سەرۆک بارزانی پێشوازیا فەرماندارێ گشتییێ هێزێن سووریەیا دەمۆکراتیک کر

ئێڤاریا دوهـ پێنجشەم 16.01.2025 ل سەلاحەددین سەرۆک مەسعوود بارزانی، پێشوازیا برێز مازلووم عەبدی فەرماندارێ گشتییێ هێزێن سووریەیا دەمۆکراتیک کر.

د هەڤدیتنێ دە رەوشا سووریێ و پێشهاتێن داوییێن ئەمنی و سیاسی هاتن گۆتووبێژکرن، هەروها چارچووڤەیا گشتی یا ئالیێن کوردی ژ بۆ رووبرووبوونا پێشهاتێن نهایێن ل سووریێ و رێیێن وەرگرتنا هەلوەستەکە هەڤبەش د ناڤبەرا ئالیێن کوردی ل سووریێ هاتن گۆتووبێژکرن.

هەروها د جڤینێ دە تەکەزی ل سەر وێ یەکێ هات کرن کو دڤێ ئالیێن کوردی ل سووریێ بێیی دەستوەردانا ت ئالیەکی و ب رێیێن ئاشتیانە بریارا چارەنڤیسا خوە بدن و ژ بۆ گارانتیکرنا مافێن خوە ب یەککرنا رێزێن خوە و دەستپێکرنا ژ هەلوەستەکە هەڤبەش ژ بۆ گهیشتنا ب تێگهیشتنێ بمەشن. و رێکەفتن ب دەستهلاتێن نوو ل سووریێ رە، و ئالیێن کوردی ببن فاکتەرەک ئاشتی و ئارامیێ و کار بکن ژ بۆ رێگرتن ل دووبارەبوونا کارەساتێن کو گەلێ کورد و پێکهاتەیێن دن ل سووریێ راستی وان هاتن.