلحەمید رەشید مستەفا یێ 58 سالی.
داگیرکرنا عه‌فرینێ
ئارتێشا ترکیەیێ و گرووپێن چەکدارێنێن د کۆنترۆلا وێ دە، 20ێ کانوونا پاشینا 2018ان ژ ئاسمان و بەژاهیێ ڤە ب ئاوایەکی بەرفرەهـ ئێرشی عه‌فرینێ کر کو وێ دەمێ د دەستێ کوردان دە بوو.
پشتی وێ ئێرشا بەرفرەها ب چەکێن گران، باژارێ عه‌فرینێ 18ێ ئادارا 2018ان کەت دەستێ ئارتێشا ترکیەیێ و گرووپێن چەکدار.
د ئەنجاما ئێرشێن گران و داگیرکرنێ دە ب سەد هەزاران کورد ژ مال و ملکێن خوە بوون و کەتن سەر رێ و دربێن کۆچبەریێ.
ژ رۆژا کو عه‌فرین کەتیە بن داگیرکەریا ترکیەیێ ڤە گرتن، بنپێکاریێن وەکی دزی، تالان، تەجاووز، بریندارکرن، کوشتن، رەڤاندن و شکەنجەیێن ل هەمبەری کوردان بەردەوام دکن.
چاڤكانی: رووداو
