نوونەرێ ئەنەکەسێ د ھەڤبەندیا ئۆپۆزیسیۆنا سووریەیێ دە عەبدولحەکیم بەشار بەشداری بەرنامەیا “X” یا کوردستان 24ێ بوو و بەحسا سەردانا خوەیا ژ بۆ شامێ پشتی کەتنا رێژیما بەشار ئەسەد، ئەگەرا پێکانینا شاندەکا کوردی یا ھەڤبەش لگەل پەیەنەکێ و ھەڤدیتنا خوەیا ب سەرۆک بارزانی کر.
عەبدولحەکیم بەشار دەربارێ سەردانا خوەیا ژ بۆ شامێ و ل سەر پرسا ئەگەرا ھەڤدیتنا لگەل ئەحمەد شەرع گۆت: “چوونا من بۆ شامێ نە ژ بۆ وێ یەکێ یە کو ئەز پەیمانان لگەل کەسی بکم. رێژیمەک کو گەلەک زولم و زۆر ل کوردان کر، ل شامێ ھات رووخاندن و نھا رێڤەبەریەکا نوو تێ ئاڤاکرن، دڤێت ئەم ژی د ناڤ دە بن. من ل شامێ ھەڤدیتن لگەل ھەموو ھێزێن سیاسی و پێکھاتەیێن نەتەوەیی و ئۆلی کر و نامەیێن مە دەربارێ چاوانیا چارەسەریا پرسا کورد ل سووریەیێ گھیشتن ئەحمەد شەرع.”
ل سەر پرسا یەکرێزیا کوردی و ھەڤدیتنێن لگەل ئالیێن پەیەنەکێ و ھەسەدێ عەبدولحەکیم بەشار گۆت: “ب رێیا ئامەریکی و فرانسیان، پێوەندی ھەنە. ئەم وەک ئەنەکەسێ، ئەم ھەر یەکرێزیا کوردی دخوازن. ب چاڤدێریا سەرۆک بارزانی 3 پەیمان چێبوون، لێ ب سەر نەکەتن، نھا دیسا ئەم ئامادە نە، لێ مەرجێن یەکرێزیێ ئەوە کو دڤێت بریاریا کوردێن سووریەیێ بە و ئالیێ دن خوە ژی خوە ژ پەکەکێ بقەتینە. ئەگەر پەکەکە بەلایا خوە ژ مە ڤەکە، چ پرسگرێکێن مە نامینن.”
ھەروھا گۆت: “یا باش ئەوە کو کوردێن سووریەیێ ب شاندەکا یەکگرتی بچن شامێ، لێ دڤێت نە گرێدایی ب چ ئالیەکی بە و داخوازا مافێن گەلێ کورد بکە. ئەم دێ گەلەکی مەمنوون بن کو مەزلووم عەبدی ڤان ھەر دو خالان قەبوول بکە.
عەبدولحەکیم بەشار دەستنیشان کر: “ئەم نکارن لگەل پەکەکێ شاندەکێ چێبکن و بچن شامێ. ما دبە ئەم بچین شامێ و ببێژین کو ئەم براتیا گەلان دخوازین و ئەم مافێن ملەتێ کورد ناخوازین؟ ئەم وەک ئەنەکەسە و ھەموو وەلاتپارێزێن کورد ڤێ یەکێ قەبوول ناکن. ژ ئالیێن دن تێ خواستن کو ڤێ پرسگرێکێ چارەسەر بکن.”
ئاماژە ب وێ ژی کر: “دەما ئەم لگەل پەکەکێ شاندەکێ چێبکن و بچن شامێ داخوازا مافێن کوردی نەکن، ئەو تێ وێ واتەیێ کو ئەم کوردستانا سووریەیێ تێک ددن. ئەگەر وھا بکن ژی، دێ دیرۆک لەعنەتێ ل مە بکە.”
عەبدولحەکیم بەشار دەربارێ ھەڤدیتنا خوە لگەل سەرۆک بارزانی گۆت: “سەرۆک بارزانی ب حیکمەتە و خوەدی ئەزموونە، ئەو حەق نادە خوە کو بکەڤە ناڤا ھوورگلیێن پرسا سووریەیێ. ئەو ژ مە رە دبێژە، ھوون کوردێن سووریەیێ لھەڤ بکن، چ ل ئالیێ من بکەڤە، ئەز ئامادە مە ئالیکاریا وە بکم. ھەروھا سەرۆک بارزانی گۆت کو ئەڤ ئیدارەیا نوویا ل سووریەیێ تشتێن باش ل سەر کوردان دبێژە، ھوون ژی نەکەڤن شاشتیان.”
