سه‌ردانا مەزلووم عه‌بدی بۆ هەولێرێ دێ د ناڤا ڤێ مه‌هێ ده پێك وه‌ره
مالپەرێ مۆنیتۆرێ راگهاند کو دێ فەرماندارێ گشتییێ هه‌سه‌دێ مەزلووم عه‌بدی وەرە هەولێرێ و ب سەرۆک مه‌سعوود بارزانی رە بجڤە.
مالپەرێ مۆنیتۆرێ یا ئینگلیزی ب رەفەرانسا چەند چاڤکانیان راگهاند کو د دەمەکە نێزیک دە فەرماندارێ گشتییێ هێزێن سووریەیا دەمۆکراتیک (هه‌سه‌د) مەزلووم عه‌بدی دێ وەرە سەردانا هەولێرێ و ل پیرمامێ ب سەرۆک مه‌سعوود بارزانی رە بجڤە.
چاڤکانیان دەما سەردانا مەزلووم عه‌بدی یا هەولێرێ و هەڤدیتنا وی یا ب سەرۆک بارزانی رە ئەشکەرە نەکر لێ چاڤکانیەکی دیار کر کو دێ سەردان «د دەمەکە نێزیک دە» پێک وەرە.
ل گۆری ئاگاهیێن رووداوێ ژی دێ سەردانا عەبدی د ناڤا ڤێ مەهێ دە پێک وەرە.
چاڤکانیەکی دن ژی دەستنیشان کر کو د دەما سەردانا نوونەرێ سەرۆک بارزانی یێ رۆژئاڤایێ کوردستانێ در. عەبدولحەمید دەربەندی و هەڤدیتنا وی یا ب مەزلووم عه‌بدی رە، ڤەخوەندنا فەرمی یا سەرۆک بارزانی گهشتیە فەرماندارێ گشتییێ هه‌سه‌دێ.
نوونەرێ سەرۆک بارزانییێ رۆژئاڤایێ کوردستانێ د. عەبدولحەمید دەربەندی رۆژا دوشەمێ چوو سەردانا رۆژئاڤایێ کوردستانێ و ل حەسەکێ ب مەزلووم عه‌بدی رە جڤیا.
ل گۆری ئاگاهیان د جڤینێ دە د. عەبدولحەمید دەربەندی پەیاما سەرۆک مه‌سعوود بارزانی راگهاند کو د پەیامێ دە تەکەزی ل سەر گرینگیا یەکرێزیا کوردان هاتیە کرن.
مەدیایا نێزیکی هێزێن سووریەیا دەمۆکراتیک راگهاند کو مەزلووم عه‌بدی سپاسیا پەیام و پشتگریا سەرۆک بارزانی کریە و تەکەزی ل سەر وێ یەکێ کریە کو قۆناغا نها پێویستی ب یەکخستنا هەولێن د ناڤبەرا هەموو ئالیێن کوردی دە هەیە.
