شاندەیا ئیمرالیێ، کو پشتی ھەڤدیتنا لگەل رێبەرێ پەکەکێ عەبدوللاھ ئۆجالان ھەڤدیتن پێک ئانی و سەردانا پارتیێن سیاسی کر، دێ ل رۆژا ئینێ (17ێ چلەیێ) داخویانیەکا نڤیسکی بەلاڤ بکە.
شاندەیا ئیمرالیێ، کو پشتی ھەڤدیتنێن خوەیێن لگەل رێبەرێ پەکەکێ عەبدوللاھ ئۆجالان ل ئیمرالیێ لگەل رێڤەبەر و نوونەرێن پارتیێن سیاسی پێک ئانی، دێ ل رۆژا ئینێ (17ێ چلەیێ) داخویانیەکە نڤیسکی ژ بۆ رایا گشتی راگھینە.
ئەو شاندە دێ د دەرحەقا پێڤاژۆیا نھا دە، یا کو سەرۆکێ گشتی یێ مەھەپێ دەولەت باخچەلی دایە دەستپێکرن، ئاگاھیان بدە. ھەروھا د رۆژا کو وەزارەتا دادێ یا ترکیەیێ دیار کر دە ژی، ئەو شاند دێ سەردانا خوەیا دویەمین یا ئیمرالیێ ژی پێک بینە.
رۆژەڤا سەرەکی یا نھا یا ترکیەیێ پرسا کوردان و دەستپێکرنا قۆناغەکا نوو یا ئاشتیێ یە. ژ بۆ ڤێ مەرەمێ ژی، د دەما چەند رۆژێن بۆری دە شاندەکا پارتیا وەکھەڤی و دەمۆکراسیا گەلان (دەم پارتی)، پشتی جڤینا خوە یا لگەل رێبەرێ پارتیا کارکەرێن کوردستانێ (پەکەکە)یێ زیندانکری عەبدوللاھ ئۆجالان، ب ئاوایەکی جودا لگەل ئالیێن سیاسی یێن ترکیەیێ جڤیا.
ئەو شاندا دەم پارتیێ پێشتر ل رۆژا شەمبیێ، 28/12/2024، ل زیندانا ئیمرالیێ لگەل رێبەرێ پارتیا کارکەرێن کوردستانێ (پەکەکێ)یێ زیندانکری عەبدوللاھ ئۆجالان جڤیا، ژ بۆ گەنگەشە و دانوستاندنێن ل سەر پرۆسەیەکا دن یا ئاشتیێ ل ترکیێ و باکورێ کوردستانێ.
ئۆجالان د دەرحەقا داخویانیا بەشەک ژ بەرپرسێن ترکیەیێ ژ بۆ چارەکرنا پرسا کوردان دە راگەھاند، “من شیان و ئیرادە ھەنە، ژ بۆ تەڤلیبوونا ئەرێنی یا پێدڤی د گازیا ئەردۆگان و باخچەلی ژ بۆ دانووستاندنان دە.” رۆن ژی کر، “سەردەم سەردەما ئاشتی و دەمۆکراسی و براتیێ یە، ژ بۆ ترکیەیێ و دەڤەرێ.”
تێ چاڤەرێکرن کو د ڤان چەند رۆژان دە جارەکە دن شاندەکا دەم پارتیێ سەردانا گراڤا ئیمرالیێ بکە و لگەل ئۆجالان بجڤە.
