ھەڤسەرۆکێن شارەداریا دەڤەرا ئاکدەنیزێ ل پارێزگەھا مێرسینێ و سێ ئەندامێن جڤاتا شارەداریا وێ دەڤەرێ ھاتن گرتن. بریارە سەرکرداتیا دەم پارتیێ ل سەر ڤێ پرسێ راگەھاندنەکا فەرمی پارڤە بکە.
ھێزێن ترکیەیێ ھەڤسەرۆکێن شارەداریا ئاکدەنیزێ ل پارێزگەھا مێرسینێ ھۆشیار ساریلدز و نووری ئاسلان و چار ئەندامێن جڤاتا شارەداریێ ب تۆمەتا ئەندامەتی و بانگەشەیا ژ بۆ رێکخستنەکا تەرۆرستی و پێدانا ئالیکاریێن مادی گرتن.
لێ ل گۆر زانیارێن نەفەرمی، خویا بوویە کو ئەو گرتی نەچوونە دادگەھێ و ل بەرانبەری دادوەری ئامادە نەبوونە، لەوما ژی دادگەھێ بریارا زندانیکرنێ ژ بۆ ھەڤسەرۆکێن شارەداریێ و سێ ئەندامێن جڤاتا وێ شارەداریێ دەرخستیە و ئەندامەکی وێ جڤاتێ ژی ئازاد کریە.
تایێ مێرسینێ یێ دەم پارتیێ راگەھاندیە، “ھەڤسەرۆکێن شارەداریێ و ئەندامێن جڤاتا شارەداریا ئاکدەنیزێ ب ئاوایەکی نەقانوونی ھاتنە گرتن و زیندانیکرن، ب ڤی ئاوایی ژی دەنگ و مافێن وەلاتیان ھاتنە بنپێکرن.”
ھەروەسا راگەھاندیە، سەرۆکاتیا دەم پارتیێ ئیرۆ (دوشەمبێ، 13.1.2025) راگەھاندنەکا فەرمی ل سەر ڤێ مژارێ پارڤە دکە.
