ده‌ما 10 رۆژانه سازیێن سیاسی یێن په‌كه‌كێ (په‌یه‌دێ) و هه‌سه‌دێ شێنیێن رۆژئاڤا ژ گوند و باژارۆكێن جودا ڤه‌دگوهێزن ئه‌نیێن شه‌ر یێن ل به‌نداڤا تشرینێ و وان وه‌كه مه‌رتالێن زیندی ل دژی ئێریشێن ده‌وله‌تا ترك و چه‌ته‌یێن وێ ب كار تینه، هه‌سه‌دێ كۆمێن شێنیان دبه وێ ده‌رێ ژ بۆ كو بۆ وه‌لاتێن جیهانێ بده دیار كرن كو گه‌لێ رۆژئاڤا پشتگریێ دده وان.
ل گۆری ئاگاهیێن تایبه‌ت یێن داركا مازی، د 10 رۆژێن رابووری ده، باسكێن په‌كه‌كێ یێن ل رۆژئاڤا ب تایبه‌تی په‌یه‌ده و رێخستنێن سیاسی یێن هه‌سه‌دێ، شێنیێن کورد ژ گوند و باژار و باژارۆکێن رۆژئاڤایێ کوردستانێ ب ئۆتۆمۆبیلان ڤەدگوهێزه ئه‌نیێن شەر ل بەنداڤا تشرینێ، ژ بۆ كو ئه‌ڤ شێنی پشتگریێ بدن هه‌سه‌دێ.
هات راگهاندن هه‌سه‌ده به‌رێ شێنیێن رۆژئاڤا كوردستانێ دده به‌نداڤا تشرینێ و ل ور وان وه‌كه مه‌رتالێن زیندی ل دژی ئێریشێن ئارتێشتا تركیه‌یێ و چه‌ته‌یێن وێ یێن ئارتێشا نشتیمانی یا سووریێ ب كار تینه ژ بۆ كو په‌یامه‌كێ بده وه‌لاتێن جیهانێ كو شێنیێن رۆژئاڤا پشتگریێ ددن هه‌سه‌دێ.
ئێرشێن چەکدارێن “ئارتێشا نشتمانی یا سووریەیێ” یا نێزکی ترکیەیێ یێن ل دەردۆرا پرا قەرەقۆزاقێ و بەنداڤا تشرینێ بەردەوام دکن و شەر و پەڤچوونێن دژوار دەردکەڤن، زرارێن جانی ژ هه‌ردو ئالیان رۆژانه هه‌نه.
هەر وها ترکیە ژی ب درۆن، تۆپباران و بالافرێن شەر وان دەڤەران بۆمبەباران دکە.
چاڤكانیێن داركا مازی ئه‌شكه‌ره كرن كو د ده‌ما 10 رۆژێن رابووری ده، باسكێن په‌كه‌كێ یێن رۆژئاڤا كوردستانێ، ب هەزاران سڤیل ڤه‌گوهه‌ستنه وێ ده‌رێ و خوه‌پێشاندانان ب وان سڤیلان ژ بۆ شەرمەزارکرن و راوەستاندنا شەرێ ل بەنداڤا تشرینێ دده ئه‌نجام دایین.
ترکیەیێ چەند جاران ئێرشی وان سڤیلان ژی کر و گەلەک سڤیل بوون قوربانی، رێخستنا په‌كه‌كێ ژی د مه‌دیایا خوه ده بازرگانیێ ب خوینا وان سڤیلان دكه.
گه‌لۆ قه‌ی وه بهیستیه كو بژلی په‌كه‌كێ پارتیه‌ك یان وه‌لاته‌ك د ده‌ما شه‌ر ده سڤیلان ل ژێر ناڤێ پشتگرییا هێزێن له‌شكری ببه ئه‌نیێن شه‌ر و ب كوشتن بده؟
ل جیهێ كو په‌كه‌كه وان سڤیلان بپارێزه و وان دووری زۆنا شه‌ر بهێله، لێ به‌ره‌ڤاژی وان دكه مه‌رتال و به‌رێ وان دده مرنێ.
قه‌ی وه بهیستیه ژ دێركێ و هه‌رێما كۆچه‌راتا شێنی ژ بۆی پشتگری و شه‌رمه‌زاركرنا ئێریشێن ده‌وله‌تا ترك هه‌رن به‌نداڤا تشرینێ، ما ئه‌و نكارن ل هه‌رێمێن خوه خوه‌پێشاندانێ بكن و ده‌نگێ خوه بگهینن ته‌ڤ جیهانێ.
