هه‌یئه‌تا ئیمرالیێ داخویانیەکە بەرفرەهـ دا
هه‌یئه‌تا ئیمرالیێ ل سەر هەڤدیتنا ب ئۆجالان و پارتی و ئاکتۆرێن سیاسی رە داخویانیەکە نڤیسکی بەلاڤ کر و راگهاند، «هەموو هەڤدیتن ژدل و ب هێڤیا ئەرێنی دەرباس بوونە».
هه‌یئه‌تا ئیمرالیێ ئیرۆ رۆژا ئینی 17 چله‌یا 2025ێ داخویانی دا و گۆت: «نێرینا کو مە ژ هەڤدیتنان ب دەست خست ئەڤە کو داخواز و ئیرادەیەکە هەڤپار د هەموو ئالیێن سیاسی دە هەیە و هەموو ئالی دخوازن پێڤاژۆیا ناکۆکی و ئالۆزا کو ژ بەر پرسگرێکا کورد چێبوویە ل پەی خوە بهێلن».
د داخویانیێ دە هات دیارکرن کو دێ شاندە جارەکە دن هەرە ئیمرالیێ و هات گۆتن:
«ل گەل هەموو نەرین و نرخاندنێن خوەیێن باش ئەم دێ د دەمەکە کن دە سەردانا برێز ئۆجالان بکن و ژ بۆ کو پێڤاژۆ ب رێبازێن زەخم و ب هێز بگهێژە ئاشتیێ و چارەسەریەک ئاڤا ببە ئەمێ کەدەکە مەزن بدن».
داخویانیا هه‌یئه‌تا ئیمرالیێ ب ڤی رەنگییە:
ژ چاپەمەنی و رایا گشتی یا هێژا رە:
مە 28ێ کانوونا پێشینا 2024ان ل ئیمرالیێ ب برێز ئۆجالان رە هەڤدیتنەک پێک ئانی. پشتی ڤێ هەڤدیتنا مە، ل سەر ئەنجامێن ڤێ هەڤدیتنێ و ل سەر داخوازا وی، مە ب مەجلسا گشتی یا ترکیەیێ، پارتیێن سیاسی و هەڤالێن خوەیێن سیاسەتمەدارێن ل گرتیگەهێ رە هەڤدیتن پێک ئانین.
مە 3یێ کانوونا پاشینا 2025ان سەردانا سەرۆکێ مەجلسا مەزنا ترکیەیێ برێز نومان کورتولموش کر و هەڤدیتنێن مە دەست پێ کر. هەڤدیتنێن مە ب سەرۆک و نوونەرێن پارتیا تەڤگەرا نەتەوەپەرەست (مه‌هه‌په)، پارتیا سبەرۆژێ (گەلەجەک پارتس)، پارتیا داد و گەشەپێدانێ (ئاكه‌په)، پارتیا سائادەتێ (سائادەت پارتس)، پارتیا گەلا کۆماری (جه‌هه‌په)، پارتیا دەوایێ (دەڤا پارتس) و پارتیا رەفاهێ (رەفاهـ پارتس) رە بەردەوام کر.
مە د ناڤبەرا 11-12ێ کانوونا پاشینا 2025ان دە سەردانا هەڤسەرۆکێن مەیێن بەرێ و هەڤالێن مەیێن سیاسەتمەدارێن گرتی برێز فیگەن یوکسەکداگ، برێز سه‌لاحه‌ددین دەمیرتاش، برێز لەیلا گوڤەن و برێز سەلچوک مزراکل کر و مە ب وان رە هەڤدیتن پێک ئانی.
ئەڤ هەڤدیتنێن مە ل سەر ئەساسێ دیالۆگێ و ئاشتیێ و ل سەر پێڤاژۆیا پەڤگوهەرتنا رامانان ب هەڤسەرۆک و دەستەیێن مەیێن پارتیێ، ب پێکهاتەیێن پارتیا مە، ب پارتیێن سیاسی یێن کو ئەم د تفاقێ دەنە و رێخستنێن سڤیلێن کو ئەم ب وان رەنە هاتنە دەستپێکرن و بەردەوام دکن.
د سەری دە ئەم هورمەت و سپاسیێن خوە پێشکێشی هەموو پارتیێن سیاسی و بەرپرسێن وان یێن قەدربلند دکن کو ب دلگەرمی و دلنزمی پێشوازیا مە کرن، نێرین و پێشنیازێن خوە یێن هێژا ب مە رە پارڤە کرن و ب زمانەکی گەلەک ئاڤاکەر خەم و رەخنەیێن خوە ئانین زمان.
خالا سەرەکە یا رۆژەڤا سەردانا مە ئەو بوو کو ئەم ئەنجامێن هەڤدیتنا ب برێز ئۆجالان رە راگهینن وان و رەوشا نوو یا کو دەرکەتیە هۆلێ ب هەڤ رە بنرخینن. ب کورتاسی، ئەڤ داخواز و ئیرادە، ژ بۆ چارەسەریا ماییندە یا پرسگرێکا کورد و بداویکرنا پێڤاژۆیا پەڤچوونێ، بەرپرسیاریا دیرۆکی یا خورتکرنا یەکیتیا ترک و کوردان، بەرپرسیاریا گەشەدانێن رادیکال و ژێڤەنەگەر ل رۆژهلاتا ناڤین رادوەستە و دەستنیشان دکە کو مەجلسا مەزنا ترکیەیێ و سیاسەتا دەمۆکراتیک زەمینا هەری گرینگا چارەسەریێیە.
هەموو هەڤدیتنێن مە ژدل و ب هێڤیا ئەرێنی دەرباس بوون. سەرۆکێن پایەبلند و شاندەیێن وان پشتگریا خوە ژ بۆ پێڤاژۆیا ئاشتیێ دیار کر. ب ڤێ رە گرێدایی د مژارێن جوربەجور دە فکار و پێشنیازێن وان ژی چێبوون. ئەڤ فکار و پێشنیاز ژی د ئەساسێ خوە دە ل سەر شەفافیا پێڤاژۆیێ و پێکانین/ئیجراکرنا وێ د ناڤا TBMM یێ دە رادوەستن.
لژنەیا مە د هەڤدیتنان دە ژ بۆ چارەسەرکرنا فکار و پرسیاران داخویانی دان و پێشکێشی کرن. نێرینا کو مە ژ هەڤدیتنان ب دەست خست ئەڤە کو داخواز و ئیرادەیەکە هەڤپار د هەموو ئالیێن سیاسی دە هەیە و هەموو ئالی دخوازن پێڤاژۆیا ناکۆکی و ئالۆزا کو ژ بەر پرسگرێکا کورد چێبوویە ل پەی خوە بهێلن.
دەرباسکرنا ڤێ پرسگرێکێ و پێشخستنا یەکیتی و براتیا هەموو پێکهاتەیێن ئەتنیکی، ئۆلی و مەزهەبی ل وەلاتێ مە، ژ بۆ بەرژەوەندی و خێرا هەر کەسییە. ئەڤ هەلوەستا هەڤپارا هەموو ئالیانە. مژارەکە دن یا ب ڤێ رە گرێدایی ژی ئەوە کو پێڤاژۆیا ئاشتیێ ببە سەدەما دەمۆکراتیکبوونا گشتی و بەرفرەهکرنا قادا سیاسەتا دەمۆکراتیک.
هەڤدیتنێن مەیێن ل گەل سەرۆک و هەڤالێن مەیێن ل گرتیگەهان گەلەکی ئەرێنی دەرباس بوون. هەڤالێن مە ب ئاوایەکی ئاشکەرا و زەلال پشتگریا خوە نیشان کرن سەر رۆلا کو برێز ئۆجالان و پارتیا دەمێ دێ بلیزە. دیار کرن کو ئەو دێ د ڤێ پێڤاژۆیێ دە بەرپرسیاریا خوە یا ژ بۆ خورتکرنا زەمینا سیاسی و جڤاکی ب ئاوایەکی ئەرێنی پێک بینن.
د ڤێ سەردەمێ دە کو ئەم ل سەر ئاشتی، دەمۆکراسی و یەکیتیا ترکیەیێ و هەرێمێ رادوەستن، شێوازێن جوداخواز و پێشدارازێن کو دەم ب دەم ئەم د مەدیایا نڤیسکی و دیتباری دە ب وان رە روو ب روو دمینن و قادا سپەکولاسیۆنێ یا کو تێ ئاڤاکرن، کارێ مە زەهمەت دکن.
ئەم دزانن کو هەر کەس و بەشێن جڤاکی دەربارێ ڤێ پێڤاژۆیێ دە خوەدی هێڤی و داخوازن، د هەمان دەمێ دە فکار، هەساسیەت و پرسیارێن هەر کەسی هەنە. ئەم د ڤێ هشمەندیێ دەنە. د پێڤاژۆیەکە وسا هەساس دە، بەلاڤکرنا ئاخافتنێن چێکری و هەولدانا ئافراندنا رۆژەڤێن کو جارنان سینۆرێن ئەخلاقی ژی دەرباس دکن، گەرمکرن و گورکرنا شەر پێ ڤەنە تشتەکی دنە.
ل گەل هەموو نەرین و نرخاندنێن خوەیێن باش ئەم دێ د دەمەکە کن دە سەردانا برێز ئۆجالان بکن و ژ بۆ کو پێڤاژۆ ب رێبازێن زەخم و بهێز بگهێژە ئاشتیێ و چارەسەریەک ئاڤا ببە ئەمێ کەدەکە مەزن بدن.
د ئاڤاکرنا ئاشتی و چارەسەریێ دە پشتگریا گەلا ل سەر ڤان هەڤدیتنێن مە دێ ببە هێمانا هەری گرینگ.
لژنەیا ئیمرالیێ یا پارتیا دەمێ
